ازيا پارا ويىندارىندا بارلىق سپورت تۇرىنەن مەدال الۋعا ءۇمىتتىمىز - مينيسترلىك
IV جازعى ازيا پارا ويىندارى 22-28- قازان ارالىعىندا قىتايدىڭ حاڭجوۋ قالاسىندا وتەدى. قازاقستاندىق پارا سپورتشىلار سپورتتىڭ 14 تۇرىنەن باق سىنايدى، دەپ حابارلايدى Kazinform.
«ەلىمىزدىڭ ۇلتتىق قۇراماسى 2010-جىلدان بەرى، وسى كۇنگە دەيىن ءۇش ازيا پارا ويىندارىنا قاتىسىپ، 64 مەدالگە قول جەتكىزدى. ونىڭ ىشىندە 12 التىن، 23 كۇمىس، 29 قولا مەدال. مەملەكەتتەر اراسىنداعى مەدالدىق ەسەپ بويىنشا پاراليمپيادالىق جارىستاردا 2010-جىلى 23-ورىن، 2014-جىلى 11-ورىن، 2018-جىلى 13-ورىن الدى»، - دەدى تۋريزم جانە سپورت ۆيتسە-ءمينيسترى سارسەن قۇرانبەك ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
اتالعان باسەكەدە پاريج پاراليمپياداسىنا جولداما ساراپقا سالىنادى.
«ۇلتتىق قۇراما حاڭجوۋداعى ازيا پارا ويىندارىنا قاتىساتىن بارلىق سپورت تۇرىنەن مەدال الۋعا ءۇمىتتى. بۇل قاتاردا جوعارى ناتيجە كورسەتەدى دەگەن پارا دزيۋدو، پارا جەڭىل اتلەتيكا، پارا پاۋەرليفتينگ، پارا ءجۇزۋ سياقتى سپورت تۇرلەرىن ەرەكشە اتاپ وتۋگە بولادى»، - دەيدى ول.
