بالاسى مەن قارت اكە-شەشەسىن اسىراعىسى كەلمەيتىندەر كوشە سىپىرىپ، تۇرمەگە قامالادى

بۇعان دەيىن قىرعىزستاندىق دەپۋتات تازابەك يكراموۆ باستاماشى بولعان تۇزەتۋلەر اتا-اناسىن اسىراۋدان جالتارىپ، قارتتار ۇيىندە قالدىرعانى ءۇشىن 100 مىڭ سومعا دەيىن ايىپپۇل سالۋ نەمەسە ءبىر جىلدان ەكى جىلعا دەيىن باس بوستاندىعىنان ايىرۋ جازاسىن ەنگىزۋدى قاراستىرعان بولاتىن.

«كوپ ۇسىنىستار تۇسكەندىكتەن ولاردى دەرەۋ ەسكەرۋ جونىندە شەشىم قابىلداندى، سوندىقتان جاڭا، وزگەرتىلگەن زاڭ جوباسى قوعامدىق تالقىعا شىعارىلدى»، - دەپ ءتۇسىندىردى جوگوركۋ كەنەش.

ەندى بالالاردىڭ قارت اتا-اناسىنىڭ عانا ەمەس، كامەلەتكە تولماعان نەمەسە مۇگەدەك جانە ماتەريالدىق كومەككە مۇقتاج ەرەسەكتەردىڭ الدىنداعى جاۋاپكەرشىلىگى قاراستىرىلادى.

«قىرعىزستان رەسپۋبليكاسى ق ك 178، 179-باپتارىنا ايىپپۇل سانكسياسى بويىنشا نورمالار ۇسىنىلادى. سونىمەن قاتار زاڭنامادا اليمەنتتىڭ ۋاقتىلى جانە تولىق تولەنۋىن رەتتەيتىن نورمالار جوق، سوندىقتان جاۋاپكەرشىلىكتى قاتاڭداتۋ ماقساتىندا كودەكسكە وزگەرىس ەنگىزۋ ۇسىنىلادى» دەلىنگەن انىقتامادا.

زاڭ جوباسىنا سايكەس، اتا-انالا اليمەنتىن بىرنەشە رەت تولەمەي قويسا، 40 تان 100 ساعاتقا دەيىن قوعامدىق جۇمىسقا تارتىلادى نەمەسە توعىز ايعا دەيىن باس بوستاندىعىنان ايىرىلادى.

ەگەر كامەلەتكە تولعان، ەڭبەككە جارامدى بالالار اليمەنتىن تولەمەسە، ولارعا 500 دەن 1 مىڭعا دەيىنگى ەسەپتىك كورسەتكىشكە دەيىن ايىپپۇل سالىنادى (50-100 مىڭ سوم) نەمەسە توعىز ايعا دەيىن باس بوستاندىعىنان ايىرىلادى.

بىرنەشە رەت جاسالعان ءدال سول ارەكەت – 800 دەن 1 مىڭ 200 گە دەيىنگى ايلىق ەسەپتىك كورسەتكىشكە (80 دەن 120 مىڭ سومعا) دەيىنگى مولشەردە ايىپپۇل سالۋعا نە ارناۋلى، اسكەري، قۇرمەتتى اتاقتان، ديپلوماتيالىق دارەجەدەن ايىرا وتىرىپ، بىر جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى