ازيادا-2025: حوككەيدەن قازاقستان قىزدار قۇراماسى وڭتۇستىك كورەيانى جەڭدى
حاربين. KAZINFORM - حوككەيدەن قازاقستان قىزدار قۇراماسى قىتايدىڭ حاربين قالاسىندا ءوتىپ جاتقان قىسقى ازيا ويىندارىنىڭ شەشۋشى ماتچىندا جەڭىسكە جەتتى.
قازاقستان قىزدار قۇراماسى ا توبىنداعى سوڭعى ماتچىندا وڭتۇستىك كورەياعا قارسى وينادى.
العاشقى تايمدا قازاقستاندىقتار قارسىلاس قاقپاسىنا 11 سوققى باعىتتادى. ويىننىڭ 6-مينۋتىندا قازاقستاندىق شابۋىلشى ماليكا الدابەرگەنوۆا وڭتايلى ءساتتى پايدالانىپ، قارسىلاس قاقپاسىنا شايبا سوقتى.
ەكىنشى تايمدا وڭتۇستىككورەيالىق ويىنشى ءبىزدىڭ سپورتشىعا قارسى ەرەجە بۇزىپ، 5 مينۋتقا الاڭنان شەتتەتىلدى. وكىنىشكە قاراي قىزدار بۇل مۇمكىندىكتى پايدالانا المادى.
ءۇشىنشى تايم باستالا سالا قازاقستاندىق حوككەيشىلەر بىردەن شابۋىلعا شىعىپ، ەسەپ ايىرماسىن ۇلعايتۋدى ماقسات تۇتتى. ۇرىمتال ساتتەردىڭ ءبىرىن ءساتتى پايدالانعان 21 نومەردەگى قورعاۋشى يۋليا بۋتورينا قارسىلاس قاقپاسىنان ساڭلاۋ تاپتى. ال ويىننىڭ 53-مينۋتىندا داريا مولدابايدىڭ الىستان باعىتتاعان سوققىسى قارسىلاس كوماندانىڭ قاقپاسىندا تۋلادى. وسىلايشا قازاقستان قۇراماسى ا توبىنداعى ەكى ويىندا جەڭىسكە جەتتى.
ەندى وسى توپتاعى تاعى ءبىر شەشۋشى ويىن جاپونيا جانە قىتاي قۇرامالارى اراسىندا وتەدى. ەگەر جاپونيا جەڭسە التىن مەدال الادى. ال، قازاقستاندىق سپورتشىلار كۇمىس جۇلدەگە يە بولادى.
وسىعان دەيىن حابارلاعانىمىزداي، قىزدارىمىز ا توبىنداعى العاشقى ويىندا جاپونياعا 0:4 ەسەبىمەن جول بەرگەن بولاتىن. ەسەسىنە قىتاي قۇراماسىنا قارسى ويىندا قازاقستاندىقتار 2:1 ەسەبىمەن جەڭىسكە جەتتى.
مۇحتار قاليموللا ۇلى
