گازاداعى قۇربانداردىڭ سانى 30 مىڭعا جۋىقتادى
استانا. قازاقپارات- 7-قازاننان بەرى يزرايلدىڭ گازا سەكتورىنا جاساعان شابۋىلدارى ناتيجەسىندە قازا تاپقان پالەستينالىقتاردىڭ سانى 29878-گە جەتتى. تاعى 70215 پالەستينالىق جاراقات الدى.
بۇل تۋرالى «انادولۋ» اگەنتتىگى پالەستينا دەنساۋلىق ساقتاۋ مينيسترلىگىنىڭ گازا سەكتورىنداعى مالىمدەمەسىنە سۇيەنە وتىرىپ حابارلادى.
سوڭعى تاۋلىكتە انكلاۆتىڭ تاعى 96 تۇرعىنى يزرايلدىك شابۋىلداردىڭ قۇربانى بولىپ، 172 ادام جاراقات العان.
ۆەدومستۆونىڭ مالىمەتىنشە، يزرايلدىك كۇشتەردىڭ توسقاۋىلدارىنان دارىگەرلەر مەن قۇتقارۋشىلار ءۇيىندى استىندا قالعان ادامداردىڭ دەنەسىنە جەتە الماي وتىر.
گازا سەكتورىنىڭ 2,3 ميلليون حالقى يزرايلدىڭ جاپپاي اۋە، قۇرلىق جانە تەڭىز بومبالاۋى مەن ەكسكلاۆتى تولىعىمەن قورشاۋىنىڭ سالدارىنان ازىق-تۇلىك، سۋ جانە ءدارى-دارمەك تاپشىلىعىنان زارداپ شەگىپ وتىر.
مىڭداعان عيمارات، سونىڭ ىشىندە اۋرۋحانالار، مەشىتتەر مەن شىركەۋلەر يزرايلدىڭ اۋە جانە قۇرلىق شابۋىلدارىنان زارداپ شەكتى جانە تولىعىمەن قيرادى. يزرايلدە قۇربان بولعاندار سانى 1200-گە جۋىق.
ايتا كەتەيىك، 2023 -جىلى 7-قازاندا يزرايلدىڭ شىعىس يەرۋساليمدەگى ءال-اقسا مەشىتىنە باسىپ كىرۋىنە جانە پالەستينالىقتارعا قارسى زورلىق-زومبىلىقتىڭ كۇشەيۋىنە جاۋاپ رەتىندە حاماس قارۋلى شابۋىل جاسادى.
بۇعان جاۋاپ رەتىندە يزرايل ارمياسى گازا سەكتورىندا ونداعان جويعىش ۇشاقتاردىڭ كومەگىمەن حاماس-قا قارسى «تەمىر قىلىشتار» وپەراتسياسىن باستاعانىن جاريالادى. 27-قازاندا يزرايل ارمياسى گازادا قۇرلىق وپەراتسيالارىن باستادى.
اۆتور
جاراسقان نۇرىبايەۆ
