بانك الدىنداعى بورىشى 2,1 ميلليارد تەڭگەگە جەتكەن استانالىق تۇرعىن بانكروتتىق راسىمدەي الماي ءجۇر
استانا. KAZINFORM - مەملەكەتتىك كىرىستەر كوميتەتى ءتوراعاسىنىڭ ورىنباسارى سەيىلجان احمەتوۆ جەكە تۇلعالاردى بانكروت دەپ تانۋ شارالارىنىڭ ارالىق قورىتىندىلارىن باياندادى.
- الماتى وبلىسىندا ەڭ كوپ ءوتىنىش بەرىلگەن - 23640 ەڭ ازى - ۇلىتاۋ وبلىسىندا - 1924. بۇل وسى ايماقتارداعى حالىقتىڭ تىعىزدىعىنا بايلانىستى. بانكروتتاردىڭ ورتاشا جاسى - 44 جاس. ەڭ جاسى ۇلكەن بانكروت - 1943 -جىلى تۋعان شىمكەنت قالاسىنىڭ تۇرعىنى، بەرەشەك سوماسى 370 مىڭ تەڭگە. ەڭ جاس بانكروت - 2005 -جىلى تۋعان استانا قالاسىنىڭ تۇرعىنى، بەرەشەك سوماسى 856 مىڭ تەڭگە، - دەدى ول ورتالىق كوممۋنيكاتسيالار قىزمەتىندە ءوتىپ جاتقان باسپا ءسوز ءماسليحاتىندا.
ونىڭ ايتۋىنشا، بانكروتتىققا جۇگىنەتىندەردىڭ باسىم بولىگى ەر ازاماتتار. بانكروت دەپ تانۋ تۋرالى وتىنىشتەردىڭ %52- ىن ەر ادامدار تۇسىرگەن.
- بەرەشەگى ەڭ كوپ بانكروت استانا قالاسىنىڭ تۇرعىنى بولدى. قارىز سوماسى 2,1 ميلليارد تەڭگەگە جەتكەن. بۇگىنگى تاڭدا ونى بانكروت دەپ تانۋ تۋرالى شەشىمگە كرەديتور شاعىمدانىپ، سوتتا قارالۋدا جانە بۇل سوما 2007 -جىلى الىنعان نەسيەلىك قارىزدىڭ باعامدىق ايىرماشىلىعىنا بايلانىستى ۇلعايىپ كەتكەن، - دەدى سەيىلجان احمەتوۆ
سونداي-اق، ول بانكروت دەپ تانىلعان ازاماتتاردىڭ %5- ى (1342) ازامات مەملەكەتتەن اتاۋلى الەۋمەتتىك كومەك الاتىنىن ايتتى. ال 9891 ادامنىڭ (44 پايىزى) 5 جىلدان استام ۋاقىت بويى تولەنبەگەن قارىزى بولعان.
بۇعان دەيىن اتىراۋ وبلىسىندا جىل باسىنان بەرى 252 دارمەنسىز بورىشكەر بانكروت دەپ تانىلعانىن جازعان ەدىك.
اۆتور
ەسىمجان ناقتىباي
