ب ج ز ق اكتيۆتەرى 21,8 تريلليون تەڭگەگە جەتتى
استانا. KAZINFORM - ەل تۇرعىندارى بيىل زەينەتاقى قورىنان 495,3 ميلليارد تەڭگە قارجىسىن مەرزىمىنەن بۇرىن الدى. بۇل تۋرالى بۇگىن ۇكىمەت وتىرىسىندا ۇلتتىق بانك ءتوراعاسى تيمۋر سۇلەيمەنوۆ ايتتى.
- ءبىرىڭعاي جيناقتاۋشى زەينەتاقى قورىنىڭ اكتيۆتەرى وڭ ديناميكانى كورسەتىپ جاتىر. جىلدىڭ باسىنان زەينەتاقى اكتيۆتەرى 22,7 پايىزعا ءوسىپ، 21,8 تريلليون تەڭگە بولدى. جىل باسىنان ينۆەستيتسيالىق تابىس كولەمى 2,8 تريلليون تەڭگە بولدى. زەينەتاقى جارنالارى 2,3 تريلليون تەڭگەگە جەتتى جانە بىلتىرعى جىلمەن سالىستىرعاندا 19 پايىزعا ۇلعايدى. قاراجاتتى مەرزىمىنەن بۇرىن الۋ سوماسى 495,6 ميلليارد تەڭگەنى قۇرادى، - دەدى ۇلتتىق بانك ءتوراعاسى.
تيمۋر سۇلەيمەنوۆتىڭ اتاپ وتۋىنشە، ۇلتتىق بانك سىرتقى جانە ىشكى نارىقتارداعى جاعدايدىڭ وزگەرۋىن باقىلاپ، ماكروەكونوميكالىق تۇراقتىلىقتى قامتاماسىز ەتۋدى جانە ينفلياتسيانى ودان ءارى تومەندەتۋ جۇمىسىن جالعاستىرادى.
