گازا سەكتورىنا شابۋىلدان زارداپ شەككەن پالەستينالىقتار حالىقارالىق سوتقا شاعىم ءتۇسىردى
يزرايلدىڭ گازاعا جاساعان شابۋىلدارىنان زارداپ شەككەن پالەستينالىقتاردىڭ ادۆوكاتتارى دۇيسەنبىدە گوللانديانىڭ گااگا قالاسىنداعى حالىقارالىق قىلمىستىق سوتىنا (ح ق س) شاعىم ءتۇسىردى.
kazinform اگەنتتىگى بۇل تۋرالى انادولى اقپارات اگەنتتىگىنە سىلتەمە جاساپ حابارلايدى.
جابىرلەنۋشىلەردىڭ ح ق س- تاعى وكىلى جيل ديەۆەرس جانە ونىمەن بىرگە ەرىپ كەلگەن ءتورت ادامنان تۇراتىن دەلەگاتسيا سوت پروكۋرورىنا شاعىم ءتۇسىردى.
بەلگىلى بولعانداي، گەنوتسيد جانە باسقا قىلمىستار بويىنشا ايىپتاۋلار حالىقارالىق قىلمىستىق سوتقا جىبەرىلگەنى، اتاپ ايتقاندا، باستامانى فرانسياداعى ەڭ تاجىريبەلى زاڭگەرلەردىڭ ءبىرى جيل ديەۆەرس باستاعان حالىقارالىق زاڭگەرلەر توبى قولعا العانى حابارلاندى.
ديەۆەرس باسپا سوزگە سويلەگەن سوزىندە يزرايلدىڭ گازا سەكتورىنداعى ارەكەتتەرى - گەنوتسيد قىلمىسىنىڭ فاكتورلارى ەكەنىن ايتتى.
«ح ق س قازىرگى كەزدە ءتيىستى تەرگەۋ جۇمىستارىنىڭ بولىگى رەتىندە اسكەري قىلمىستاردى تەرگەپ جاتىر. بۇعان گەنوتسيد قىلمىسى دا قوسىلۋى كەرەك»، - دەدى ول.
ديەۆەرس سونداي-اق ءبىر ميلليوننان استام ادامدى كوشىرۋگە ماجبۇرلەۋ جانە ولاردىڭ سۋ، ەنەرگيا، ازىق-تۇلىك جانە ءدارى-دارمەككە دەگەن مۇمكىندىگىن شەكتەۋ يزرايلدىڭ گازاداعى حالىقتىڭ تولىق جويىلۋىن قالايتىنىن كورسەتەتىنىن قوسىپ ءوتتى.
سونداي-اق باسپا سوزگە سويلەگەن بەلگيانىڭ بۇرىنعى سەناتورى پەر گالاند بەلگيا سىرتقى ىستەر مينيسترلىگىن پالەستينا مەملەكەتىن مۇمكىندىگىنشە تەزىرەك تانۋعا شاقىردى.
«ءبىز مۇندا ادام قۇقىقتارىن قورعاۋ جانە ادىلدىك ورناتۋ ءۇشىن كەلدىك»، - دەدى ول.
بريۋسسەلدە ورنالاسقان بوستاندىق پەن ابىروي ءۇشىن اليانستىڭ تاياۋ شىعىس جانە سولتۇستىك افريكا ءبولىمىنىڭ باسشىسى ابدەلمادجيد مراري ح ق س گازا سەكتورىندا جاسالعان قىلمىستارعا قاتىستى سوت بيلىگىنە يە ەكەنىن اتاپ ءوتتى.
ونىڭ ايتۋىنشا، يزرايل ءوزىنىڭ ساياسي جانە اسكەري بيلىگى كورسەتكەندەي، گازا سەكتورىن پالەستينالىقتاردان ەتنيكالىق تازارتۋدى قالايدى.
پالەستينا بيلىگىنىڭ سوڭعى مالىمەتىنشە، ءيزرايلدىڭ گازا سەكتورىنا جاساعان شابۋىلىنىڭ 38- كۇنىندە كەمىندە 11180 پالەستينالىق ازامات قازا تاپتى، ونىڭ ىشىندە 7700 دەن استامى - ايەلدەر مەن بالالار، تاعى 28200 دەن استام ادام جاراقات الدى.
يزرايلدىڭ وتكەن ايدان بەرى قورشاۋداعى انكلاۆقا اۋەدەن جانە قۇرلىقتان تالاي شابۋىل جاساۋ سالدارىنان مىڭداعان عيمارات، سونىڭ ىشىندە اۋرۋحانالار، مەشىتتەر مەن شىركەۋلەر زاقىمدانعان نەمەسە قيراعان.
وسى ارادا، رەسمي مالىمەتكە سايكەس، يزرايلدە قازا تاپقاندار سانى 1200 ادامدى قۇرادى.
