ازەربايجان مەن ارمەنيانىڭ سىرتقى ىستەر مينيسترلەرى كەلىسسوز جۇرگىزۋگە الماتىعا كەلدى
الماتى. KAZINFORM - الماتى قالاسىنداعى دوستىق ۇيىندە ازەربايجان جانە ارمەنيا سىرتقى ىستەر مينيسترلەرى دجەيحۋن بايراموۆ پەن ارارات ميرزويان اراسىندا كەلىسسوز ءجۇرىپ جاتىر.
قازاقستان تاراپىنىڭ ۇسىنىسىن قابىل العان ەكى ەلدىڭ سىرتقى ىستەر مينيسترلەرى، بەيبىت كەلىسىم جۇرگىزۋگە الماتىعا كەلدى. ولاردى ق ر سىرتقى ىستەر ءمينيسترى مۇرات نۇرتىلەۋ قارسى الدى.
«بۇل قالادا حالىقارالىق ۇيىمداردىڭ 30 عا جۋىق ايماقتىق وكىلدىگى جۇمىس ىستەيدى. ءىرى فورۋمدار مەن كونفەرەنسيالار ءوتىپ تۇرادى. ورتالىق ازيا مەن اۋعانستان ءۇشىن ب ۇ ۇ حابىن اشۋ بويىنشا جۇمىس قىزۋ ءجۇرىپ جاتىر. وسى مۇمكىندىكتى پايدالانىپ، ءبىزدىڭ باستامامىزدى قولداعانى ءۇشىن ءازىربايجان مەن ارمەنيا باسشىلىعىنا شىنايى العىسىمىزدى بىلدىرەمىز. ءبىزدىڭ مەملەكەت باسشىسى اتاپ وتكەندەي، بۇل كەزدەسۋ ەكىجاقتى كەلىسىمدى ءىس جۇزىندە جۇزەگە اسىرۋعا مۇمكىندىك بەرەدى. دوستىق ءۇيىنىڭ قابىرعاسىنداعى رۋح وڭتۇستىك كاۆكازدا بەرىك جانە ۇزاق مەرزىمدى بەيبىتشىلىكتى تەز ارادا ورناتۋعا ىقپال ەتەتىنىنە ءۇمىتتى. قازاقستان دەلدال بولماي-اق، ىزگى ىستەر ميسسياسىن بەيتاراپ ورىنداۋعا دايىن ەكەنىن تاعى دا اتاپ وتكىم كەلەدى»، - دەدى مۇرات نۇرتىلەۋ.
سونداي-اق ول ءازىربايجان مەن ارمەنيا ءبىز ءۇشىن جاقىن ەلدەر عانا ەمەس، ماڭىزدى ستراتەگيالىق سەرىكتەس ەكەنىن اتاپ ءوتتى.
«ەجەلدەن ءبىزدىڭ حالىقتارىمىزدى عاسىرلار بويى قالىپتاسقان دوستىق، ءوزارا تۇسىنىستىك جانە ورتاق تاريحي وتكەن بايلانىستىرىپ كەلەدى»، - ق ر سىرتقى ىستەر ءمينيسترى.
ازەربايجان سىرتقى ىستەر ءمينيسترى دجەيحۋن بايراموۆ مەملەكەت باسشىسى قاسىم-جومارت توقايەۆقا كەلىسسوز جۇرگىزۋگە وسىنداي الاڭ ۇسىنعانى ءۇشىن العىس ءبىلدىردى.
«ەكى ەل دەلەگاتسياسىنىڭ كەزەكتى كەزدەسۋىن الماتىدا وتكىزۋگە ۇسىنىس جاساعان قاسىم-جومارت توقايەۆقا راحمەت ايتقىم كەلەدى. وسىدان ەكى اي بۇرىن بەرليندە كەزدەسكەن ەدىك. سونداي-اق ارمەنيا مەن ءازىربايجان بەيبىتشىلىك تۋرالى كەلىسسوز بويىنشا پىكىر الاماستى. ءبىز بۇل پروتسەسكە ۇلكەن ءمان بەرەمىز. قىسقا مەرزىمدە كولەمدى جۇمىس اتقاردىق. بىرلەسكەن كۇش-جىگەردىڭ ارقاسىندا مەملەكەتتىك شەكارانىڭ ءتيىستى ۋچاسكەلەرىندە مينادان تازارتۋ جۇمىستارى جۇرگىزىلدى. گەوگرافيالىق كوورديناتتار ناقتىلانىپ، بۇل اۋماقتا شەكارالىق تىرەكتەردى ورناتۋ جۇمىستارى اياقتالۋعا جاقىن. ءوز تاراپىمىزدان بۇل ۇدەرىسكە ۇلكەن ءمان بەرەتىنىمىزدى جانە جۇمىستى جالعاستىرۋعا دايىن ەكەنىمىزدى ايتقىم كەلەدى. الماتىداعى كەلىسسوزدەر وتە پايدالى بولادى دەپ ەسەپتەيمىن. سونداي-اق ءالى دە بار اشىق ماسەلەلەردىڭ شەشىمى تابىلادى دەگەن سەنىمدەمىن»، - دەدى دجەيحۋن بايراموۆ.
ارمەنيا سىرتقى ىستەر ءمينيسترى ارارات ميرزويان دا الماتىداعى كەلىسسوز ءوز ناتيجيەسىن بەرەتىنىنە سەنىمدى.
«ارمەنيا ەلى بەيبىتشىلىكتى قالايدى. ءبىز كەلىسسوزدەر جۇرگىزۋگە ءازىرمىز»، - دەدى ول.
تاراپتار 1991-جىلعى الماتى دەكلاراتسياسىنىڭ ازەربايجان مەن ارمەنيا اراسىنداعى قاتىناستاردى رەتتەۋ، ونىڭ ىشىندە شەكارانى دەليميتاتسيالاۋ پروتسەسىندە ماڭىزدىلىعىن ەسكەرە وتىرىپ، ازەربايجان مەن ارمەنيا سىرتقى ىستەر مينيسترلەرىنىڭ قازاقستانداعى، اتاپ ايتقاندا الماتى قالاسىنداعى كەزدەسۋىنىڭ سيمۆولدىق سيپاتىن اتاپ ءوتتى.
ايتا كەتەيىك، ءساۋىر ايىندا ەريەۆاندا وتكەن كەلىسسوزدەر بارىسىندا قازاقستان پرەزيدەنتى قاسىم-جومارت توقايەۆ پەن ارمەنيا پرەمەر-ءمينيسترى نيكول پاشينيان وڭتۇستىك كاۆكازدا تۇراقتىلىق پەن قاۋىپسىزدىكتى قامتاماسىز ەتۋ ماسەلەسىنە ايرىقشا نازار اۋدارعان بولاتىن.
سونداي-اق مەملەكەت باسشىسى، بۇل كەزدەسۋ ازەربايجان-ارميان ۋاعدالاستىعىنىڭ ناقتى جۇزەگە اسۋىنا جول اشىپ، جۋىق ارادا وڭتۇستىك كاۆكازدا تۇراقتى ءارى ۇزاق مەرزىمدى بەيبىتشىلىكتىڭ ورناۋىنا ىقپال ەتەتىنىن ايتقان ەدى.
ەسكە سالايىق، قازاقستان كەلىسسوز وتكىزۋ ءۇشىن الاڭ ۇسىنۋ ارقىلى جاردەم كورسەتۋگە دايىن ەكەنىن مالىمدەگەن.
