باعدات مۋسين قازاقستانداعى ينتەرنەت ساپاسىن سۋدىڭ ساپاسىنا تەڭەدى
سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين Jibek Joly ارناسىنا بەرگەن سۇحباتىندا قازاقستانداعى ينتەرنەتتىڭ ساپاسىن سۋدىڭ ساپاسىنا تەڭەدى، دەپ حابارلايدى Kazinform.
«مىسالى، قازىر قاراعاندى قالاسىندا شاعىن اۋداندار بار. سۋ اعىزساڭ، ساپاسى ناشار. ءبىراق تۇرعىندار سول سۋعا اقشا تولەپ جاتىر عوي. ەندى وسىنداي زاڭسىزدىق بار»، - دەدى مينيستر.
ونىڭ مالىمەتىنشە، سوعان قاراماستان سۋمەن جابدىقتاۋشى ۇيىمدار ءتاريفتى كوتەرگەن.
«سوعان قاراماستان تاريفتى كوتەرىپ جاتىر. جۋىردا 1,5 ەسە كوتەردى. ونداي زاڭسىزدىق بار. مەن كەلىسەمىن. بىلاي ايتايىن. ءبىزدىڭ ءبىرىنشى ساتىداعى ماسەلەمىز - نارىقتى شىنىمەن نارىق ەتۋ. قازىر قاراساڭىز، «قازاقتەلەكومنىڭ» ىشىندە ەكى وپەراتور عانا بار. تولىققاندى نارىق قالىپتاسۋ ءۇشىن كەمىندە ءبىر- بىرىنەن تاۋەلسىز ءۇش وپەراتور باسەكەلەسىپ جۇمىس ىستەۋى كەرەك. سوندا عانا ءادىل تاريف، ءادىل ساپا، ءادىل قىزمەت كورسەتۋ بولادى. سوندىقتان ءبىز ۇكىمەتتىڭ اتىنان «سامۇرىق-قازىنانىڭ» الدىنا مىندەتتەمە قويدىق. «قازاقتەلەكومعا» تيەسىلى ءبىر وپەراتوردى ساتۋ كەرەك. ءبىر ينۆەستور تابا ما، شەتەلدەن بىرەۋ كەلە مە، قازاقستاندىقتاردان بىرەۋ تابا ما، اشىق اۋكسيونعا قويا ما، ءوزى بىلەدى. كەلەسى جىلدىڭ ورتاسىنا دەيىن وسىنى ورىنداۋ كەرەك»، - دەدى ۆەدومستۆو باسشىسى.
