ب ۇ ۇ باس حاتشىسى رەسەي مەن ۋكراينانىڭ قارا تەڭىزگە قاتىستى كەلىسىمدەرىن قۇپتايدى
استانا. KAZINFORM - انتونيو گۋتەرريش ساۋد ارابياسىنداعى ساراپشىلار كەزدەسۋىنەن كەيىن مالىمدەمە جاسادى. بۇل تۋرالى انادولى سايتى جازدى.
بىرىككەن ۇلتتار ۇيىمىنىڭ باس حاتشىسى انتونيۋ گۋتەرريش رەسەي مەن ۋكراينا اراسىنداعى قارا تەڭىزدە كەمە قاتىناسى ەركىندىگى تۋرالى كەلىسىمگە قاناعاتتانعانىن ايتتى.
- باس حاتشى امەريكا قۇراما شتاتتارى، رەسەي فەدەراتسياسى جانە ۋكراينانىڭ ساۋد ارابياسىندا قول جەتكىزگەن كەلىسسوزدەرى مەن مىندەتتەمەلەرىن قۇپتايدى، - دەدى ب ۇ ۇ باسشىسى ۇيىمنىڭ باسپا ءسوز قىزمەتى تاراتقان مالىمدەمەدە.
ايماقتان جاھاندىق نارىقتارعا شىعاتىن ساۋدا جولدارىنىڭ ماڭىزدىلىعىن ەسكە سالدى.
- ازاماتتىق كەمەلەر مەن پورت ينفراقۇرىلىمىن قورعاۋدى قامتاماسىز ەتۋ ءۇشىن قارا تەڭىزدە ءجۇزۋ ەركىندىگى تۋرالى كەلىسىمگە قول جەتكىزۋ جاھاندىق ازىق-تۇلىك قاۋىپسىزدىگى مەن جەتكىزۋ تىزبەگىنە ماڭىزدى ۇلەس بولادى، - دەدى گۋتەرريش.
ۇيىم باسشىسى ب ۇ ۇ- نىڭ بۇل ماسەلەمەن ۇزاق ۋاقىت اينالىسىپ كەلە جاتقانىن جانە 2024-جىلدىڭ 7-اقپانىندا تۇركيا پرەزيدەنتى رەجەپ تايىپ ەردوعانعا، رەسەي پرەزيدەنتى ۆلاديمير پۋتينگە جانە ۋكراينا پرەزيدەنتى ۆلاديمير زەلەنسكيگە قارا تەڭىزدە قاۋىپسىز جانە ەركىن ءجۇزۋ تۋرالى ۇسىنىسپەن حات جولداعانىن ەسكە سالدى.
بىرىككەن ۇلتتار ۇيىمى وسى باعىتتا جۇيەلى جۇمىسىن جالعاستىرىپ وتىر، دەلىنگەن مالىمدەمەدە.
ب ۇ ۇ سونداي-اق ازىق-تۇلىك قاۋىپسىزدىگىنىڭ جاھاندىق ماسەلەلەرىن شەشۋ ءۇشىن رەسەيلىك ازىق-تۇلىك ونىمدەرى مەن تىڭايتقىشتارىنىڭ الەمدىك نارىقتارعا شىعۋىن جەڭىلدەتۋ ماقساتىندا رەسەي فەدەراتسياسىمەن ءوزارا تۇسىنىستىك تۋرالى مەموراندۋمدى ودان ءارى ىسكە اسىرۋعا قاتىسۋدى جالعاستىرا بەرمەك.
- باس حاتشىنىڭ ىزگى قىزمەتتەرى بەيبىتشىلىككە قول جەتكىزۋگە باعىتتالعان بارلىق كۇش-جىگەردى قولداۋعا دايىن، - دەلىنگەن حابارلامادا.
ب ۇ ۇ باسشىسى مۇنداي كۇش-جىگەردىڭ اتىستى توقتاتۋعا جول اشىپ، ب ۇ ۇ جارعىسىنا، حالىقارالىق قۇقىققا جانە «ۋكراينانىڭ تاۋەلسىزدىگى، ەگەمەندىگى مەن اۋماقتىق تۇتاستىعىنا تولىق قۇرمەتپەن» سايكەس قارارلارىنا «ءادىل، جان-جاقتى جانە ۇزاق بەيبىتشىلىككە قول جەتكىزۋگە ىقپال ەتەتىنىنە» ءۇمىتتى ەكەنىن ايتتى.
ەسكە سالا كەتەيىك، بۇعان دەيىن ب ۇ ۇ باسشىسى ايەلدەردىڭ قۇقىقتارىن قورعاۋ ءۇشىن ارەكەت ەتۋگە شاقىردى.
