گازادا قازا تاپقان بالالار سانى الەمدە كوز جۇمعان بالالار سانىنان كوپ ەكەنى راس پا؟
قازاننىڭ كەيىنگى اپتاسىندا الەۋمەتتىك جەلىلەردە جانە بىرنەشە سايتتا «گازادا قازا تاپقان بالالاردىڭ سانى دۇنيە جۇزىندە ولتىرىلگەن بالالار سانىنان اسىپ تۇسەدى» دەگەن جانتۇرشىگەرلىك اقپارات تاراپ ءجۇر.
وندا رەسەيلىك ريا نوۆوستيگە سىلتەگەن. ولاردىڭ ايتۋىنشا، 2019-جىلدان بەرگى دۇنيەجۇزىندەگى قارۋلى قاقتىعىستار بارىسىندا قازا تاپقان بالا سانى گازاداعى كوز جۇمعان بالالاردان از.
بۇل اقپاراتتى Factcheck.kz تەكسەرىپ كوردى.
پالەستينالىق بوسقىندارعا كومەك ۇيىمداستىرۋ جونىندەگى ب ۇ ۇ تاياۋ شىعىس اگەنتتىگىنىڭ باس كوميسسارى فيليپپ لازاريني وسى جونىندە ارنايى بريفينگ وتكىزىپ، جاعدايدى باياندادى. ونىڭ ايۋىنشا، قازا تاپقانداردىڭ 70 پايىزعا جۋىعى ايەلدەر مەن بالالار، ال ءۇش اپتانىڭ ىشىندە 3195 بالا قازا تاپقان. بۇل اقپاراتتى Save The Children ۇيىمى دا راستادى.
الايدا بۇل اقپارات - كليكبەيت. كوپتەگەن قازاقستاندىق مەديا «گازاداعى بالالار سانى الەمدە ولتىرىلگەن بالالار سانىنان اسىپ تۇسەدى"» دەپ تاقىرىپ قويىپ، اقپاراتتى بۇرمالاعان. سونداي-اق، ءماتىننىڭ ىشىندە «2019-جىلدان بەرگى دۇنيەجۇزىندەگى قارۋلى قاقتىعىستار كەزىندە كوز جۇمعان بالالار سانىنان كوپ» دەگەن سويلەم بار. شىن مانىندە ولاي ەمەس، 2019-جىلدان بەرى الەمدە 12193 بالا قارۋلى قاقتىعىس سالدارىنان قازا بولعان (2019-جىلى – 4019، 2020-جىلى – 2674، 2021-جىلى – 2515، 2022-جىلى - 2985 بالا). دەمەك، گازادا قازا بولعان بالا سانى 4 ەسە از. اقپارات وسى تۇستا بۇرمالانعان.
پالەستينا- يزرايل اراسىنداعى قاقتىعىس 7- قازانداعى حاماستىڭ گازا سەكتورىنىڭ اۋماعىنان يزرايلگە جاپپاي راكەتالىق شابۋىل جاساۋىمەن باستالدى. يزرايل اسكەري كۇشتەرى گازا ولكەسىنە جاپپاي اۋە شابۋىلدارىمەن جاۋاپ قايتاردى. قاقتىعىس سالدارىنان پالەستينادا 8,5 مىڭ ادام، يزرايلدە 1,4 مىڭ ادام قازا بولعان. Save The Children ۇيىمىنىڭ دەرەگىنشە، الەمدە ءاربىر التىنشا بالا قاقتىعىس ايماعىندا ءومىر سۇرەدى. ب ۇ ۇ باس اسسامبلەياسى پالەستينا-يزرايل اراسىنداعى قاقتىعىسقا بايلانىستى ونىنشى ارنايى توتەنشە سەسسياسىن وتكىزدى.
