گازا سەكتورىنداعى احۋال: اراب مەملەكەتتەرى ليگاسى ب ۇ ۇ- عا جاڭا ۇندەۋ جاسادى
استانا. KAZINFORM - اراب مەملەكەتتەرى ليگاسى (ا م ل) بىرىككەن ۇلتتار ۇيىمىنىڭ قاۋىپسىزدىك كەڭەسىنە (ب ۇ ۇ ق ك) يزرايلدىڭ گازا سەكتورىندا شابۋىلدارىن توقتاتۋعا قاتىستى شەشىم قابىلداۋعا ۇندەدى، دەپ حابارلايدى Anadolu Agency.
ا م ل پالەستينانىڭ ۇندەۋىمەن ءوزىنىڭ تۇراقتى وكىلدەرىنىڭ شۇعىل جيىنىن وتكىزدى. ماروككونىڭ توراعالىعىمەن وتكەن وتىرىس ا م ل- دىڭ كايردەگى شتاب- پاتەرىندە ءوتتى.
«ا م ل ب ۇ ۇ قاۋىپسىزدىك كەڭەسىنەن حالىقارالىق بەيبىتشىلىك پەن قاۋىپسىزدىكتى ساقتاۋ مىندەتتەرىن ورىنداۋىن جانە يزرايلدىڭ پالەستينا حالقىنا قارسى جۇيەلى جانە اۋقىمدى قىلمىستارىن توقتاتۋ ءۇشىن مىندەتتى شەشىم قابىلداۋىن تالاپ ەتتى»، - دەلىنگەن ا م ل وتىرىسىنىڭ قورىتىندىسى بويىنشا مالىمدەمەدە.
ا م ل قۇراما شتاتتار مەن ب ۇ ۇ قاۋىپسىزدىك كەڭەسىندە قوس ستاندارتتاردى قولدانىپ، يزرايل باسقىنشىلىعىن قولدايتىن ەلدەردى حالىقارالىق قۇقىققا سايكەس ۇستانىمدا بولۋعا جانە گازا سەكتورىندا اتىستى تولىق جانە تۇراقتى تۇردە توقتاتۋعا شاقىردى.
بۇدان باسقا، ب ۇ ۇ قاۋىپسىزدىك كەڭەسىنە مۇشە ەلدەردى يزرايلدىڭ پالەستينا حالقىنا قارسى شابۋىلدارىن توقتاتۋ، گازا سەكتورىنان كەتۋ، ەكسكلاۆتىڭ قورشاۋىن الىپ تاستاۋ جانە ونىڭ پالەستينالىقتاردى ءماجبۇرلى كوشىرۋ بويىنشا جوسپارلارى مەن كۇش-جىگەرىنە توسقاۋىل قويۋدى توقتاتاتىن ۇستانىم تانىتۋعا ۇندەدى.
اراب مەملەكەتتەرى ليگاسى، سونداي- اق، يزرايلدىڭ باسىپ الىنعان باتىس جاعالاۋداعى قىلمىستارىنىڭ كۇشەيۋىن، سونىڭ ىشىندە پالەستينالىق بوسقىندار لاگەرلەرى مەن ينفراقۇرىلىمدارىن جۇيەلى تۇردە قيراتۋىن، سونداي-اق يزرايلدىڭ «ءال-اقسا» مەشىتىن 100 كۇننەن استام قورشاۋىن ايىپتادى.
سونىمەن قاتار، حابارلامادا حالىقارالىق قىلمىستىق سوتتا يزرايلدىڭ ارەكەتتەرىن پالەستينا حالقىنا گەنوتسيد دەپ تانۋ تۋرالى وڭتۇستىك افريكا رەسپۋبليكاسىنىڭ يزرايلگە قارسى شاعىمى قاناعاتتاندىرىلعانىنا ريزاشىلىق ءبىلدىرىلىپ، يزرايل جازادان قۇتىلماۋى ءۇشىن وعان قاتىستى كوپ شاعىم ءتۇسىرۋ ۇندەۋى ايتىلدى.
ا م ل حالىقارالىق سوتتاردى قانداي دا ءبىر ساياسي يدەيالار ىقپالىنا تۇسپەي، شاعىمدار بويىنشا ىستەردى تەزىرەك تەرگەپ، شەشىم قابىلداۋعا شاقىردى. پالەستينانىڭ ا م ل- داعى تۇراقتى وكىلى مۋحەننەد ءال-اكليۋكتىڭ 17 -قاڭتاردا حابارلاۋىنشا، راماللا ا م ل- دى يزرايل شابۋىلدارى بويىنشا شۇعىل وتىرىس ۇيىمداستىرۋعا ۇندەدى.
اۆتور
زارينا تۋعانبايەۆا
