بالقاشتى زەرتتەۋ گرانتى: فرانسيا 1,35 ميلليون ەۋرو قارجىنى قاشان بولەدى
استانا. KAZINFORM - ق ر سۋ رەسۋرستارى جانە يرريگاتسيا مينيسترلىگى فرانسيانىڭ دامۋ اگەنتتىگى بالقاشتى زەرتتەۋ ءۇشىن بولەتىن 1,35 ميلليون ەۋرولىق گرانتقا قاتىستى جۇمىس قالاي ءجۇرىپ جاتقانىن مالىمدەدى.
- ق ر سۋ رەسۋرستارى جانە يرريگاتسيا مينيسترلىگى فرانسيانىڭ دامۋ اگەنتتىگى (AFD) جانە فرانسيانىڭ گەولوگيالىق جانە تاۋ-كەن زەرتتەۋلەر بيۋروسى (BRGM) بالقاش كولىن ساقتاۋ بويىنشا بىرلەسكەن جۇمىس جۇرگىزۋگە ۋاعدالاستى. AFD بالقاش كولىنىڭ سۋ جيناۋ الاڭىن ساقتاۋ بويىنشا شەبەرلىك جوسپارىن ازىرلەۋگە گرانت قاراستىرۋدا. وسى جۇمىس اياسىندا BRGM كەشەندى زەرتتەۋلەر جۇرگىزەدى جانە بالقاش كولىنىڭ سۋ رەسۋرستارىن تۇراقتى باسقارۋ ستراتەگياسىن ازىرلەيدى. زەرتتەۋ ادىستەرى سۋ رەسۋرستارى مەن سۋدى پايدالانۋدىڭ اعىمداعى كۇيىن تالداۋ ءۇشىن سپۋتنيكتىك التيمەتريا مەن گيدرولوگيالىق مودەلدەردى پايدالانۋدى، سونداي-اق كليماتتىڭ وزگەرۋى مەن ادام ارەكەتىنىڭ اسەرىن ەسكەرە وتىرىپ، بولاشاق وزگەرىستەردى مودەلدەۋدى قامتيدى، - دەلىنگەن Kazinform-نىڭ رەسمي ساۋالىنا جولداعان جاۋاپتا.
سونداي-اق مينيسترلىك قاپشاعاي سۋ قويماسىنىڭ جۇمىسىن وڭتايلاندىرۋ بويىنشا ۇسىنىستار ازىرلەۋ ءۇشىن بالقاش كولىنە قۇياتىن جانە ودان شىعاتىن سۋ اعىنىن مودەلدەۋ جۇرگىزىلەتىنىن مالىمدەدى.
- وسى جوبا شەڭبەرىندە ماستەر-جوسپار مازمۇنىن جاساۋ بويىنشا جۇمىستار باستالدى. ماستەر-جوسپاردى جاساۋ اياقتالعاننان كەيىن بالقاش كولىنىڭ سۋ جيناۋ الاڭىن دالالىق جەرۇستى زەرتتەۋ جۇمىستارى باستالادى، - دەپ جازىلعان جاۋاپتا.
ۆەدومستۆو وكىلدەرى قازىرگى تاڭدا بۇل بولىنەتىن قارجىمەن ناقتى قانداي زەرتتەۋ جۇرگىزىلەتىنى تالقىلانىپ جاتقانىن ايتتى. قارجى بولىنگەن كۇننىڭ وزىندە جۇمىستاردى فرانسيانىڭ گەولوگيالىق جانە تاۋ-كەن زەرتتەۋلەر بيۋروسى (BRGM) جۇزەگە اسىرادى. ال قازاقستاندىق تاراپ تەك تاپسىرىس بەرۋشى جانە باقىلاۋشى رولىندە بولماق.
ەسكە سالا كەتسەك، بىلتىر فرانسيا بالقاشتىڭ ەكولوگيالىق جاعدايىن زەرتتەۋگە گرانت بولەتىنى جايلى حابارلاندى.
سونداي-اق قازاقمىس كومپانياسى بالقاشتىڭ ەكوجۇيەسىن ساقتاۋعا 5 ميلليون دوللار بولەتىنىن مالىمدەگەن ەدى.
