ب ۇ ۇ پالەستينا ماسەلەسىن تالقىلادى
استانا. KAZINFORM - ب ۇ ۇ قاۋىپسىزدىك كەڭەسىنىڭ تاياۋ شىعىستاعى قاقتىعىسقا قاتىستى بارلىق مۇشە مەملەكەتتەردىڭ قاتىسۋىمەن وتكەن كەڭەيتىلگەن وتىرىسىندا ب ۇ ۇ باس حاتشىسى انتونيۋ گۋتەرريش كەز-كەلگەن تاراپتىڭ ەكى مەملەكەت تۋرالى شەشىم قابىلداۋدان باس تارتۋى ءۇزىلدى-كەسىلدى قابىلدانباۋى كەرەكتىگىن ايتتى، دەپ جازادى امەريكا داۋىسى.
انتونيۋ گۋتەرريش يزرايل-پالەستينا قاقتىعىسىن ەكى مەملەكەتتىڭ تىرشىلىك ەتۋ پرينسيپى نەگىزىندە شەشىم قابىلداۋ ارقىلى عانا توقتاتۋعا بولاتىنىن ايتتى.
- يزرايلدىكتەر وزدەرىنىڭ زاڭدى قاۋىپسىزدىك قاجەتتىلىكتەرىنىڭ قالاي جۇزەگە اسىرىلاتىنىن، ال پالەستينالىقتار تولىعىمەن تاۋەلسىز، ومىرشەڭ ءارى ەگەمەن مەملەكەت قۇرۋعا دەگەن زاڭدى ۇمتىلىستارىنىڭ ب ۇ ۇ قارارلارىنا، حالىقارالىق قۇقىققا جانە الدىڭعى كەلىسىمدەرگە سايكەس قالاي جۇزەگە اسىرىلاتىنىن كورۋى كەرەك، - دەدى ب ۇ ۇ باس حاتشىسى.
پالەستينا سىرتقى ىستەر ءمينيسترى رياد ءال-ماليكي بىرىككەن ۇلتتار ۇيىمىنىڭ پالەستينا مەملەكەتىن مويىندايتىن ۋاقىتى كەلگەنىن ايتتى.
- 75 جىل بۇرىن يزرايلدى بىرىككەن ۇلتتار ۇيىمىنا قابىلداعان كەزدە ءبىز ۆەتو قۇقىعىنا يە بولمادىق. 75 جىلدان كەيىن يزرايلدىڭ پالەستينا مەملەكەتىن قابىلداۋعا ۆەتو قۇقىعى جوق، - دەدى رياد ءال-ماليكي.
ونداعان جىلدارعا سوزىلعان تاياۋ شىعىستاعى قاقتىعىستى تالقىلاۋ ماقساتىنداعى ءىرى كەزدەسۋ ب ۇ ۇ قاۋىپسىزدىك كەڭەسىندە جىلىنا ءتورت رەت وتەدى جانە بارلىق مۇشە ەلدەردىڭ قاتىسۋى ءۇشىن اشىق.
بۇل كەزدەسۋدە 50 دەن استام ەلدىڭ سىرتقى ىستەر ءمينيسترى ءسوز سويلەيدى دەپ جوسپارلانعان.
