ب ۇ ۇ-نىڭ ۇلتتار ليگاسى تاعدىرىن قايتالاۋ قاۋپى بار- ماۋلەن اشىمبايەۆ
استانا. KAZINFORM - بىرىككەن ۇلتتار ۇيىمىنىڭ ۇلتتار ليگاسى تاعدىرىن قايتالاۋ قاۋپى بار. مۇنداي پىكىردى سەنات ءتوراعاسى ماۋلەن اشىمبايەۆ «ۆرەميا» گازەتىندە جاريالانعان ماقالاسىندا ءبىلدىردى.
- الەم ىندەتتەن جاڭارىپ شىقتى - ءبىزدىڭ كوز الدىمىزدا جاڭا ءداۋىر پاراديگماسى قالىپتاسىپ كەلەدى. ونىڭ ايقىنداۋشى ترەندتەرى قانداي بولاتىنىن بولاشاق كورسەتەدى. ءبىراق جاڭا زامانعا ءتان كەيبىر بەلگىلەر قازىردىڭ وزىندە ايقىن، - دەدى ول.
سەنات ءتوراعاسىنىڭ اتاپ وتۋىنشە، ولاردىڭ ءبىرى - جاھاندانۋ داعدارىسى جانە ونىڭ جاڭا پرينتسيپتەرگە قايتا فورماتتالۋى. بۇل الەمدىك ينتەگراتسيا قارقىنىنىڭ باياۋلاۋى، ۇلتشىلدىقتىڭ كۇشەيۋى، پروتەكسيونيزمنىڭ ارتۋى، ەركىن ساۋدا پرينتسيپتەرىنەن الشاقتاۋ مەن ساۋدا سوعىستارى اياسىنداعى گەوساياسي شيەلەنىستەن كورىنەدى.
- بۇل پروتسەستىڭ ءبىر بولىگى مۇشە مەملەكەتتەر تاراپىنان سەنىم دەڭگەيىنىڭ تومەندەۋى مەن جاھاندىق ماسەلەلەردى شەشە الماۋىنان كورىنەتىن جەتەكشى حالىقارالىق ينستيتۋتتاردىڭ داعدارىسى بولدى. ءبىر كەزدەردەگى بەدەلدى ب ۇ ۇ قازىرگى جاعدايىندا ۇلتتار ليگاسىنىڭ تاعدىرىن قايتالاۋ قاۋپى بار. دۇنيەجۇزىلىك دەنساۋلىق ساقتاۋ ۇيىمى پاندەميا سىناقتارىنا توتەپ بەرە المادى جانە دونالد ترامپ بيلىككە كەلگەننەن كەيىن ا ق ش ۇيىمنان شىعاتىنىن جاريالادى. دۇنيەجۇزىلىك ساۋدا ۇيىمى گەوساياسي قاقتىعىستار جاعدايىندا ەلدەر اراسىنداعى داۋلاردى شەشۋدىڭ تورەشىسى رەتىندە تيىمسىزدىگىن كورسەتىپ وتىر، - دەپ اتاپ وتەدى ماۋلەن اشىمبايەۆ.
وسىعان دەيىن پارلامەنت سەناتىنىڭ ءتوراعاسى ماۋلەن اشىمبايەۆ قازاقستان پرەزيدەنتى قاسىم-جومارت توقايەۆتىڭ وتاندىق بيزنەس وكىلدەرىمەن كەزدەسۋىندە ايتقان ۇستانىمدارىنا قاتىستى پىكىر ءبىلدىردى.
