بانك سالاسىندا جاڭا ليتسەنزيا ەنگىزىلەدى

- بانكتەر تۋرالى جاڭا زاڭ جوباسى جەتى نەگىزگى باعىتتى قامتيدى. ءبىرىنشى باعىت ليتسەنزيالاۋ جۇيەسىن جاڭعىرتۋعا جانە بانك نارىعىنا قولجەتىمدىلىكتى رەتتەۋگە قاتىستى. بىرىنشىدەن، جاڭا قاتىسۋشىلاردىڭ نارىققا شىعۋىن جەڭىلدەتەتىن جانە باسەكەلەستىكتىڭ كۇشەيۋىنە ىقپال ەتەتىن بازالىق بانكتىك ليتسەنزيا ەنگىزىلەدى. ونىڭ امبەباپ ليتسەنزيادان ايىرماشىلىعى اكتيۆ مولشەرى مەن وپەراتسيا تۇرلەرى بويىنشا شەكتەۋلەردى كوزدەيتىنىندە. سونداي-اق ەڭ تومەن كاپيتالعا (10 ميلليارد تەڭگەگە دەيىن)، تاۋەكەلدەردى باسقارۋ جۇيەسىنە جانە قاداعالاۋ جۇكتەمەسىنە قويىلاتىن تالاپتاردى ازايتادى، - دەدى اگەنتتىك باسشىسى.

قاراپايىم تىلمەن ايتساق، ەلدىڭ قارجى نارىعىنا بانك رەتىندە تىركەلىپ، جۇمىس ىستەگىسى كەلگەن قارجى ۇيىمدارىنا قويىلاتىن تالاپ جەڭىلدەيدى دەگەن ءسوز.

مۇنداي ليتسەنزيا شاعىن جانە ورتا بيزنەسپەن جۇمىس ىستەيتىن ميكروقارجى ۇيىمدارىنىڭ بانك رەتىندە تىركەلۋىنە مۇمكىندىك اشادى. بازالىق ليتسەنزيامەن جۇمىس ىستەيتىن بانكتەر ورىندايتىن قارجى وپەراتسيالارىنىڭ سانى امبەباپ ليتسەنزياسى بار بانكتەرگە قاراعاندا شەكتەۋلى بولادى. وپەراتسيالاردىڭ اۋقىمى دا شەكتەلەدى. بۇل قۇجاتتى اياقتان جاڭا تۇرعان بانكتەرگە بەرىلەتىن قۇرال دەپ ايتۋعا بولادى. بانكتىڭ اكتيۆى مولايىپ جاتسا، امبەباپ ليتسەنزيا الۋ كەرەك بولادى. ياعني، اكتيۆى تولىققاندى بانكتەرمەن دەڭگەيلەس قارجى ۇيىمى بازالىق ليتسەنزياسى بار بانك رەتىندە جۇمىس ىستەي المايدى.

بۇل ليتسەنزيانىڭ ەكىنشى ءبىر ماقساتى - حالىققا وڭدى-سولدى نەسيە تاراتىپ، اسا ۇلكەن پايىزدىق مولشەرلەمەمەن ءوسىماقى ءوندىرىپ الاتىن ۇيىمداردىڭ جولىن كەسۋ.

امبەباپ ليتسەنزيامەن جۇمىس ىستەيتىن كاپيتالى ۇلكەن بانكتەر «يسلام تەرەزەسىن» اشۋ ءۇشىن بازالىق ليتسەنزيانى پايدالانا الادى. ءبىراق مىندەتتى تۇردە ول قىزمەتىنىڭ ەسەبىن بولەك جۇرگىزۋ كەرەك.

بۇعان دەيىن بانكتەرگە «يسلام تەرەزەسىن» اشۋعا رۇقسات بەرەتىن زاڭ جوباسى تامىزدا پارلامەنتكە تۇسەتىنىن جازعان ەدىك.

اۆتور

ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى