ب ق و- دا مۇزداي سۋ كەشكەن قۇتقارۋشى: ءبىز قاشاندا ەلمەن بىرگەمىز
ورال. KAZINFORM - باتىس قازاقستان وبلىسىندا سۋ تاسقىنىنا قارسى جۇمىستار جۇرگىزىلىپ جاتقانى بەلگىلى. سونىڭ بەل ورتاسىندا جۇرگەن قۇتقارۋشىلار ءوز قىزمەتىن جاۋاپكەرشىلىكپەن اتقارۋدا.
ب ق و ت ج دەپارتامەنتى قاراتوبە اۋدانىندا تۇرعىنداردى ەۆاكۋاتسيالاۋ كەزىندە مۇزداي سۋدى جاياۋ كەشىپ، تەحنيكاعا جول كورسەتىپ كەلە جاتقان قۇتقارۋشىلار تۋرالى بەينەجازبا جاريالادى.
Kazinform ءتىلشىسى سول بەينەتاسپاعا ءتۇسىپ قالعان قۇتقارۋشىلاردىڭ ءبىرى، ورال قالاسىنداعى №8 ءورت ءسوندىرۋ ءبولىمى باستىعىنىڭ ورىنباسارى، ازاماتتىق قورعاۋ مايورى ماناربەك سۇلتانوۆپەن اڭگىمەلەستى.
ءوزىنىڭ ايتۋىنشا، ورال قالاسىنان قاراتوبە اۋدانىنا 27 -ناۋرىز كۇنى تاڭعى ساعات 04.00-دە 26 ادام ەكى «كاماز»، ءبىر «ۋاز»، 1 «نيۆا شيەۆرولە»، 1 تەمىر قايىق جانە 1 تىركەمەلى موتوپومپامەن شىققان.
- ساعات 09.00 شاماسىندا قاراتوبەگە جەتىپ، ءۇش توپقا بولىندىك. ءبىز شالعىن ەلدى مەكەنى ماڭىنداعى وزەندە مۇز كەپتەلىسى بار دەگەن سوڭ سوعان باردىق. ءبىر كۇن قونىپ، جاعدايدى ۇدايى باقىلاپ وتىردىق. 28-ناۋرىز كۇنى وزەن دەڭگەيى تۇسكەن سوڭ تۇسكە تامان اۋدان ورتالىعى قاراتوبە اۋىلىنا كەرى شىقتىق. شوپتىكول اۋىلى تۇسىندا قاراتوبە-جىمپيتى جولىن سۋ باسىپ كەتكەن ەكەن.
- ءسوزىڭدى بولەيىن، بەينەتاسپاداعى سۋ كەشىپ كەلە جاتقان ەكى ادامنىڭ بىرەۋى ءوزىڭ بە؟
- ءيا، مەن، ەكىنشىسى - № 8 ءورت ءسوندىرۋ ءبولىمىنىڭ بولىمشە كومانديرى، ازاماتتىق قورعاۋ اعا سەرجانتى قۋانىش قۇمارشيەۆ. ەكەۋمىز تەحنيكانىڭ الدىنان جول كورسەتىپ جۇردىك. قالادان وتادان كەيىن ەر ادام جەدەل جاردەم كولىگىمەن قايتىپ كەلە جاتىر ەكەن. سونداي-اق «ATAMEKEN» پارتياسى ب ق و فيليالىنىڭ ۇيىمداستىرۋىمەن قاراتوبەگە گۋمانيتارلىق كومەك (ءدارى-دارمەك، ازىق-تۇلىك، جىلى كيىم) تيەلگەن اۆتوكولىك، قالاعا جارىسقا بارا جاتقان بالالار بار. ءۇش رەت سولاي جاياۋ ءجۇرىپ وتتىك. كەيىن سۋعا كەتكەن قورجىن اۋىلىنان ەۆاكۋاتسيالانعان تۇرعىنداردى كوشىردىك. بارلىعى 150-دەي ادامنىڭ سۋدان امان وتۋىنە جاردەمدەستىك. سونىڭ ىشىندە 80-دەيى - بالالار.
- ال سۋرەتتە بەينەلەنگەن ءۇشىنشى ادام كىم؟
- ب ق و ت ج دەپارتامەنتى ءورت ءسوندىرۋ جانە اۆاريالىق قۇتقارۋ جۇمىستارىن ۇيىمداستىرۋ ءبولىمىنىڭ باستىعى، ازاماتتىق قورعاۋ مايورى رۋستام قۇباشيەۆ.
- تۇرعىنداردى ەۆاكۋاتسيالاۋعا اتسالىسقان باسقا دا قۇتقارۋشىلار بار شىعار؟
- ارينە، مەن ءوز توبىمدى ايتا كەتەيىن. قاراۋىل باستىعى، ازاماتتىق قورعاۋ لەيتەنانتى ەلدار وپيەۆ، اعا نۇسقاۋشى، ازاماتتىق قورعاۋ ستارشيناسى ازامات نۇربەكوۆ، ءورت سوندىرۋشىلەر، ازاماتتىق قورعاۋ كىشى سەرجانتتارى ميرلان ەلۋبايەۆ، ەرنۇر ءسادىقۇلوۆ، داۋلەت ماكسيموۆ.
- سۋ سالقىن شىعار؟
- ءيا، ءبىز جىلىنىپ الىپ، كەزەكپەن اۋىسىپ جۇمىس ىستەدىك. 29-ناۋرىز كۇنى كەشكە سونالى اۋىلى جاقتان ادامدار قاراتوبەگە جەتە الماي جاتىر دەگەن حابار كەلدى. جولدى سۋ باسىپ كەتكەن. تۇنگى ساعات 22.00-دە شىعىپ، سونالىدان جاعدايى اۋىر ادامدى الىپ كەلە جاتقان جەدەل جاردەم كولىگىن وتكىزدىك. بۇل جولى ءبىزدىڭ الدىمىزدان قاراتوبە اۋىلىنداعى № 18 ءورت ءسوندىرۋ ءبولىمىنىڭ قىزمەتكەرلەرى، ازاماتتىق قورعاۋ كىشى سەرجانتتارى مەيىربەك تىلەكقابىلوۆ پەن قايسار عابدوللايەۆ ءجۇرىپ وتىردى. ودان بولەك ىشىندە 4 بالا، 1 اياعى اۋىر كەلىنشەك بار، 27 ادامدى قاراتوبەگە جەتكىزدىك.
- مۇنداي جاعداي قىزمەت بابىندا ءجيى بولا ما؟
- جىل سايىن ءتۇرلى وقيعالارعا تاپ بولامىز. مىسالى، سۋ تاسقىنى كەزىندە ادامداردى قايىقپەن وتكىزەمىز. مالدى قاۋىپسىز جەرگە شىعارامىز. وزەندەردە مۇز كەپتەلىسى بولعان كەزدە سونىڭ ورتاسىنا شىعىپ، اعىستى جىبەرۋ ءۇشىن تەمىر سۇيمەنمەن ويامىز. قايسىبىرىن ايتۋعا بولادى، ءار ءتۇرلى جاعداي بويىنشا شىعىپ تۇرامىز.
- ءبىر جاعىنان قاتەرلى، ءبىر جاعىنان قۇرمەتتى، وسى ماماندىقتى تاڭداۋعا نە تۇرتكى بولدى؟
- وعان سەبەپشى بولعان اتا-انام دەر ەدىم. اكەم جۇماگەلدى سۇلتانوۆ اقتوبەدە تاس زاۋىتىندا، انام ماعريپا ورالداعى «زەنيت» زاۋىتىندا جۇمىس جاسايدى. قاراپايىم ەڭبەك ادامدارى. ءوزىم ورال قالاسىنداعى № 45 مەكتەپتىڭ تۇلەگىمىن. 2008 -جىلى كوكشەتاۋ قالاسىنداعى مالىك عابدۋللين اتىنداعى ازاماتتىق قورعاۋ اكادەمياسىنا ءتۇسىپ، 2012 -جىلى ءبىتىرىپ شىققاننان كەيىن وسى قىزمەتتەمىن.
- سەندەردىڭ قىزمەت ۋاقىتتارىڭدا شەكتەۋ جوق شىعار؟
- كەيدە 6-7 كۇنگە دەيىن ءۇي كورمەي كەتەمىز. جاعدايعا قاراي كەش جاتىپ، ەرتە تۇرامىز. مىسالى، بۇگىن تۇندە ساعات 02.00-دە ۇيقتاپ، 04.30-دا قايتادان كۇزەتكە شىقتىق. قاراتوبە اۋىلىنداعى جەرگىلىكتى كوللەدجدىڭ جاتاقحاناسىندا ورنالاسقانبىز.
- ءۇي دەمەكشى، ءوز وتباسىڭ تۋرالى ءبىر-ەكى اۋىز ءسوز ايتا كەتسەڭ؟
- كەلىنشەگىم گۇلىم قايرات قىزى وبلىستىق پوليتسيا دەپارتامەنتىندە جۇمىس ىستەيدى، قازىر ءسابي كۇتىمىمەن وتىر. قىزىم 11-دە، ۇلىم 10-دا. بيىلعى اقپاندا تاعى ءبىر ۇل بالامىز ومىرگە كەلدى. گۇلىمنىڭ ءوزى دە قۇقىق قورعاۋ سالاسىندا بولعاننان كەيىن مەنىڭ قىزمەتىمدى جاقسى تۇسىنەدى، ۇنەمى قولداۋ كورسەتىپ وتىرادى.
- وسىنداي قيىن قىزمەتتە بولعاننان كەيىن ءوزىڭدى بابىڭدا ۇستاۋ ءۇشىن سپورتپەن دە اينالىساسىڭ با؟
-تاپ سولاي. قول تيگەندە، سپورت زالىنان تابىلامىز. جارىستارعا قاتىسامىز. ايتالىق، بيىل ۇلىستىڭ ۇلى كۇنى - ناۋرىز مەرەكەسىنە وراي كۇش قۇرىلىمدارى اراسىندا فۋتزالدان باتىس قازاقستان وبلىسى اكىمىنىڭ اۋىسپالى كۋبوگى ءۇشىن وتكىزىلگەن تۋرنيردە جەڭىمپاز اتاندىق.
ءسوزىمنىڭ سوڭىندا ايتارىم، ءبىز قاشاندا ەلمەن بىرگەمىز. حالقىمىز بۇل قيىندىقتان دا وتەر، تەك باس اماندىعىن بەرسىن دەيمىن.
قاراتوبە اۋدانىنىڭ تۇرعىنى الىبەك ماقسوتوۆ ەلدىڭ اتىنان بىرنەشە كۇننەن بەرى تىنباستان ءوز قىزمەتىن اتقارىپ جاتقان قۇتقارۋشىلارعا ريزاشىلىعىن ءبىلدىردى.
«جىگىتتەرگە راحمەت. ەر وسىنداي سىن ساعاتتا سىنالادى. سۋىق سۋدى جاياۋ كەشىپ كەلە جاتىرسىڭدار. حالىق سەندەرگە وتە ريزا. امان جۇرىڭدەر» دەدى ءا. ماقسوتوۆ.
ەسكە سالا كەتەيىك، بۇدان بۇرىن باتىس قازاقستاندا تاعى ءبىر اۋىل تۇرعىندارىن ەۆاكۋاتسيالاۋ جۇرگىزىلىپ جاتقانىن جازعان بولاتىنبىز.
اۆتور
عايساعالي سەيتاق
