بالا اسىراپ العىسى كەلەتىندەرگە تالاپتار كۇشەيتىلمەك

- 2024-جىلعى 23-شىلدەدە ق ر كونستيتۋتسيالىق سوتى «نەكە جانە وتباسى تۋرالى» كودەكستىڭ 91-بابى 2-تارماعىنىڭ 11) تارماقشاسىن كونستيتۋتسياعا سايكەس ەمەس دەپ تانىدى. بۇل باپتا تىركەلگەن نەكەدە تۇرماعان (ەرلى-زايىپتى بولماعان) ەرلەرگە بالا اسىراپ الۋعا تىيىم سالىنعان ەدى. بۇل رەتتە، جىل سايىن بالالارعا قاتىستى قۇقىق بۇزۋ دەرەكتەرى كوبەيىپ كەلەدى. باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ مالىمەتىنشە، مۇنداي قۇقىق بۇزۋ ارەكەتتەرىنىڭ 99 پايىزىن ەر ادامدار جاسايدى. جوعارىدا ايتىلعانداردى ەسكەرە وتىرىپ، مينيسترلىك ەرلى-زايىپتىلارعا بالا اسىراپ الۋعا باسىمدىق قۇقىعىن بەرۋ ماسەلەسىن قاراستىرىپ جاتىر ما؟، - دەپ سۇرادى سەناتور نۋريا نيازوۆا.

ءوز كەزەگىندە وقۋ-اعارتۋ ۆيتسە-ءمينيسترى ەدىل وسپان كونستيتۋتسيالىق سوتتىڭ نورماتيۆتىك قاۋلىسىن ىسكە اسىرۋ اياسىندا مينيسترلىك جەتىم بالالار مەن اتا-اناسىنىڭ قامقورلىعىنسىز قالعان بالالاردى تاربيەلەۋدە ەرلى-زايىپتىلاردىڭ باسىمدىعىن كوزدەيتىن ءبىرقاتار زاڭنامالىق نورمالاردى ازىرلەگەنىن ايتتى.

- سونداي-اق ۇمىتكەرلەرگە قويىلاتىن تالاپتاردى قاتايتۋ بويىنشا شارالار كەشەنى ازىرلەندى. بۇل تۇرعىدا بالا اسىراپ الۋشى مەن اسىراۋعا بەرىلەتىن بالانىڭ جاس ايىرماشىلىعىن انىقتاۋ، بالا اسىراپ الۋشىنىڭ سوتتىلىعى تۋرالى اقپاراتتى جىل سايىن جاڭارتۋ، مىندەتتى پسيحولوگيالىق دياگنوستيكادان جانە اككرەديتتەلگەن ۇيىمدار ارقىلى ءتيىستى وقىتۋدان ءوتۋ ەسكەرىلگەن. ءقازىر بۇل تۇزەتۋلەر مەملەكەتتىك ورگاندارمەن كەلىسىلىپ جاتىر. وسى راسىمدەردەن كەيىن تۇزەتۋلەر پاكەتى پارلامەنت قاراۋىنا ەنگىزىلمەك، - دەپ ءتۇسىندىردى ۆيتسە-مينيستر.

بۇدان بۇرىن حابارلانعانداي، بيىل شىلدە ايىندا كونستيتۋتسيالىق سوت ەرلەر مەن ايەلدەر بالا اسىراپ العىسى كەلەتىندەردىڭ تىزىمىندە تەڭ دارەجەدە ەكەنىن جاريالادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى