گازا سەكتورىندا قازا تاپقان پالەستينالىقتاردىڭ سانى 14 مىڭنان اسىپ كەتتى
يزرايل مەن پالەستينانىڭ حاماس ۇيىمى اراسىندا قاقتىعىس باستالعاننان بەرى گازا سەكتورىندا قازا تاپقان پالەستينالىقتاردىڭ سانى 14532 ادامعا جەتتى.
بۇل تۋرالى سارسەنبىدە حاماس باقىلاۋىنداعى ب ا ق ۇكىمەتتىك باسقارماسىنان مالىمدەدى. Kazinform اگەنتتىگى بۇل تۋرالى شينحۋا اقپارات اگەنتتىگىنە سىلتەمە جاساپ حابارلايدى.
باسقارما ديرەكتورى يسمايل تاۆابتانىڭ حابارلاۋىنشا، قازا بولعاندار اراسىندا 6 مىڭ بالا جانە 4 مىڭ ايەل بار.
ول سونداي-اق 35 مىڭنان استام ادام جاراقات العانىن قوسىپ ءوتتى.
زارداپ شەككەندەر اراسىندا 205 مەديتسينا قىزمەتكەرى، ازاماتتىق قورعانىس جاساعىنان 22 ادام جانە 64 جۋرناليست بار.
«ءىز-ءتۇزسىز جوعالعاندار تىزىمىندە 7 مىڭ ادام بار، سونىڭ 4,7 مىڭنان استامى - بالالار مەن ايەلدەر» دەيدى ي. تاۆابتا.
يزرايل مەن حاماس سارسەنبىدە سوعىستى ءتورت كۇنگە توقتاتۋعا كەلىسكەننەن كەيىن ي. تاۆابتا گازاعا، اسىرەسە ونداعى اۋرۋحانالار مەن گۋمانيتارلىق قىزمەت كورسەتەتىن مەكەمەلەرگە دەرەۋ وتىن جەتكىزۋگە شاقىردى.
كەلىسىمگە سايكەس، حاماس سودىرلارى يزرايلدىك 50 تۇتقىندى - تەك ايەلدەر مەن بالالاردى، ال يزرايل تۇرمەدەن 150 پالەستينالىقتى - ايەلدەر مەن كامەلەتكە تولماعانداردى بوساتادى، دەپ حابارلادى سارسەنبى كۇنى يزرايل پرەمەر-ءمينيسترى بينيامين نەتانياحۋدىڭ كەڭسەسىنەن.
يزرايل سونداي-اق گازاعا گۋمانيتارلىق كومەك جەتكىزۋگە رۇقسات بەرەدى.
