بالالار مەرەكەسى: الماتىدا 1- ماۋسىم كۇنى قايدا بارۋعا بولادى

حالىقارالىق بالالاردى قورعاۋ كۇنىنە ارنالعان باستى وقيعا - «БALAFEST, JARYQ SKILL FEST» فەستيۆالى بولادى. ءىس-شارا ءاليا مولداعۇلوۆا مەن مانشۇك مامەتوۆا اتىنداعى ساياباقيا ساعات 12:00-دەن 16:00-گە دەيىن وتەدى. وندا بالالار ەكولوگياعا، مادەنيەتكە، سالت-داستۇرلەرگە، تەحنولوگيالارعا جانە كاسىپتەرگە ارنالعان تاقىرىپتىق ايماقتارعا بارىپ، سىيلىقتارعا ايىرباستاۋعا بولاتىن ويىن ۆاليۋتاسىن جينايدى.

سونىمەن قاتار 1- ماۋسىمدا گوركي اتىنداعى ورتالىق مادەنيەت جانە دەمالىس ساياباعىندا «BalaStar Almaty» وتباسىلىق فەستيۆال-كونسەرتى وتەدى. كونسەرتتىك باعدارلاما ساعات 11:00-دە باستالادى. وعان قازاقستاندىق ەسترادا جۇلدىزدارى - روزا رىمبايەۆا، جارقىناي حانايىم، ايگۇل قوسانوۆا، دينايا، سونداي-اق «سارمات»، «گۇلستان» انسامبلدەرى جانە «بوزتورعاي» ۆوكالدىق ستۋدياسى قاتىسادى. قالانىڭ حورەوگرافيالىق ستۋديالارىنان 200-دەن استام بالانىڭ قاتىسۋىمەن «الماتى جۇرەگىمدە» مەرەكەلىك فلەشموبى ۇسىنىلادى.

ال Almaty Gallery كىشى زالىندا ساعات 12:00-دە جاس سۋرەتشى راۋانا ولجاستىڭ «مەنىڭ بالالىق شاعىمنىڭ پاليتراسى» اتتى جەكە كورمەسى اشىلادى. كورمە 15-ماۋسىمعا دەيىن اشىق بولادى.

باستاۋىش سىنىپ وقۋشىلارىنا ارنالعان تانىمدىق ءىس-شارا الماتى قالاسىنىڭ تاريحى مۇراجايىندا وتەدى. كۇنى بويى مۇندا «جاس ارحەولوگ» ويىنى ۇيىمداستىرىلادى، ونىڭ بارىسىندا بالالار ارحەولوگيا نەگىزدەرىمەن تانىسادى.

ارنايى مەرەكەلىك باعدارلاما قالالىق كىتاپحانالاردا دا وتەدى. 1- ماۋسىم كۇنى ساعات 10:00-دەن باستاپ ماحاتما گاندي اتىنداعى ساياباقتا №4 كىتاپحانانىڭ قاتىسۋىمەن «الماتى - باقىتتى بالالار قالاسى» اتتى اۋقىمدى مەرەكە باستالادى.

جامبىل اتىنداعى جاسوسپىرىمدەر كىتاپحاناسىندا №92 مامانداندىرىلعان ليتسەيدىڭ وقۋشىلارى ادەبي وقۋلارعا، بايقاۋلارعا جانە كوركەمدىك ءىس-شارالارعا قاتىسادى. 2 -ماۋسىمدا س. بەگالين اتىنداعى ورتالىق قالالىق بالالار كىتاپحاناسىندا تەاترلاندىرىلعان قويىلىممەن، شەبەرلىك سىنىپتارىمەن، فلەشموبپەن جانە حايۋاناتتار باعىمەن بايلانىستىراتىن «كىتاپ جازى» مەرەكەسى وتەدى.

1-ماۋسىمدا الماتى حايۋاناتتار باعىنىڭ بازاسىندا جازعى زووباق - 9 جاستان 16 جاسقا دەيىنگى وقۋشىلارعا ارنالعان ءبىلىم بەرۋ جوباسى جۇمىس ىستەي باستايدى. ساباقتار تەگىن نەگىزدە وتەدى جانە ونى حايۋاناتتار باعىنىڭ ماماندارى - زوولوگتار، ۆەتەرينارلار مەن پەداگوگتار جۇرگىزەدى. قاتىسۋ ءۇشىن «مەن نەلىكتەن حايۋاناتتار باعىندا وقىعىم كەلەدى» تاقىرىبىندا ەسسە جازۋ قاجەت بولدى.

ودان بولەك 1 -ماۋسىمدا مەرەكەلىك ءىس-شارالار قالانىڭ ءار اۋدانىندا وتەدى:

المالى اۋدانىندا ساعات 12:00-دە گاندي ساياباعىندا ويىندار، بايقاۋلار ۇيىمداستىرىلىپ، تاقىرىپتىق بالالار ءىس-شاراسى وتەدى.

الاتاۋ اۋدانىندا ساعات 11:00-دە زەردەلى سكۆەرىندە (زەردەلى شاعىن اۋدانى، 180ا) بالالارعا ارنالعان مەرەكەلىك ءىس-شارا: كونسەرت، سيرك شوۋى جانە انيماتورلاردىڭ قاتىسۋىمەن ءتۇرلى ينتەراكتيۆتى ءىس-شارالار وتەدى.

اۋەزوۆ اۋدانىندا ساعات 18:00-دە Family park-تا اشىق اسپان استىنداعى مۋلتفيلمنىڭ مەرەكەلىك كورسەتىلىمى بولادى.

بوستاندىق اۋدانىندا مەرەكەلىك ءىس-شارالار (كونسەرتتىك باعدارلاما، بالالار جارىسى، شەبەرلىك سىنىپتارى) تۇڭعىش پرەزيدەنت ساياباعىندا ساعات 10:00-دەن باستاپ وتەدى.

جەتىسۋ اۋدانىندا ساعات 10:00-دە قۇلاگەر شاعىن اۋدانىندا كونسەرتتىك باعدارلاما ۇيىمداستىرىلادى جانە انيماتورلاردىڭ قاتىسۋىمەن «Jetisu Fest» فەستيۆالى وتەدى.

تۇركسىب اۋدانىنداعى مەرەكە 10:00-دە سەيفۋللين داڭعىلى، 13/1 مەكەنجايداعى №6 وقۋشىلار ءۇيىنىڭ الدىندا وتەدى.

مەدەۋ اۋدانىندا ساعات 11:00-دە ورتالىق مادەنيەت جانە دەمالىس ساياباعىندا بالالاردى كونسەرتتىك باعدارلاما كۇتەدى.

ناۋرىزباي اۋدانىندا ساعات 18:00-دە اكىمدىك جانىنداعى امفيتەاتردا بالالارعا ارنالعان ويىن-ساۋىق باعدارلاماسى بار «اشىق اسپان استىنداعى كينو» كەشى وتەدى.

ەسكە سالايىق، مەملەكەت باسشىسى الماتىدا يتاليالىق ساۋدا ءۇيىن اشۋدى ۇسىندى.

اۆتور

دوسبول اتاجان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى