گازاداعى نەگىزگى اۋرۋحانا جۇمىسىن توقتاتتى - د د س ۇ
دۇنيەجۇزىلىك دەنساۋلىق ساقتاۋ ۇيىمى گازا قالاسىنداعى ءال-شيفا اۋرۋحاناسى تۇرعىنداردى قابىلداۋعا جارامسىز ەكەنىن ءمالىم ەتتى. Kazinform بۇل تۋرالى BBC-گە سىلتەمە جاساپ حابارلايدى.
د د س ۇ گازانىڭ نەگىزگى مەديتسينالىق مەكەمەسى ءال-شيفا اۋرۋحاناسى اۋىر ءارى قاۋىپتى جاعدايدا ەكەنىن ەسكەرتتى، وندا ەلەكتر ەنەرگياسى تولىق سوندىرىلگەن، تاعام مەن سۋ تاپشى.
د د س ۇ باسشىسى تەدروس ادحانوم گەبرەيەسۋس اۋرۋحانا ماڭىندا بولعان اتىس پەن جارىلىستار ونسىز دا مۇشكىل جاعدايدى ۋشىقتىرىپ جىبەرگەنىن، ەندى ءال-شيفا اۋرۋحانا رەتىندە قىزمەت كورسەتە المايتىنىن حابارلادى.
يزرايل اسكەرى ونداعان جاڭا تۋعان ءسابي مەن جارالانعان ادامداردى باسقا اۋرۋحاناعا ەۆاكۋاتسيالاۋعا كومەكتەسۋگە دايىن ەكەنىن ايتتى.
ءال-شيفانىڭ حيرۋرگيا بولىمشەسىنىڭ جەتەكشىسى، دارىگەر مارۆان ابۋ ساادا BBC-گە ءۇشىنشى شالا تۋعان بالا ەلەكتر ەنەرگيا جەتىسپەگەندىكتەن شەتىنەپ كەتكەنىن حابارلادى.
BBC اگەنتتىگى وسى جەردىڭ حيرۋرگيا بولىمشەسىندە جاتقان 20 ءسابيدىڭ سۋرەتىن الدى.
حاماس توبى باسقاراتىن گازا دەنساۋلىق ساقتاۋ مينيسترلىگى د د س ۇ ۇسىنعان جاڭارعان اقپاراتقا سۇيەنىپ ءالى 2300 ادام ءال-شيفا اۋرۋحاناسىندا جاتقانىن حابارلادى. اۋرۋحانادا 600 دەن 650 گە دەيىن ناۋقاس، 200 دەن 500 گە دەيىن مەديتسينالىق قىزمەتكەر مەن عيماراتتى پانالاعان 1500 گە جۋىق ادام بار.
يزرايل پرەزيدەنتى يسااك گەرسوگ عيماراتتىڭ استىندا حاماس بازاسى ورنالاسقان دەيدى، ال توپتىڭ ءوزى مۇنى جوققا شىعاردى. يزرايل اسكەرى سوعىس قيمىلدارى كەزىندە گوسپيتالگە شابۋىلداماعانىن ءمالىم ەتتى.
7-قازاندا حاماس توبىنىڭ يزرايلگە جاساعان شابۋىلىنان 1200 ادام قازا تاپتى، 200 دەن استامى تۇتقىنعا الىندى. سودان كەيىن يزرايل گازا سەكتورىن سوققىلاي باستادى.
حاماس توبى باسقاراتىن دەنساۋلىق ساقتاۋ مينيسترلىگى سودان بەرى گازادا 11000 نان استام ادام ولتىرىلگەنىن، ونىڭ 4500 دەن استامى بالا ەكەنىن حابارلادى.
