گازاداعى شايقاس ۋشىقسا، يزرايل يادرولىق قارۋ قولدانا ما - يزرايل س ءى م وكىلىنىڭ جاۋابى
يزرايل سىرتقى ىستەر مينيسترلىگى ەۋرازيا جانە بالقان ماسەلەلەرى جونىندەگى باس ديرەكتورىنىڭ ورىنباسارى سيمونا گالپەرين استاناداعى بيريفينگىدە گازا شايقاسىندا يادرولىق قارۋ قولدانۋ ىقتيمالدىعى تۋرالى پىكىر ءبىلدىردى، دەپ حابارلايدى Kazinform.
«يزاريل حاماسپەن شايقاس ۋشىعىپ جاتسا، يادرولىق قارۋ قولدانۋى مۇمكىن دەگەن مالىمەتتەر شىعىپ جاتىر. شىنىمەن دە يادرولىق سوعىستىڭ تابالدىرىعىندا تۇرمىز با؟»، - دەپ سۇرادى ب ا ق وكىلى.
يزرايل س ءى م وكىلى ول مالىمەتتى تەرىسكە شىعاردى.
«جاي عانا «جوق» دەۋ از بولاتىن شىعار. ەشقاشان ونداي بولمايدى. ونداي ءسوزدى ايتقان ادام قازىر مەملەكەتتە وتىرعان جوق... پرەمەر-مينيستر دە، ونىڭ ادامدارى دا... بۇل وتە ايقىن، تۋرا جاۋاپ دەپ ويلايمىن. يزرايل حالىقارالىق زاڭ بويىنشا جۇمىس ىستەيتىن ەل ەكەنىن ايتتىم»، - دەدى سيمونا گالپەرين.
ەسكە سالساق، گازا سەكتورىنداعى پالەستينالىق راديكالدار يزرايل اۋماعىنا زىمىران اتقىلاپ، يزرايلدىڭ ورتالىعى مەن وڭتۇستىگىندە ەرەكشە جاعداي ەنگىزىلگەن ەدى.
سوڭعى مالىمەت بويىنشا، يزرايل اسكەرى گازانى تولىعىمەن قورشاپ، ەكىگە ءبولىپ تاستاعان. سىرتقى ىستەر مينيسترلىگىنىڭ مالىمەتى بويىنشا، گازا سەكتورىندا قازىر قازاقستاننىڭ 76 ازاماتى بار.
«ءبىزدىڭ دەرەكتەرىمىز بويىنشا گازا سەكتورىندا قازاقستان رەسپۋبليكاسىنىڭ 76 ازاماتى بار. وتباسى مۇشەلەرىمەن قوسا ەسەپتەگەندە ولاردىڭ سانى - 161. سونىمەن قاتار شەتەلدىك ازاماتتاردىڭ شىعۋىنا بايلانىستى مىسىر جانە يزرايل تاراپىنان بەلگىلى تالاپتار بار. ولاردىڭ ۇشتەن ءبىرى ەۆاكۋاتسيالاۋعا كەلمەيدى. ولار - كامەلەتكە تولعاندار، ەرلى-زايىپتىلار»، - دەدى مينيسترلىكتىڭ رەسمي وكىلى ايبەك سمادياروۆ مينيسترلىكتە وتكەن باسپا ءسوز ءماسليحاتىندا.
