ازاماتتىق اۆياتسيا كوميتەتى استانا اۋەجايىنداعى رەيستەردىڭ كەشىگۋىنە قاتىستى تۇسىنىكتەمە بەردى
استانا. قازاقپارات – 28-ماۋسىمنان باستاپ استانا قالاسىنىڭ اۋەجايىنداعى رەيستەردىڭ كەشىگۋى 3-4-شىلدەگە جوسپارلانعان شانحاي ۇيىمىنىڭ سامميتىنە دايىندىق شەڭبەرىندەگى قازاقستان رەسپۋبليكاسى قورعانىس مينيسترلىگى ۇشاقتارىنىڭ دايىندىق جۇرگىزۋىنە وراي استانا قالاسىنىڭ اۋەجايىنداعى اۋە كەڭىستىگىنىڭ ۋاقىتشا جابىلۋىمەن بايلانىستى ورىن الىپ وتىر.
«دايىندىق ماقساتىنداعى رەيستەر 30-ماۋسىمعا دەيىن ساعات 09.25 تەن 10.20 عا دەيىن ورىندالاتىن بولادى. وسىعان وراي ورىن الىپ وتىرعان ۋاقىتشا شەكتەۋلەرگە تۇسىنىستىكپەن قاراۋدى سۇرايمىز. جولاۋشىلارعا وسى ۋاقىت ارالىعىندا اۋە كومپانيالارىنان ۇشۋ ۋاقىتىن الدىن الا ناقتىلاپ الۋ ۇسىنىلادى»، - دەلىنگەن حابارلامادا.
بۇعان دەيىن اۋە كومپانيالارى مەن قازاقستان رەسپۋبليكاسىنىڭ قورعانىس مينيسترلىگى بۇقارالىق اقپارات قۇرالدارى ارقىلى جولاۋشىلاردى الدىن الا حاباردار ەتۋ، سونداي-اق sms حابارلامالار مەن ەلەكتروندىق حاتتاردى جىبەرۋ ارقىلى جۇمىس جۇرگىزگەن بولاتىن.
سونىمەن بىرگە اۋە كەڭىستىگىنىڭ ۋاقىتشا جابىلۋىنا وراي بولىپ جاتقان كىدىرىستەر باسقا قالالاردا، اتاپ ايتقاندا استانا جانە الماتى قالالارىنداعى رەيستەردىڭ كەشىگۋىنە اكەپ سوعۋى مۇمكىن ەكەنىن اتاپ وتكەن ءجون.
