ازيادا-2023: قازاقستاندىق سپورتشى بەسسايىستان وليمپيادا ليتسەنزياسىن جەڭىپ الدى
قازاقستاندىق سپورتشى ەلەنا پوتاپەنكو حاڭجوۋدا ءوتىپ جاتقان ازيا ويىندارىندا ايەلدەر اراسىنداعى قازىرگى بەسسايىستان جەكە جارىستا 5-شى ورىندى يەلەندى، دەپ حابارلايدى قازاقپارات.
وسىلايشا ول كەلەسى جىلى وتەتىن پاريج وليمپياداسىندا ونەر كورسەتۋگە مۇمكىندىك الدى.
سوڭعى كەزەڭگە دەيىن ەلەنا پوتاپەنكو جالپى ەسەپتە 8-ورىنعا يە بولدى، ءبىراق مىلتىق اتۋدا ءساتتى ونەر كورسەتىپ، العاشقى بەستىكتەن ورىن الدى. قازاقستاندىق سپورتشىنىڭ قورىتىندى ناتيجەسى - 1340 بال.
«مەن وسىعان دەيىن ايتقانىمداي، ازياداعا قاتىسۋدىڭ ءبىر ماقساتى- پاريج وليمپياداسىنا ليتسەنزيا الۋ. ءبىزدىڭ سپورتشىلار 8 سپورت تۇرىنەن وليمپيادا ويىندارىنا جولداما الۋ ءۇشىن كۇرەسىپ جاتىر. ەلەنا پوتاپەنكونى بۇگىنگى ناتيجەمەن قۇتتىقتايمىن جانە وعان پاريجدە ساتتىلىك تىلەيمىن»، - دەدى تۋريزم جانە سپورت ءمينيسترى ەرمەك مارجىقپايەۆ.
