بالانى قالاي بولەك جاتۋعا ۇيرەتەمىز؟

دۇرىس ۋاقىت تاڭداۋ

بۇل جايلى بالالار كلينيكالىق پسيحولوگى ءوزىنىڭ instagram-پاراقشاسىندا جازدى. پسيحولوگ بالانى بولەك جاتقىزۋدى باستاۋ ءۇشىن ەڭ الدىمەن جاقسى ۋاقىت تاڭداۋ كەرەگىن ايتتى.

«بالا ول كەزدە اۋىرماۋ كەرەك. وتباسىندا ەكىنشى بالا دۇنيەگە كەلگەنگە دەيىن جاتقىزۋ كەرەك. ياعني، ۇلكەنىڭىز ونى باسقا بالانىڭ دۇنيەگە كەلۋىمەن بايلانىستىرماۋ كەرەك. بالاباقشاعا بەيىمدەلۋمەن بىرگە جۇرمەگەن دۇرىس. وعان دەيىن نەمەسە كەيىن باستاڭىز»، - دەيدى اينۇر الداشيەۆا.

ۇيقىعا دايىندالۋ

ماماننىڭ ايتۋىنشا، ۇيىقتاردىڭ الدىندا كۇندە قايتالاناتىن ءداستۇر بولۋى كەرەك.

«ساعات 20:00 دەن باستاپ ۇيقىعا دايىندالىڭىز. سەكىرىپ، جۇگىرەتىن ويىننان تىنىش ويىندارعا كوشەمىز. توسەك سالامىز. ۇيىقتاۋعا ارنالعان كيىمدى كيەمىز. كىتاپ وقيمىز، بارىنە «قايىرلى ءتۇن» تىلەيمىز جانە قۇشاقتاسامىز»، - دەيدى بالالار پسيحولوگى.

بالانى دۇرىس جاتقىزۋ

ماماننىڭ ايتۋىنشا، بالا تۇندە ويانىپ، اتا-اناسىنىڭ قاسىنا كەلسە، ونى توسەگىنە اكەسىنىڭ جاتقىزعانى دۇرىس.

«قاتتى جارىق تۇسىرمەيتىن شام كەرەك. جاقسى كورەتىن ويىنشىعى كەرەك. اناسىنىڭ كويلەگىن توسەگىنە قويسا دا بولادى. ەسىكتى جاپپايسىز. بالا ويانىپ، مىندەتتى تۇردە ءسىزدىڭ توسەگىڭىزگە كەلەدى. بالانى ورنىنا جاتقىزامىز. كوتەرىپ ەمەس، ءوز اياعىمەن بارعان جاقسى جانە ءسىز ەمەس، اكەسى جاتقىزادى. نەگە اكە؟ ويتكەنى اكەنىڭ ءبىرىنشى فۋنكسياسى - ول بالانى الەۋمەتكە اكەلۋ بولسا، ەكىنشى فۋنكسياسى - انا مەن بالا اراسىنداعى سەپاراتسيانى قامتاماسىز ەتۋ. سونىمەن قاتار، «ۇلكەندەردىڭ توسەگى» دەپ بالاعا بەلگى بەرەتىن دە اكەسى. بۇل وتە كۇردەلى پسيحيكالىق پروتسەسس. مۇنىڭ بارلىعى اكەسىنىڭ قولىنان جاقسى كەلەدى»، - دەپ ءتۇسىندىردى ول.

بولەك جاتۋعا بىرتىندەپ ۇيرەتۋ

بالالار كلينيكالىق پسيحولوگى اينۇر الداشيەۆا بالا بولەك جاتۋعا ۇيرەنۋ ءۇشىن مىنا قادامداردى ساقتاۋعا كەڭەس بەردى:

ۇيىقتاعانعا دەيىن 3-4 كۇن قاسىندا جاتاسىز؛

سوسىن 3-4 كۇن جاتپايسىز، وتىراسىز، قولىنان ۇستايسىز؛

3-4 كۇن وتىراسىز قاسىندا، ءبىراق قولىنان ۇستامايسىز؛

3-4 كۇن بالانىڭ اياق جاعىندا وتىراسىز؛

3-4 كۇن ورىندىقتا وتىراسىز؛

3-4 كۇن ورىندىقتى ەسىككە قاراي جىلجىتاسىز.

«بۇل وڭاي ەمەس. اكە-شەشەسىنىڭ شەشىمى بولۋ كەرەك، بالادا اتا-اناسىمەن ۇيىقتاۋ دەگەن قاجەتتىلىك جوق. ەگەر بالا اناسىمەن ۇيىقتاسا، بۇل اناسىنىڭ پروبلەماسى، اناسىنىڭ مازاسىزدىعى. ونىمەن جۇمىس ىستەۋ كەرەك. ەرىك-جىگەردى دامىتۋدىڭ العاشقى قادامدارى ەرىكتى دارەتكە بارۋ، وزدىگىنەن بولەك ۇيىقتاۋ، قوسىمشا قولداۋسىز تاماقتانۋدان باستالادى. بالاڭىزدىڭ بۇگىنگى ەرىك-جىگەرى ەرتەڭگى بولاشاعىنان حابار بەرەدى»، - دەپ قورىتىندىلادى اينۇر الداشيەۆا.

massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى