باعا، يپوتەكا، بولجام: 2025-جىلى تۇرعىن ءۇي نارىعىندا احۋال قانداي بولادى

قازاقستان قارجىگەرلەرى قاۋىمداستىعىنىڭ باس ساراپشىسى رامازان دوسوۆ: نارىق مەملەكەت قولداۋىنا تاۋەلدى بولىپ قالا بەرەدى

باعانىڭ ءوسۋى. تەڭگەنىڭ السىرەۋى تۇرعىن ءۇي باعاسىنا قىسىم جاسادى. سەبەبى، سونىڭ اسەرىنەن قۇرىلىس ماتەريالدارى قىمباتتاپ، جۇمىس كۇشىنە شىعىن ارتا ءتۇستى. قاڭتارداعى تۇرعىن ءۇي باعاسىنىڭ كۇرت كوتەرىلۋى وسى فاكتورعا تىكەلەي بايلانىستى.

تولەم قابىلەتتىلىگى. وسى ورايدا ءبىر ەسكەرەرلىك جايت - حالىقتىڭ تولەم قابىلەتىنىڭ تومەندەپ كەلە جاتقانى. 2024-جىلى حالىقتىڭ ناقتى تابىسى %3,6 عا ازايدى. بۇل ادامداردىڭ تۇرعىن ءۇي الۋ مۇمكىندىكتەرىن شەكتەيدى جانە مەملەكەتتىك جەڭىلدەتىلگەن يپوتەكا باعدارلامالارىنا كىرىپتار، تاۋەلدى ەتەدى. بيلىك ازىرشە مۇنداي باعدارلامالارعا قارجىلاندىرۋدى قىسقارتۋ جوسپارىن جاريالاعان جوق، زەينەتاقى جيناقتارىن پايدالانۋ مۇمكىندىگى دە ساقتالىپ وتىر. بۇل - باعانىڭ وسۋىنە ىقپال ەتەتىن جاعداي.

سالىقتىق وزگەرىستەر. سالىق سالاسىنداعى وزگەرىستەر — بۇل نارىققا ىقپال ەتەتىن جاناما فاكتورلار. ەگەر ققس نەمەسە ينفراقۇرىلىمدىق الىم ەنگىزىلسە، ول جاڭا قۇرىلىس نىساندارىنا اسەر ەتپەي قويمايدى. بۇل نارىققا قوسىمشا ينفلياتسيالىق قىسىم جاسايدى.

يپوتەكالىق مولشەرلەمەلەر. جوعارى ينفلياتسيا جاعدايىندا جانە ونىڭ ءورشي ءتۇسۋ قاۋپى سەيىلمەي تۇرعان قازىرگى تاڭدا ۇلتتىق بانك بازالىق مولشەرلەمەنى ايتارلىقتاي تومەندەتپەيدى. بۇل يپوتەكالىق نەسيە الۋ تىم قيىن بولىپ قالا بەرەتىنىن ءجان حالىقتىڭ كوپشىلىگى ءۇشىن قولجەتىمسىز بولاتىنىن بىلدىرەدى.

نەگىزگى ترەندتەر:

باعا وسە بەرەدى، ءبىراق حالىقتىڭ ساتىپ الۋ قابىلەتى ايتارلىقتاي ارتپايدى؛

مەملەكەتتىك باعدارلامالار شەشۋشى ءرول اتقارادى، ويتكەنى نارىقتاعى سۇرانىس سوعان بايلانىستى بولادى؛

جوعارى مولشەرلەمەلەردىڭ ساقتالۋىنا بايلانىستى بانكتىك يپوتەكا كوپشىلىككە قولجەتىمسىز بولادى.

قورىتىندىلاي كەلگەندە، 2025-جىلى تۇرعىن ءۇي ساتىپ الۋ كوپشىلىك ءۇشىن وڭايعا سوقپايدى، ال نارىق مەملەكەت قولداۋىنا تاۋەلدى بولىپ قالا بەرەدى.

ينۆەستيتسيا جانە تۇرعىن ءۇي نارىعىنىڭ حالىقارالىق ساراپشىسى ليەۆ تەتين: سۇرانىس سول بىلتىرعى دەڭگەيدە قالادى نە ازداپ وسەدى

رەكوردتىق كورسەتكىشتەر. 2024-جىلدى قورىتىندىلاساق، بۇل جىلى رەكوردتىق كورسەتكىش تىركەلدى: ەل بويىنشا 18960000 شارشى مەتر تۇرعىن ءۇي پايدالانۋعا بەرىلدى. بۇل - وتە جاقسى كورسەتكىش.

استانادا دا جاڭا رەكورد تىركەلدى - 4410000 شارشى مەتر.

جىل بويىندا جاسالعان ساتىپ الۋ- ساتۋ مامىلەلەرىنىڭ سانى 17 پايىز ءوسىپ، 433000 عا جەتتى. ماسەلەن، 2023-جىلى بۇل كورسەتكىش 372 مىڭ مامىلە شاماسىندا بولعان. ءبىز بۇل جەردە ساتىپ الۋ بەلسەندىلىگى قايتا قالپىنا كەلە باستاعانىن اڭعارامىز.

باعانىڭ ءوسۋى. 2024-جىل تۇرعىن ءۇي باعاسىنىڭ جالپى 10 پايىز كوتەرىلۋىمەن اياقتالدى.

بۇگىنگى تاڭدا وتكەن جىلدىڭ قورىتىندىسى بويىنشا مەگاپوليستەردەگى ورتاشا كورسەتكىش (شارشى مەتردىڭ باعاسى) مىنانداي:

الماتى - 750 مىڭ تەڭگە

استانا - 540 مىڭ تەڭگە

شىمكەنت - 420 مىڭ تەڭگە.

2025-جىلعا بولجام. بيىلعا جوسپارلانعان جاڭا جوبالار سانى از. بۇل ۇسىنىس سانىنىڭ تومەندەيتىنىن بىلدىرەدى. ۇكىمەت بيىل 19 ميلليون شارشى مەتردى پايدالانۋعا بەرىپ، الدىڭعى جىلعى كورسەتكىشتى قايتالاۋدى تاپسىرعانىمەن، مەنىڭ ويىمشا، كورسەتكىش تومەن بولادى. بالكىم 15, مۇمكىن 14 ميلليون شارشى مەتر دەڭگەيىندە بولار.

باعاعا اسەر ەتەتىن فاكتورلار. ءوز كەزەگىندە سۇرانىس سول بىلتىرعى دەڭگەيدە قالادى نە ازداپ وسەدى. بۇل نەنى بىلدىرەدى؟ قاي كەزدە دە ۇسىنىستىڭ ازايىپ، سۇرانىستىڭ ارتۋى باعانى كوتەرەتىن باستى فاكتور سانالادى.

ودان بولەك، بۇل سالا يمپورتقا تاۋەلدى. ءار شارشى مەتردىڭ 50 پايىز قۇرىلىس ماتەريالى شەتەلدەن وزگە ەلدىڭ ۆاليۋتاسىنا ساتىپ اكەلىنەدى. ال دوللاردىڭ باعامى ايتارلىقتاي تۇراقسىز، سوڭعى كەزدە بۇل ۆاليۋتا قىمباتتاپ كەتكەنىن كورىپ وتىرمىز. بۇل - شارشى مەتر باعاسىنىڭ وسۋىنە سەبەپ بولاتىن تاعى ءبىر فاكتور.

يپوتەكالىق نەسيە. ەكىنشى جاعىنان يپوتەكالاردىڭ كورسەتكىشى جىلدان جىلعا بار بولعانى 9 پايىزعا ارتىپ، اسا ءبىر جاقسى ءوسىم بايقالماي تۇر. 2024-جىلى جالپى يپوتەكالاردىڭ كولەمى 31 پايىز بولعان، بيىل وندا ازداعان ءوسىم تىركەلىپ، 35 پايىزدى كورسەتەدى دەپ ويلايمىن، ياعني يپوتەكالىق كرەديتتەۋ كورسەتكىشى از بولسا دا وسەدى.

بولجام. قورىتا كەلگەندە، سۇرانىستىڭ ءوسۋى، قۇرىلىستىڭ ءوزىندىڭ قۇنىنىڭ جوعارىلاۋى جانە ۇسىنىستىڭ تومەندەۋىنىڭ اسەرىنەن 2025-جىلى تۇرعىن ءۇي باعاسى 15 پايىز ارتادى دەپ بولجاپ وتىرمىز.

قازاقستان قۇرىلىسشىلار قاۋىمداستىعىنىڭ پرەزيدەنتى ۆيكتور ميكريۋكوۆ: بۇل جىلى نارىق بارىنشا تۋربۋلەنتتى بولادى

نارىقتاعى «كۇيزەلىستەر» . بۇل جىلى نارىق بارىنشا تۋربۋلەنتتى بولادى، سەبەبى تۇپكىلىكتى باعانى انىقتايتىن جاعدايلار ءالى تولىق قالىپتاسىپ بولعان جوق. الداعى ۋاقىتتا قۇرىلىس سالاسىندا بىرنەشە «كۇيزەلىس» بولۋى مۇمكىن. ونىڭ ءبىرى - بازالىق قۇنعا سالىق سالىنۋى. ەكىنشىسى - ينفراقۇرىلىمدىق الىمنىڭ ەنگىزىلۋى. بۇل ەكەۋى دە ەنگىزىلە مە، الدە ءبىرى عانا ەنگىزىلە مە، ول جاعى ناقتى ەمەس. تۇرعىن ءۇي باعاسى وسى ەكى تۇزەتۋدىڭ ەنگىزىلۋ-ەنگىزىلمەۋىنە تىكەلەي بايلانىستى قالىپتاسادى.

باعا، اسەر ەتەتىن فاكتورلار. بىلتىر شارشى مەتر باعاسى قاتتى وسكەن جوق. ءوسىم ايىنا 0,5 نەمەسە 1 پايىز شاماسىندا عانا بولدى. بۇل ينفلياتسياعا ساي وتە بايىپتى، لوگيكالىق ءوسىم سانالادى. بيىل بۇل سيفرلار وزگەرۋى مۇمكىن. وعان جوعارىدا اتاپ وتكەن ەكى فاكتور اسەر ەتەدى.

ودان بولەك، ءبىز ۇلتتىق ۆاليۋتا باعامىن دا ەسكەرۋىمىز كەرەك. تەڭگە قۇنسىزدانا تۇسسە نەمەسە نىعايسا، ول دا باعاعا اسەر ەتەدى. ەگەر ەشقانداي «كۇيزەلىس» بولماسا، ءوسىم وتكەن جىلعى دەڭگەيدە بولادى دەپ بولجايمىز. 0,5 نەمەسە 1 پايىز شاماسىنداعى ءوسىم - قالىپتى، زاڭدىلىقتارعا ساي ءوسىم دەر ەدىم.

قۇرىلىس كولەمى. بيىل پايدالانۋعا بەرىلەتىن شارشى مەتر كولەمى بىلتىرعىدان از بولمايدى دەپ سانايمىن. سەبەبى، بۇل كورسەتكىشتەردىڭ قالىپتاسۋى وسىدان ەكى- ءۇش جىل بۇرىن سالىنىپ باستالعان قۇرىلىس كولەمىنە بايلانىستى بەلگىلەنەدى. مىسالى، بىلتىرعى پايدالانۋعا بەرىلگەن نىسانداردىڭ قۇرىلىسى 2-3 جىل بۇرىن باستالعان. سوعان ساي بيىل بەرىلەتىن نىسانداردى سالۋ دا 2023-2024-جىلدارى باستالدى. سوندىقتان بيىلعى كورسەتكىش بىلتىرعىداي 19 ميلليون شارشى مەتر كولەمىندە بولادى دەپ كۇتىپ وتىرمىز.

ق ق س اسەرى. ءبىرىنشى جانە قايتالاما نارىقتاعى احۋالعا توقتالار بولساق، ولار ءبىر-بىرىمەن تىعىز بايلانىستى. جوعارىدا ايتقان «كۇيزەلىستەر» تۋرالى بولجامىمىز كەلسە، اتاپ ايتقاندا، ءبىرىنشى نارىققا 16 پايىز ق ق س سالىنسا، وندا جاڭا ۇيلەر بىردەن 14 پايىزعا قىمباتتايدى. وسىنىڭ ارتىنان ەكىنشى نارىقتاعى ۇيلەردىڭ دە باعاسى كوتەرىلەدى. سەبەبى، جاڭا ءۇي نەعۇرلىم قولجەتىمسىز بولسا، ەكىنشى نارىققا سۇرانىس ارتىپ، ونىڭ دا باعاسى وسەدى.

2025-جىلعا بولجام. قورىتا كەلگەندە، قوسىلعان قۇن سالىعى سالىنباسا، قۇرىلىس قارقىنى وسى باعىتىنان تانباسا، جىل سوڭىنا دەيىن باعا 9 پايىز شاماسىندا وسەدى دەپ وتىرمىز. سەبەبى، نارىقتا اسا ءبىر بەلسەندىلىك جوق.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى