گازا سەكتورىنداعى اۋىر ناۋقاستانعان پالەستينالىقتار تۇركياعا جەتكىزىلدى
تۇركيا دەنساۋلىق ساقتاۋ مينيسترلىگى گازا سەكتورىنداعى اۋىر جاراقات العان پالەستينالىقتاردى تۇرىك مەديتسينالىق مەكەمەلەرىنە جەتكىزۋ گۋمانيتارلىق ارەكەتىن جاسادى، دەپ حابارلايدى Kazinform.
مينيسترلىك ءوز كەزەگىندە سوعىس كەزىندە زارداپ شەككەن پالەستينالىقتارعا مەديتسينالىق كومەك كورسەتۋ ماسەلەلەرىن تالقىلاۋعا ارنالعان كەزدەسۋلەر، ديپلوماتيالىق بايلانىستار ناتيجە بەرگەنىن اتاپ ءوتتى.
مۇنداي شارا العاش رەت جۇزەگە اسىرىلىپ وتىر. گازا سەكتورىنان شىعارىلعان ناۋقاستار مىسىر ارقىلى تۇركياعا كەلدى. ولار تۇركيانىڭ دەنساۋلىق ساقتاۋ ءمينيسترى ف. كودجامەن بىرگە تۇركيا پرەزيدەنتى اكىمشىلىگى مەن ۇلتتىق قورعانىس مينيسترلىگىنە تيەسىلى ارنايى ۇشاقپەن جەتكىزىلدى.
ۇشۋ كەزىندە تۇركيا دەنساۋلىق ساقتاۋ ءمينيسترى ف. كودجا پالەستينالىق ناۋقاستارمەن جەكە تانىستى. ول بۇدان بىلاي تۇرىك تاراپىنىڭ گازا سەكتورىنداعى سوزىلمالى دەرتكە شالدىققاندار مەن اۋىر جارالانعان پالەستينالىقتاردى تۇركياعا جەتكىزۋگە بار كۇش-جىگەرىن سالاتىنىن باسا ايتتى.
وراق جاسۋشالى انەميامەن اۋىراتىن 17 جاستاعى ماحمۋد كادير يبراحيم ەبۋ نەدانىڭ ەم الىپ جۇرگەنىنە 10 جىلعا جۋىق ۋاقىت بولعان. ول گازا سەكتورىنداعى تۇرىك-پالەستينا دوستىق اۋرۋحاناسىنان ەم العان. مەديتسينالىق مەكەمەگە شابۋىل جاسالعان كەزدە ول جانە باسقا ناۋقاستار سول اۋرۋحانادا بولعان. جارىلىستان كەيىن نە ىستەرلەرىن بىلمەي ابدىراپ قالعان ناۋقاستار ەندى ەم الۋدى تۇركيادا جالعاستىرادى.
