ب ا ءا ءوز تاريحىنداعى ەڭ ءىرى اسكەري پارادتى وتكىزدى: 23 مىڭ اسكەري قىزمەتكەر مەن 2 مىڭ تەحنيكا
استانا. KAZINFORM - بىرىككەن اراب امىرلىكتەرى ءوزىنىڭ ۇلتتىق كۇنىن ەل تاريحىنداعى ەڭ ۇلكەن اسكەري شەرۋمەن اتاپ ءوتتى. بۇل تۋرالى WAM حابارلادى.
بۇل شارا امىرلىكتىڭ قۇرىلعانىنا 53 جىل تولۋىنا، سونداي-اق اسكەري قىزمەت تۋرالى زاڭنىڭ قابىلدانعانىنا 10 جىل تولۋىنا بايلانىستى وتكىزىلگەنى اتاپ ءوتىلدى. پارادتى ب ا ءا پرەمەر-ءمينيسترى جانە دۋباي بيلەۋشىسى شەيح مۇحاممەد بەن راشيد ءال ماكتۋم جۇرگىزدى.
سونىمەن قاتار، شاراعا ەلدىڭ ۆيتسە-پرەزيدەنتى شەيح مانسۋر بەن زايد ءال ناحايان مەن دۋبايدىڭ تاق مۇراگەرى، قورعانىس ءمينيسترى شەيح حامدان بەن مۇحاممەد ءال ماكتۋم قاتىستى.
شەرۋ ابۋ-دابي مەن دۋباي شەكاراسىنداعى ال-ساميح ايماعىندا ءوتتى. ءدال وسى جەردە 1968 -جىلى 18-اقپاندا ەكى امىرلىكتىڭ گۋبەرناتورلارى شەيح زايد بەن سۇلتان ءال ناحايان مەن شەيح راشيد بەن سايەد ءال ماكتۋم فەدەراتسيا قۇرۋ تۋرالى كەلىسىمگە كەلگەن.
پارادقا F-16 جانە Mirage 2000 جويعىش ۇشاقتارى، C-17 Globemaster III جانە C-130 Hercules اسكەري-كولىك ۇشاعى، AH-64 Apache جانە CH-47 Chinook تىكۇشاقتارى قاتىستى. مەرەكەلىك شەرۋگە بارلىعى 23 مىڭ اسكەري قىزمەتكەر مەن 2 مىڭ تەحنيكا قاتىستى.
ب ا ءا قارۋلى كۇشتەرىنىڭ وكىلى پولكوۆنيك دجامال ءال-بالۋشيدىڭ ايتۋىنشا، بۇل شارا ەل تاريحىنداعى ەڭ ءىرى اسكەري پاراد بولدى جانە وعان دايىندىق بىرنەشە ايعا سوزىلعان.
انىقتاما ءۇشىن، ب ا ءا ۇكىمەتى 2014 -جىلى «ۇلتتىق اسكەرگە شاقىرۋ تۋرالى» زاڭدى قابىلدادى. ونىڭ ايتۋىنشا، اسكەري قىزمەتكە 17 مەن 30 جاس ارالىعىنداعى دەنساۋلىعىندا اقاۋى جوق ەر ازاماتتاردىڭ بارلىعى الىنادى. اسكەري قىزمەت وتكەرۋ مەرزىمى اسكەرگە شاقىرىلۋشىنىڭ ءبىلىم دەڭگەيىنە بايلانىستى 11 ايدان 36 ايعا دەيىن سوزىلادى. ايەلدەر اسكەري قىزمەتتى ءوز ەركىمەن وتەي الادى، ولار ءۇشىن قىزمەت ەتۋ مەرزىمى 11 ايمەن شەكتەلگەن.
اۆتور
جاراسقان نۇرىبايەۆ
