بالالارعا ساپالى مەديتسينالىق كومەك كورسەتىلۋى ءتيىس - ءالنازاروۆا
استانا. KAZINFORM - استانادا ق ر دەنساۋلىق ساقتاۋ مينيسترلىگى، سپورت جانە تۋريزم مينيسترلىگى جانە ۇلتتىق كاسىپكەرلەر پالاتاسىنىڭ قولداۋىمەن «Capital Health» تۇڭعىش ۇلتتىق فورۋمى ءوتىپ جاتىر.
ءىس-شارانىڭ باستى ماقساتى - مەملەكەت، بيزنەس جانە عىلىمنىڭ توعىسۋى شەڭبەرىندە سالاۋاتتى بولاشاقتى ناسيحاتتاۋ، ۇلت ساۋلىعىن ۇلىقتاۋ.
فورۋمدى اشقان دەنساۋلىق ساقتاۋ ءمينيسترى اقمارال ءالنازاروۆا سوڭعى 10 جىلدا قازاقستاندا حالىق سانىنىڭ جىل سايىنعى تۇراقتى ءوسىمى بايقالاتىنىن اتاپ ءوتتى.
«بۇگىندە ۇكىمەت بالالاردىڭ دەنساۋلىعىنا ەرەكشە ءمان بەرىپ، زاماناۋي جانە ءتيىمدى دەنساۋلىق ساقتاۋ جۇيەسىن قۇرۋعا ۇمتىلۋدا. ءبىز ءاربىر بالا مىقتى، دەنى ساۋ جانە باقىتتى بولىپ ءوسۋى ءۇشىن ولاردىڭ ساپالى مەديتسينالىق كومەك پەن كۇتىمگە قول جەتكىزۋىن قامتاماسىز ەتۋگە مىندەتتىمىز. ويتكەنى بالالار - ءبىزدىڭ بولاشاعىمىزدىڭ نەگىزى»، - دەدى مينيستر.
ونىڭ ايتۋىنشا، 2030-جىلعا قاراي جۇقپالى ەمەس اۋرۋلاردان بولاتىن مەزگىلسىز ءولىم-ءجىتىمدى ۇشتەن بىرگە قىسقارتۋ كوزدەلىپ وتىر.
«وسى ماقساتتا تۇراقتى دامۋ ماقساتتارى ينديكاتورلارى دەنساۋلىق ساقتاۋ جۇيەسىنىڭ باعدارلامالىق قۇجاتتارىندا جۇزەگە اسىرىلۋدا. حالىقارالىق ۇيىمدارمەن بىرلەسىپ، حالىقتىڭ دەنساۋلىعى مەن ءال- اۋقاتىن قولداۋ ماقساتىندا جول كارتاسى ازىرلەندى. سونىمەن قاتار، ءار ادامنىڭ دەنساۋلىعى ءوز قولىندا جانە ءومىر سالتىنا، مىنەز-قۇلىق فاكتورلارىنا بايلانىستى ەكەنىن حالىققا ۇعىندىرۋىمىز ماڭىزدى»، - دەدى اقمارال ءالنازاروۆا.
