بالالار اراسىندا ىشەك اۋرۋلارى ءورشىپ تۇر
قازاقستاندا ىشەكتىڭ قابىنۋ اۋرۋلارى ءورشىپ بارادى. اسىرەسە، اتالعان دەرتكە بالالار ءجيى شالدىعىپ جاتىر.
بۇل تۋرالى كارديولوگيا جانە ىشكى اۋرۋلار عىلىمي زەرتتەۋ ينستيتۋتىندا وتكەن ىشەكتىڭ قابىنۋ اۋرۋلارى جونىندەگى رەسپۋبليكالىق كونفەرەنتسيادا ايتىلدى، دەپ حابارلايدى Kazinform.
دارىگەرلەر دابىل قاقتى. ەلدە ىشەكتىڭ قابىنۋ اۋرۋلارى بىرنەشە جىلدان بەرى ءورشىپ بارادى. ىشەكتىڭ سوزىلمالى پاتولوگيالارى جاسارىپ كەتكەن. بۇگىندە بالالار مەن جاسوسپىرىمدەر اتالعان دەرتكە ءجيى شالدىعادى.
«سوندىقتان سىرقاتتانۋشىلىقتىڭ ءوسۋى ەمدەۋ حاتتامالارىن جاڭارتۋدى، دارىگەرلەردىڭ ساپالى دايارلىعىن جانە بىلىكتىلىگىن ارتتىرۋدى تالاپ ەتەدى»، - دەيدى كارديولوگيا جانە ىشكى اۋرۋلار عزي باسقارما ءتوراعاسى مارات پاشيموۆ.
ىشەكتىڭ قابىنۋ اۋرۋلارى بويىنشا جەتەكشى مامان ءجاميلا قايبۋللايەۆانىڭ سوزىنشە، اۋرۋدى ءتيىمدى باقىلاپ جانە اسقىنۋلاردى ازايتۋ ءۇشىن اۋرۋدى ەرتە انىقتاۋ قاجەت.
«تەراپيا مەن اۋرۋدىڭ بارىسىن ۋاقتىلى باقىلاۋ ماڭىزدى. ءىقا بار پاتسيەنتتەردىڭ ءبىرىڭعاي بازاسىن قۇرۋ رەسپۋبليكا بويىنشا ءى ق ا اۋرۋى مەن تارالۋى تۋرالى ناقتى مالىمەتتەر الۋعا، سونداي- اق وڭىرلەردە اۋرۋدى انىقتاۋدى جاقسارتۋعا مۇمكىندىك بەرەدى»، - دەيدى دارىگەر.
ىشەكتىڭ قابىنۋ اۋرۋلارى جونىندەگى رەسپۋبليكالىق شاراعا گاستروەنتەرولوگ، كولوپروكتولوگ، ەندوسكوپيست، تەراپيەۆت، جالپى پراكتيكا جانە ساۋلەلىك دياگنوستيكا دارىگەرلەرى قاتىستى.
اۆتور
الما مۇقانوۆا
