ازيادا-2025: قازاقستاندىق سپورتشىلاردىڭ بۇگىنگى ناتيجەسى
حاربين. قازاقپارات – 12-قاڭتار، قىتايدىڭ حاربين قالاسىندا ءوتىپ جاتقان Ⅸ قىسقى ازيا ويىندارى اشىلۋ سالتاناتىنان كەيىنگى بەسىنشى جارىس كۇنىن اياقتادى.
بۇگىن، يابۋلي تاۋ-شاڭعى كۋرورتىندا وتكەن باسەكەلەردىڭ قورىتىندىسى بويىنشا ەل قورجىنى ەكى مەدالمەن تولىقتى.
ناقتىراق ايتساق، شاڭعى سپورتىنان ايەلدەر اراسىندا كوماندالىق ەستافەتادا سپورتشىلارىمىز كۇمىس الدى. جارىس جولىنا كاميلا ەلعازينوۆا، كسەنيا شالىگينا، انگەلينا شۋرىگا مەن نادەجدا ستەپاشكينا شىقتى.
ال جىگىتتەر 7.5 شاقىرىمدىق ەستافەتادا قولا جۇلدەنى قانجىعاعا بايلادى. جارىس جولىنا قازاقستاندىق سپورتشىلاردان ولجاس كليمين، ۆلاديسلاۆ كوۆاليەۆ، كونستانتين بورتسوۆ جانە نايل باشماكوۆ شىقتى.
سونىمەن قاتار، سكي-الپينيزم دوداسى بويىنشا جۇلدە بۇيىرمادى.
حاربيندە وتكەن مۇز سپورتى بويىنشا تەك مانەرلەپ سىرعاناۋدان ارالاس جۇپتار اراسىندا جۇلدەلەر ساراپقا سالىندى. وكىنىشكە قاراي قازاقستاندىق جۇپ بايسانعۇر داتييەۆ جانە گاۋحار ناۋرىزوۆا بەسىنشى ورىن الدى.
حوككەيدەن ايەلدەر اراسىندا ا توبىنىڭ العاشقى ويىنىندا، قازاقستاندىق قىزدار جاپونياعا ەسە جىبەردى، ەسەپ 0:4.
كەرلينگتەن قىزدار قۇراماسى بۇگىن ەكى ماتچ وتكىزدى. العاشقى ويىندا، قىزدارىمىز وڭتۇستىك كورەياعا 2:8 ەسەبىمەن جەڭىلدى. ال تايلاند قۇراماسىنا قارسى ويىندا 9:1 ەسەبىمەن جەڭىسكە جەتتى.
قازاقستان ەرلەر قۇراماسى قىرعىزستاندى 6:3 ەسەبىمەن قاپى قالدىردى.
وسىلايشا، قازاقستان دەلەگاتسياسىنىڭ مەدالدار سانى 15 كە (3 التىن، 7 كۇمىس جانە 5 قولا) جەتىپ، جالپى ەسەپتە 4-ورىندا كەلە جاتىر.
اۆتور مۇحتار قاليموللا ۇلى
