باقتيار ارتايەۆ جاڭا قىزمەتكە تاعايىندالدى

بۇگىن وبلىس اكىمى نۇرلىبەك نالىبايەۆتىڭ توراعالىعىمەن وتكەن كادرلىق وزگەرىستەرگە وراي اكتيۆ وتىرىسىندا كوپشىلىككە قىزىلوردا وبلىسىنىڭ دەنە شىنىقتىرۋ، سپورت جانە تۋريزم باسقارماسىنىڭ جاڭا باسشىسى ارتايەۆ باقتيار عاريفوللا ۇلىن تانىستىردى.

- بۇگىنگى ءماجىلىسىمىزدى باستاماس بۇرىن كادرلىق وزگەرىستەرگە توقتالۋعا رۇقسات ەتىڭىزدەر. مەملەكەت باسشىسى وتاندىق سپورت سالاسىن كەشەندى رەفورمالاۋ ارقىلى بۇقارالىق، بالالار مەن جاسوسپىرىمدەر سپورتىن دامىتۋدى تاپسىردى. ول ءۇشىن بىزگە ءوز ءىسىن جەتىك بىلەتىن كاسىبي ماماندار، مىقتى باسشىلار، ۇزدىك مەنەدجەرلەر كەرەك. وسى ورايدا، تۋريزم جانە سپورت مينيسترلىگىنىڭ، مەملەكەتتىك قىزمەت ىستەرى اگەنتتىگىنىڭ كەلىسىمىمەن قىزىلوردا وبلىسىنىڭ دەنە شىنىقتىرۋ، سپورت جانە تۋريزم باسقارماسىنىڭ باسشىسى لاۋازىمىنا ارتايەۆ باقتيار عاريفوللا ۇلى تاعايىندالدى. باقتيار عاريفوللا ۇلى - بارلىعىڭىزعا جاقسى تانىس، ءوز ءىسىنىڭ بىلىكتى مامانى، مىقتى مەنەدجەر. سپورت سالاسىنىڭ جاندانۋىنا وراسان زور ۇلەس قوسقان ازامات. 2004 -جىلى افينىدا وتكەن وليمپيادا ويىندارىندا ەل قورجىنىنا التىن سالعان چەمپيونىمىز، ۆەل باركەر كۋبوگىنىڭ يەگەرى، حالىقارالىق سپورت شەبەرى، قازاقستاننىڭ ەڭبەك سىڭىرگەن سپورت شەبەرى، بوكستان قازاقستان رەسپۋبليكاسىنىڭ 7 دۇركىن چەمپيونى. باقتيار عاريفوللا ۇلىنىڭ وسى كەزگە دەيىن العان ءبىلىمى مەن جيناقتاعان مول تاجىريبەسىن ەسكەرىپ، سىر وڭىرىندەگى سپورت جانە تۋريزم سالاسىن بۇرىنعىدان دا قارقىندى دامىتادى دەپ سەنىم بىلدىرەمىز»، - دەدى نۇرلىبەك نالىبايەۆ.

باقتيار عاريفوللا ۇلى ارتايەۆ 1983 -جىلى تاراز قالاسىندا دۇنيەگە كەلگەن. مۇحاممەد حايدار دۋلاتي اتىنداعى تاراز مەملەكەتتىك ۋنيۆەرسيتەتىن «قۇقىق تانۋ»، «مەنەدجمەنت»، قازاق سپورت جانە تۋريزم اكادەمياسىن «دەنە شىنىقتىرۋ جانە سپورت»، قازتۇتىنۋوداعى قاراعاندى ەكونوميكالىق ۋنيۆەرسيتەتىن «مەملەكەتتىك جانە جەرگىلىكتى باسقارۋ» ماماندىقتارى بويىنشا بىتىرگەن. «قۇقىق تانۋ»، «دەنە شىنىقتىرۋ جانە سپورت» ماگيسترى.

ەڭبەك جولىن 2004 -جىلى «تاراز گاز شارۋاشىلىعى باسقارماسى» جاۋاپكەرشىلىگى شەكتەۋلى سەرىكتەستىگىنىڭ مەنەدجەرى بولىپ باستاعان.

2009-2013 -جىلدارى جامبىل وبلىسى ايشابيبى اۋىلدىق وكرۋگىنىڭ اكىمى، جامبىل وبلىسىنىڭ دەنە شىنىقتىرۋ، سپورت جانە تۋريزم باسقارماسىنىڭ باسشىسى، جامبىل وبلىسى اكىمى اپپاراتى باسشىسىنىڭ ورىنباسارى.

2013-2021 -جىلدارى «استانا» پرەزيدەنتتىك كاسىپقوي سپورت كلۋبى» كورپوروتيۆتىك قورىنىنىڭ پرەزيدەنتى، «تارلان باتىرلارى» ج ش س ديرەكتورى، «استانا ارلانس» ج ش س باس مەنەدجەرى.

2021-2022 -جىلدارى «قازاقستان بوكس فەدەراتسياسى» قاۋىمداستىعىنىڭ ۇلتتىق كوماندالار ۇيلەستىرۋشىسى، ۆيتسە- پرەزيدەنتى، سپورت جانە دەنە شىنىقتىرۋ ىستەرى كوميتەتى سپورتتى دامىتۋ ديرەكسياسىنىڭ بوكستان مەملەكەتتىك جاتتىقتىرۋشىسى قىزمەتتەرىن اتقارعان.

ەلىمىزدە سپورت سالاسىنىڭ دامۋىنا قوسقان ەلەۋلى ۇلەسى ءۇشىن I دارەجەلى «بارىس» وردەنىمەن ناگرادتالعان.

باقتيار عاريفوللا ۇلى بۇعان دەيىندە جامبىل وبلىسىنىڭ دەنە شىنىقتىرۋ، سپورت جانە تۋريزم باسقارماسىن باسقارىپ، سپورت سالاسىنىڭ دامۋىنا سۇبەلى ۇلەس قوسقان.

وبلىس اكىمى جاڭا باسشىعا وڭىردەگى بۇقارالىق سپورتپەن اينالىسۋشىلار ۇلەسىن ارتتىرۋدى، كوماندالاردى دايارلاۋدى جانە ولاردىڭ رەسپۋبليكالىق، حالىقارالىق سپورتتىق جارىستاردا ونەر كورسەتۋىن قامتاماسىز ەتۋدى تاپسىردى. ءبىلىم بەرۋ ۇيىمدارىنىڭ سپورت عيماراتتارىندا ساباقتان تىس، كەشكى ۋاقىتتا سپورت سەكسيالارى جۇمىسىن ۇيلەستىرۋدى جانە سپورتتىق ءىس- شارالار وتكىزۋدى، «Damu bala» باعدارلاماسى اياسىندا جان باسىنا شاققاندا قارجىلاندىرۋ ماسەلەسىن جۇيەلەندىرۋدى، باسقا دا مىندەتتەردى ايقىنداپ بەردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى