گازاداعى سوعىس قايتا باستالۋى مۇمكىن: نەتانياحۋ مەن ترامپتىڭ ۋلتيماتۋمى
استانا. KAZINFORM - يزرايل پرەمەر-ءمينيسترى بينيامين نەتانياحۋ ەگەر حاماس سەنبى كۇنى تۇسكە دەيىن كەپىلگە الىنعانداردى قايتارماسا، يزرايل ارمياسى گازا سەكتورىنداعى اسكەري وپەراتسيالارىن قايتا باستايتىنىن مالىمدەدى، دەپ حابارلايدى BBC.
- ەگەر حاماس سەنبى كۇنى تۇسكە كەيىن كەپىلگە الىنعان ءبىزدىڭ ادامدارىمىزدى قايتارماسا، كەلىسىم اياقتالادى جانە تساحال حاماس تالقاندالعانشا قارقىندى اسكەري ارەكەتتەردى قايتا جانداندىرادى، - دەدى نەتانياحۋ اسكەري كابينەت مۇشەلەرىمەن كەزدەسۋدەن كەيىنگى مالىمدەمەسىندە.
بۇدان باسقا، ا ق ش پرەزيدەنتى دونالد ترامپ حاماستان سەنبى كۇنى تۇسكە دەيىن بارلىق كەپىلگە الىنعانداردى بوساتۋدى تالاپ ەتىپ، ايتپەسە «ناعىز توزاق باستالاتىنىن» ايتتى.
- حاماس مەنىڭ نە ايتىپ تۇرعانىمدى تۇسىنەدى، - دەدى ول.
ءبىر كۇن بۇرىن سودىرلار يزرايل اتىستى توقتاتۋ كەلىسىمىنىڭ شارتتارىن ورىنداماي وتىر دەپ مالىمدەپ، تۇتقىندا بولعان يزرايلدىكتەردى بوساتۋدىڭ جانە ولاردى پالەستينالىق تۇتقىندارعا ايىرباستاۋدىڭ كەلەسى كەزەڭىن توقتاتامىز دەپ قورقىتتى.
يزرايل قورعانىس ءمينيسترى يسراەل كاتس حاماس مالىمدەمەسىنە قاتىستى پىكىر ءبىلدىردى.
ەسكە سالا كەتسەك، وتكەن سەنبىدە سوعىستى توقتاتۋ كەلىسىمى اياسىندا حاماس قىزىل كرەست ۇيىمىنا كەپىلگە الىنعان ءۇش ادامدى تاپسىردى.
وسىلايشا، حاماس بارلىعى 16 يزرايلدىكتى بوساتتى، 17 ادام سودىرلاردىڭ قولىندا قالىپ وتىر. يزرايلدىك دەرەكتەرگە سايكەس، وسى 17 ادامنىڭ سەگىزى قايتىس بولدى، ياعني يزرايل تاعى توعىز ادامنىڭ بوساتىلۋىن كۇتىپ جاتىر.
حاماس وسى سەنبىدە تاعى ءۇش يزرايلدىكتى بوساتۋى ءتيىس ەدى. ونىڭ ورنىنا يزرايل ءبىرقاتار پالەستينالىق تۇتقىندى بوساتپاق بولدى.
