باعدات مۋسين كاسپي بانىككە مەملەكەتتىك قىزمەتتەردى ەنگىزۋ يدەياسىن ءوزى ۇسىنعانىن جاريالادى

ءمينيستردىڭ ايتۋىنشا، كەيىنگى جىلدارى نەسيە الۋشىلاردىڭ كۇرت ارتۋى اتالعان پلاتفورمالارداعى سيفرلىق قۇجاتتارعا بايلانىستى ەمەس، دەپ حابارلايدى Kazinform.

جاقىندا مينيستر Jibek Joly تەلەارناسىنىڭ «ۋادە» باعدارلاماسىنا سۇحبات بەرگەن ەدى. باعدارلاما بارىسىندا جۋرناليست جەكە مالىمەتتەردى جەكەمەنشىك قارجىلىق ۇيىمدارعا (Kaspi.kz, Halyk پلاتفورمالارى) بەرۋ قانشالىقتى دۇرىس ەكەنى تۋرالى سۇراق قويدى.

سەبەبى موبيلدى قوسىمشانىڭ ىشىندە نەسيەنى دە الۋعا جانە جەكە ادامداردىڭ سيفرلىق قۇجاتتارىن دا قاراۋعا بولادى.

ياعني جۇيەدەگى قىزمەتتەر ىقپالداستىرىلعان.

ءوز كەزەگىندە مينيستر اتالعان پالاتفورمالارداعى مەملەكەتتىك قىزمەتتەرگە ءار ادام ءوزى شەكتەۋ قويا الاتىنىن ايتتى.

«Kaspi.kz — پلاتفورما. ءبىراز ادام ونى بانك دەپ سىناپ جاتادى. Kaspi.kz بانك ەمەس، پلاتفورما… ماسەلەن، eGov.kz قوسىمشاسىنا كىرگەن كەزدە «Kaspi.kz پلاتفورماسىنا سيفرلىق قۇجاتتار تۋرالى مالىمەتتەردى بەرۋگە رۇقسات بەرەسىز بە؟» دەگەن ساۋال بولادى. ءسىز اتالعان پلاتفورمادا قۇجاتتار تۋرالى دەرەكتەردىڭ بولۋىنا ءوزىڭىز رۇقسات بەرسەڭىز، ءدال سولاي وسى رۇقساتىڭىزدى كەرى قايتارىپ الۋعا بولادى. EGov.kz قوسىمشاسىندا ونداي مۇمكىندىك بار»، - دەدى ب. مۋسين.

ۆەدومستۆو باسشىسى eGov mobil- گە بۇل ءتارتىپ 2020 -جىلى ەنگىزىلگەنىن ناقتىلادى.

جۋرناليست كوپ ادامنىڭ اتالعان پلاتفورمالاردا سيفرلىق قۇجاتتارىنىڭ جاريالانۋىنا قالاي رۇقسات بەرگەنى ەسىندە جوق ەكەنىن ايتتى.

ونىڭ ايتۋىنشا، Kaspi.kz نەمەسە Halyk پلاتفورمالارىنىڭ قوسىمشاسىنا قوسىلعان كەزدە «مەملەكەتتىك قىزمەتتەر» دەگەن باتىرما بولادى.

«ءتيىستى سىلتەمەنى باسقان كەزدە، «eGov -قا وسى مالىمەتتەردى Kaspi.kz-كە كىرگىزۋگە رۇقسات بەرەمىن» دەگەن حابارلاما الاسىز. وسى باتىرمانى باسپاساڭىز، ءسىزدىڭ قۇجاتتار مەملەكەتتىك دەرەكقوردان باسقا پلاتفورمالاردا اشىلمايدى»، - دەدى ۆەدومستۆو باسشىسى.

ول قازاقستانداعى وسى تاجىريبەنى حالىقارالىق ۇيىمدار زەرتتەپ، دۇرىس باعىت ەكەنىن راستاعانىن ءمالىم ەتتى.

«شىنىن ايتايىن، يدەيا مەنىكى. حالىقارالىق دەڭگەيدە ءبىز وسىنى پاش ەتتىك. قازىر باسقا دا حالىقارالىق ۇيىمدار وسىنى زەرتتەپ، «بۇل - وتە دۇرىس باعىت» دەپ بىزگە باعا بەرىپ جاتىر. پلاتفورمالارعا شىعارۋ - مەنىڭ جەكە يدەيام. بۇل ۇسىنىستى باسقا ورگاندارمەن بىرگە تالقىلاپ، جۇزەگە اسىردىق. اتاپ ايتقاندا، بۇل تاجىريبە حالىقارالىق دەڭگەيدە وڭتايلى باعالانىپ، باسقا دا مەملەكەتتەر ىسكە اسىرۋعا بولاتىنىن ءتۇسىندى. رەسەي، وزبەكستان جانە باسقا دا ەلدەر وسىنى نۇسقاۋلىق رەتىندە الىپ وتىر»، - دەدى باعدات مۋسين.

مينيستر مۇنداي تاجىريبە ا ق ش- تا ىسكە اسىرىلماعانىن، ياعني ول مەملەكەتتە بازا دەرەكتەر قورى ورتالىقتاندىرىلماعىنىن جەتكىزدى.

«ويتكەنى ول جەردە فەدەراتيۆتى قۇرىلىمنىڭ ءتارتىبى بار. ءار شتات بۇل ماسەلەنى ءوزى شەشەدى. قازىر كاليفورنيادا وسىنداي شەشىم قابىلدانىپ وتىر. ولار Apple-گە بەرىپ جاتىر. ولاردىڭ پلافتورمالىق جۇيەسى بىزدەگى سياقتى بانك ارقىلى جۇرمەيدى، Apple, Facebook (Meta) سەكىلدى پلاتفورمالار ارقىلى ىسكە اسادى»، - دەيدى ول.

بۇل تۇرعىدا تەلەارنا جۋرناليسى Apple كومپانياسى نەسيە بەرمەيتىنىن جانە قارجىلىق ينستيتۋت ساناتىنا جاتپايتىنىن اتاپ ءوتتى.

دەگەنمەن باعدات مۋسين Kaspi.kz, Halyk پلاتفورمالارىنا جەكە كۋالىك دەرەكتەرىنىڭ جاريالانۋىنان بۇل بانكتەردىڭ نەسيە بەرۋ مۇمكىندىگى كۇرت ارتتى دەگەن ءۋاج قيسىنسىز ەكەنىن ايتتى.

«2021 -جىلعا دەيىن، ياعني جەكە كۋالىك دەرەكتەرى بۇل پلاتفورمالارعا شىققانعا دەيىن نەسيەنى 5 مينۋتتىڭ ىشىندە الۋ مۇمكىن بولدى ما؟ ونداي مۇمكىندىك بولدى، سەبەبى سول كەزدە كرەديتكە ۇيىمە ءتۇرلى تەحنيكا العان ەدىم. قازىر Kaspi.kz, Halyk Bank جانە باسقالارى وسى دەرەكتەردى الىپ، سونىڭ ارقاسىندا كرەديت بەرىپ جاتقانىنا سەنبەيمىن. نەگە؟ نەسيە الۋ ءۇشىن جەكە كۋالىكتەگى مالىمەت قاجەت ەمەس. بانكتەرگە بۇعان دەيىن نەشە رەت كرەديت العانىڭىز، جالاقى دەرەگى، بۇرىنعى نەسيەلەر بويىنشا تولەمدەردىڭ ۋاقىتىلى جاسالعانى تۋرالى اقپارات كەرەك. ال بۇل مالىمەتتەر بىزدە ەمەس، كرەديتتىك بيۋرودا جيناقتالعان. سوندىقتان پلاتفورماداعى ءبىزدىڭ اقپاراتىمىز - جەكە كۋالىكتىڭ بولۋى نەمەسە بولماۋى كرەديت بەرۋگە اسەر ەتپەيدى»، - دەدى مينيستر.

اۆتور

رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى