بالا كەزىمنەن ءساندى كيىنگەندى جاقسى كورەمىن - 84 جاستاعى تيكتوكەر
تيكتوكەر اتا اتانعان تىلەۋعالي ساتىبالديەۆ - الەۋمەتتىك جەلىدە ادەمى كيىم ۇلگىلەرىن كورسەتىپ تانىمالدىلىققا يە بولعان بلوگەر اقساقال. بۇگىنگى تاڭدا ونىڭ روليكتەرىن 2 ميلليوننان اسا ادام قاراعان. سەكسەننىڭ سەڭگىرىنە شىققان قاريامەن Kazinform ءتىلشىسى سۇحباتتاسىپ قايتتى.
- تىلەۋعالي اتا، قازاقستاندىقتارعا ونىڭ ىشىندە جاستارعا تيكتوكەر رەتىندە تانىلدىڭىز. الەم قارايتىن جەلىدە جوعارى قارالىم جيناپ ءجۇرسىز، ۆيدەو ءتۇسىرىپ، ونى الەۋمەتتىك جەلىگە جۇكتەۋ ويىڭىزعا قالاي كەلدى؟
- تەگىن، كەزدەيسوق ەشتەڭە بولمايدى. ءار نارسەنىڭ ءوز باستاۋى بولادى. ەكى جىل بۇرىن قۇداي قوسقان جارىمنان ايىرىلىپ قالدىم. سوعان كوڭىلىم قۇلازىپ، جۇرەگىم سىزداپ ءجۇردى. بالا-شاعاعا كورسەتپەۋگە تىرىستىم. الايدا، نەمەرەلەرىم مەنىڭ مۇڭايىپ جۇرگەنىمدى كورىپ، كوڭىلىمدى اۋلاۋ ءۇشىن TikTok جەلىسىن ۇيرەتتى. وندا تانىمال بولامىن دەپ ويلامادىم. باستاپقىدا سالعان دۇنيەلەرىمدى ءبىر ميلليون، ارتىنشا ەكى ميلليون ادام قاراپتى. تاڭعالدىم. روليكتەردى مونتاجداۋعا نەمەرەم ماريام كومەكتەسەدى. الايدا، ماقساتىم - تانىمال بولۋ ەمەس، نەمەرە، شوبەرەلەرىمە قولداۋ كورسەتىپ، شابىت سىيلاۋ.
- ءسىز ءساندى كيىمدەردى تەك ءتۇسىرىلىم ءۇشىن عانا كيەسىز بە؟
- جاراسىمدى كيىنە ءبىلۋ دە ونەر. بۇل - كەز كەلگەن ادامنىڭ تالعامىنىڭ كورىنىسى. مەن بالا كەزىمنەن ءساندى كيىنگەندى جاقسى كورەمىن. ءبىزدىڭ كەزىمىزدە جاقسى كيىم تابۋ وڭاي ەمەس ەدى. وزىمنەن ۇلكەن اعالارىمنان قالعان شالبار، جەيدە، كوستيۋمدەرىن قىسقارتىپ، وزىمە شاقتاپ تىگىپ الاتىنمىن. مودا ءبىزدىڭ كەزدە دە بولدى، شىراعىم. تەلەديداردان كورگەنىمىزدى ساتىپ الا الماساق تا، تىگىپ الۋ قولىمىزدان كەلەتىن. ءساندى، وزگەشە كيىنىپ ءجۇرۋ ادەت بولىپ قالادى ەكەن. باستىسى، ەر ادامنىڭ ۇستىندەگى كيىمى تازا ءارى جاراسىمدى بولسا بولدى.
- تالعاممەن كيىنەتىن سىزگە ەرەكشە ستيلدەگى كيىمدى كىم تاڭداپ بەرەدى؟
- مەن كيىمدى ءوزىم تاڭدايمىن. وزىمە ۇناعانىن عانا كيەمىن. كەمپىرىم بولعان ۋاقىتتا دا كوپ كەڭەس بەرگەن جوق. مەن سىزگە ءبىر قۇپيامىدا اشايىن. ەرەكشە كيىمدى Second Hand دۇكەنىنەن الامىن. ول جەردە كيىلمەگەن كيىم دە ساتادى. ونداعى كەيبىر كيىمدەردى تانىمال، قىمبات ماگازيندەردەن دە تابۋ قيىن. ءبىراق، بۇل تۋرالى كوپ جەردە ايتپايمىن.
- الەۋمەتتىك جەلىلەردىڭ ارقاسىندا كينو مەن جارناماعا تۇسۋگە شاقىرتۋ الىپ جاتىر ەكەنسىز، راس پا؟
- ءيا. كوبىنە ەپيزودتىق كورىنىستەردە وينايمىن. «قارا بالا»، «كانيكۋلى» دەگەن فيلمدەرگە ءتۇستىم. جاقىندا «اكادەميا» دەپ اتالاتىن شەكاراشىلار تۋرالى سەريالعا شاقىردى. ءتۇسىرىلىم الماتىداعى اكادەميا قابىرعاسىندا ءوتتى. وندا ءبىر اقساقالدىڭ ءرولىن سومدادىم. وزىمە قاتتى ۇنادى. جاقسى ادامدارمەن تانىسىپ، جاستارمەن كوبىرەك سويلەسەسىڭ.
ايتپاقشى، 1966 -جىلدارى ستۋدەنت كەزىمدە ابدوللا قارساقبايەۆتىڭ «مازاسىز تاڭ» فيلمىندە ەپيزودتىق رولدە ويناعانىم بار. مەن ءى ءى م جۇيەسىندە جانە «دينامو» سپورت قاۋىمداستىعىندا مەملەكەتتىك قىزمەتتە جۇمىس ىستەگەن اداممىن. سپورتشىلار مەن ىشكى ىستەر ورگاندارىنىڭ قىزمەتكەرلەرىن دايىندادىم. ال قازىر زەينەتكەرمىن. بوس ۋاقىتىم كوپ.
- سەكسەنىڭ تورتەۋىنە كەلگەندە عالامتوردى دا قاپىسىز مەڭگەرىپ الدىڭىز. الەۋمەتتىك جەلىدە جەكە پاراقشاڭىز دا بار. سەرگەكسىز، شيراق قيمىلدايسىز. مۇنىڭ قۇپياسى نەدە؟
- بارلىق نارسەگە ەڭبەكتىڭ ارقاسىندا قول جەتكىزەسىڭ. جاقسى نارسە ويلاپ، جاقسى نارسەنى ارمانداۋ كەرەك. مەن سالاماتتى ءومىر سالتىن ۇستانامىن. كوپ جۇرەمىن، جاتتىعۋ جاسايمىن. تازا اۋادا سەرۋەندەيمىن. ساياباققا ءجيى بارامىن. جاس ەرەكشەلىكتەرىنە قاراماستان ادامدارمەن كوپ ارالاسۋعا تىرىسامىن. بوس ۋاقىتىمدى نەمەرە-شوبەرەگە ارنايمىن. بارى وسى.
- بۇكپەسىز اڭگىمەڭىزگە راقمەت. امان بولىڭىز!
اۆتور
الما مۇقانوۆا
