ب ق و-دا جانتۇرشىگەرلىك جول اپاتىنان قازا تاپقان 6 ادام ءبىر وتباسىنىڭ مۇشەلەرى
باتىس قازاقستان وبلىسىندا جانتۇرشىگەرلىك جول اپاتىنان قازا تاپقان 6 ادام ءبىر وتباسىنىڭ مۇشەلەرى بولعان، دەپ حابارلايدى قازاقپارات ءتىلشىسى.
قازاقپارات بۇدان بۇرىن جازعانداي، 17-قىركۇيەك كۇنى شامامەن ساعات 19.30-دا تەرەكتى اۋدانى اۋماعىندا «Lada Priora» DAF جۇك كولىگىمەن سوقتىعىسىپ، سالدارىنان 6 ادام قازا تاپقان بولاتىن.
ب ق و پوليتسيا دەپارتامەنتى باستىعىنىڭ ءبىرىنشى ورىنباسارى، پوليتسيا پولكوۆنيگى جانبولات جانشيننىڭ ءمالىم ەتكەنىندەي، قايعىلى وقيعادان كوز جۇمعاندار - ەرلى-زايىپتىلار مەن ولاردىڭ ءتورت بالاسى.
ونىڭ سوزىنە قاراعاندا، وقيعاعا جۇرگىزۋشىنىڭ جول ەرەجەسىن ساقتاماۋى سەبەپ بولعان. اتاپ ايتقاندا، «Lada Priora» جەڭىل كولىگى قارسى بەتكە شىعىپ كەتكەن.
«انىقتالعانداي، جەڭىل كولىكتىڭ تەجەگىشىن باسقان ءىزى قالماعان. بۇل جەردە جۇرگىزۋشى ۇيىقتاپ كەتكەن، الدە سويلەسىپ، ءبىر نارسەگە الاڭداعان با، ايتەۋىر بايقاماي، جۇك كولىگىمەن تۇيىسكەن. بۇدان ەكى جىل بۇرىن ورال قالاسىندا زاچاگان كەنتىندە اينالما جولدا ەكى اۆتوكولىك سوقتىعىسىپ، 8 ادام كوز جۇمعان ەدى. وندا دا ءبىر وتباسى مۇشەلەرى قايتقان بولاتىن. جول ەرەجەسىن ساقتاۋ كەرەكتىگىن جۇرگىزۋشىلەردىڭ ەسىنە سالامىز. ولار اۆتوكولىكتەگى جولاۋشىلاردىڭ ءومىرى ءۇشىن دە جاۋاپتى ەكەندىگىن ۇمىتپاۋى كەرەك. ورنى تولماس قايعىلى وقيعاعا بايلانىستى مارقۇمداردىڭ تۋما-تۋىستارىنا كوڭىل ايتامىز»، دەدى ج. جانشين.
ب ق و دەپارتامەنتىنەن تۇسكەن مالىمەتكە قاراعاندا، جىل باسىنان بەرى وبلىستا 270 جول-كولىك وقيعاسى (وتكەن جىلى وسى مەرزىمدە - 213) بولىپ، سونىڭ سالدارىنان 59 ادام (68) مەرت بولىپ، 344 ى (262) ءتۇرلى جاراقات العان.
