ب ۇ ۇ قازاقستانعا بىتىمگەرلىك ميسسياعا جىلىنا 5 ميلليون دوللار تولەم جاسايدى
استانا. KAZINFORM - بۇگىن ءماجىلىستىڭ جالپى وتىرىسىندا «ب ۇ ۇ- نىڭ ءبولۋدى باقىلاۋ جونىندەگى كۇشتەرىنە (UNDOF) رەسۋرس ۇسىناتىن ق ر ۇكىمەتى مەن ب ۇ ۇ اراسىنداعى ءوزارا تۇسىنىستىك تۋرالى مەموراندۋمدى راتيفيكاتسيالاۋ تۋرالى» زاڭى مەن «2024 -جىلعى 14- اقپانداعى ب ۇ ۇ- نىڭ ءبولۋدى باقىلاۋ جونىندەگى كۇشتەرىنە (UNDOF) رەسۋرس ۇسىناتىن ق ر ۇكىمەتى مەن ب ۇ ۇ اراسىنداعى ءوزارا تۇسىنىستىك تۋرالى مەموراندۋمعا حاتتار الماسۋ نىسانىنداعى كەلىسىمدى راتيفيكاتسيالاۋ تۋرالى» زاڭى قابىلداندى.
زاڭ جوباسىمەن قورعانىس ءمينيسترىنىڭ ورىنباسارى شايح- حاسان جازىقبايەۆ تانىستىرا وتىرىپ حالىقارالىق شارت 2024 -جىلعى 19 - قاڭتارداعى «بىرىكەن ۇلتتار ۇيىمىنىڭ ميسسيالارىندا قاتىسۋ ءۇشىن قازاقستان رەسپۋبليكاسى قارۋلى كۇشتەرى بىتىمگەرشىلىك كونتينگەنتىن جىبەرۋ تۋرالى قازاقستان رەسپۋبليكاسىنىڭ پرەزيدەنتى قاسىم- جومارت توقايەۆتىڭ ۇسىنىسى تۋرالى» پارلامەنت قاۋلىسىن ىسكە اسىرۋ ءۇشىن قول قويىلعانىن ايتتى.
- ميسسياعا قاتىسۋ ءۇشىن قازاقستاندىق پەرسونالدى جانە مۇلىكتى ۇسىنۋدىڭ اكىمشىلىك، لوگيستيكالىق جانە قارجىلىق شارتتاردى بەلگىلەيتىن نەگىزگى مەموراندۋمعا 2024 -جىلعى 14-اقپاندا قول قويىلدى. قۇجات بىتىمگەرشىلىك وپەراتسيالارعا ءوز كۇشتەرىن بەرەتىن بارلىق ەلدەر ءۇشىن ورتاق ستاندارت. 2024 -جىلعى ناۋرىزدان بەرى 139 اسكەري قىزمەتشىلەر مەن 26 اسكەري تەحنيكادان تۇراتىن ۇلتتىق كونتينگەنت گولان بيىكتىگىندەگى بىتىمگەرشىلىك ميسسياعا قاتىستى. گولان بيىكتىگىندەگى ميسسيانىڭ ماقساتى يزرايل مەن سيريا اراسىنداعى تاتۋلىقتى قولداۋ، سونداي- اق يزرايل مەن سيريا اسكەرلەرىنىڭ ءبولىنۋىن باقىلاۋ مەن قاداعالاۋ، - دەدى شايح- حاسان جازىقبايەۆ ءماجىلىستىڭ جالپى وتىرىسىندا.
ونىڭ ايتۋىنشا، ب ۇ ۇ قازاقستاننىڭ اتالعان ميسسياعا قاتىسقانى ءۇشىن جىلىنا شامامەن 5 ميلليون ا ق ش دوللار تولەم جاسايدى. ونىڭ ىشىندە شامامەن 2,4 ملن اقش دوللارى جەكە قۇرام تولەمى، قالعان 2,6 ملن اقش دوللارى تەحنيكا، قارۋ- جاراق پەن مۇلىكتى جالعا الۋعا باعىتتالعان.
- ءار بىتىمگەر اسكەري قىزمەتشىگە ايىنا 1448 ا ق ش دوللار بولاتىن مولشەرلەمە بەكىتىلگەن. «قازاقستان رەسپۋبليكاسىنىڭ بىتىمگەرشىلىك قىزمەتى تۋرالى» زاڭعا سايكەس مەملەكەتتىڭ بىتىمگەرشىلىك وپەراتسياعا شىعىنىن وتەۋ تارتىبىندە ب ۇ ۇ بولىنەتىن قاراجات رەسپۋبليكالىق بيۋدجەت كىرىسىنە تۇسەدى. ب ۇ ۇ- مەن قارجىلىق ماسەلەلەردى رەتتەۋ ماقساتىندا مەموراندۋمعا قوسىمشا كەلىسىم جاسالىندى. جوبانى ب ۇ ۇ حاتشىلىعىمەن كەلىسۋ 9 اي ۋاقىت الدى، وتكەن جىلدىڭ سوڭىندا قول قويىلدى، - دەيدى ول.
سونداي-اق سپيكەر ب ۇ ۇ- دان تۇسەتىن تولەمدى ەكىگە بولىنەتىنىن ايتتى، ياعني ءبىر بولىگى اسكەري قىزمەتشىگە جالاقى رەتىندە تولەنەدى، ال مۇلىك، تەحنيكاعا تۇسەتىن قارجى مەملەكەتتىك بيۋدجەتكە تۇسەدى.
- قارالىپ جاتقان حالىقارالىق شارتتار حالىقارالىق بەيبىتشىلىك پەن قاۋىپسىزدىكتى قامتاماسىز ەتۋدى كوزدەيدى، سونداي- اق قازاقستان رەسپۋبليكاسىنىڭ زاڭدارىنان وزگەشە قاعيدالاردى بەلگىلەيدى، سوندىقتان ولار راتيفيكاتسيالانۋعا جاتادى. ب ۇ ۇ- نىڭ بىتىمگەرشىلىك ميسسيالارىنا قاتىسۋ ارقىلى حالىقارالىق جانە وڭىرلىك قاۋىپسىزدىكتى نىعايتۋعا قازاقستاننىڭ قوساتىن ۇلەسى مەملەكەتىمىزدىڭ بەدەلىن ارتتىرادى، - دەيدى ءمينيستردىڭ ورىنباسارى.
ەسكە سالا كەتسەك، سوڭعى 30 جىلدا ب ۇ ۇ قازاقستاندا ۇلتتىق، وڭىرلىك جانە جەرگىلىكتى دەڭگەيلەردە 400 دەن استام جوبانى ىسكە اسىردى.
