گازا سەكتورىندا قازاقستاننىڭ 76 ازاماتى بار
قازىرگى ۋاقىتتا گازا سەكتورىندا 76 وتانداسىمىز بار. بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى Kazinform.
«ءبىزدىڭ دەرەكتەرىمىز بويىنشا گازا سەكتورىندا قازاقستان رەسپۋبليكاسىنىڭ 76 ازاماتى بار. وتباسى مۇشەلەرىمەن قوسا ەسەپتەگەندە ولاردىڭ سانى 161. سونىمەن قاتار شەتەلدىك ازاماتتاردىڭ شىعۋىنا بايلانىستى مىسىر جانە يزرايل تاراپىنان بەلگىلى تالاپتار بار. ولاردىڭ ۇشتەن ءبىرى ەۆاكۋاتسيالاۋعا كەلمەيدى. ولار كامەلەتكە تولعاندار، ەرلى- زايىپتىلار»، - دەدى ايبەك سمادياروۆ مينيسترلىكتە وتكەن باسپا ءسوز ءماسليحاتىندا.
ونىڭ ايتۋىنشا، سىرتقى ىستەر مينيسترلىگى تاياۋ شىعىستاعى جاعدايدى باقىلاۋ ۇستاۋدا.
«دەگەنمەن كوپ نارسە بىزگە بايلانىستى ەمەس. اسكەري ديپلوماتيالىق داعدارىستى بۇكىل الەم شەشۋگە تىرىسىپ جاتىر. ءوز تاراپىمىزدان ازاماتتارىمىز مىسىر شەكاراسىنان وتكەننەن كەيىن ارنايى ەۆاكۋاتسياعا دايىنبىز. شەتەلدە قازاقستان ازاماتتارىن قورعاۋ سىرتقى ىستەر مينيسترلىگى مەن ەلشىلىكتەردىڭ نەگىزگى مىندەتتەرىنىڭ ءبىرى. ءبىز تاياۋ شىعىستاعى جاعدايدى باقىلاپ وتىرمىز. وكىنىشكە قاراي، شيەلەنىس كۇشەيىپ كەلەدى»، - دەيدى ول.
