باق قالا: الماتىعا بيىكتىگى 6 مەتردەن اساتىن ءىرى كوشەتتەر وتىرعىزىلادى
الماتى. KAZINFORM - بىلتىر مەگاپوليستە 650 مىڭعا جۋىق اعاش پەن بۇتا وتىرعىزىلدى. بۇل تۋرالى الماتىدا ورتالىق كوممۋنيكاتسيالار قىزمەتىندە وتكەن بريفينگتە قالا اكىمى ەربولات دوسايەۆ ايتتى.
شاھار باسشىسىنىڭ ايتۋىنشا، 2025 -جىلى قالاعا بيىكتىگى 6 مەتردەن اساتىن 27 مىڭ ءىرى كوشەت وتىرعىزىلادى. سونداي-اق 1 ميلليونان استام جاسىل جەلەك اۆتوماتتاندىرىلعان جۇيەمەن سۋارىلادى.
- مەملەكەت باسشىسىنىڭ «الماتى - باق قالا» مارتەبەسىن جانداندىرۋ تۋرالى تاپسىرماسىن ورىنداۋ ماقساتىندا 2030 -جىلعا دەيىن 2,5 ميلليون جاسىل جەلەك وتىرعىزۋ بويىنشا جول كارتاسى بەكىتىلدى. 2025 -جىلدان باستاپ كوشەت ەگۋ كەزىندە الماتى اكىمدىگى ءىرى كولەمدى كوشەتتەردى جاپپاي قولداناتىن بولادى. وسىلايشا بيىكتىگى 4 جانە 6 مەتردەن اساتىن 27 مىڭ كوشەت وتىرعىزىلادى، - دەدى اكىم.
الماتى قالاسىندا جاسىل جەلەكتەردى قورعاۋ جانە كۇتۋ قاعيدالارىمەن سۋارۋ جۇيەسىن مىندەتتى تۇردە جۇرگىزۋ جونىندەگى نورما ەنگىزىلدى.
2 جىل ىشىندە 500 شاقىرىم اۆتوماتتاندىرىلعان سۋارۋ جانە تامشىلاتىپ سۋارۋ جەلىلەرى ورناتىلدى. 2025-جىلى تاعى 290 شاقىرىم وسىنداي جەلىلەر ورناتىلادى (سوماسى 4,1 ميلليارد تەڭگە).
ەستەرىڭىزگە سالا كەتەيىك، 2024 -جىلدىڭ ءساۋىر ايىندا «الماتى - ءبىزدىڭ ورتاق ءۇيىمىز» اكسياسى اياسىندا قالانى كوگالداندىرۋ بويىنشا «الماتى - باق قالا» اۋقىمدى اكسياسى ءوتتى. سونىڭ اياسىندا، 7 مىڭنان استام جاسىل جەلەك وتىرعىزىلدى، ونىڭ ىشىندە 4015 جەمىس اعاشى، 1090 جاپىراقتى اعاش جانە 2600 بۇتا بار.
بۇعان دەيىن ساتبايەۆ كوشەسىنىڭ بويىنداعى قۋراعان قىلقان جاپىراقتىلاردى كەسىپ، ورنىنا جاڭاسىن وتىرعىزىلاتىنى تۋرالى جازعان ەدىك.
الما مۇقانوۆا
اۆتور
