گازا حالقى سوعىسپەن بىرگە اشتىقپەن دە الىسىپ جاتىر
گازا سەكتورىندا ادامداردىڭ كۇنەلتۋىنىڭ ءوزى قيىنداپ كەتتى. گۋمانيتارلىق كومەك بلوكاداسى اشتىققا اكەلدى.
ادامدار كۇنىنە ءبىر رەت تاماقتانسا سوعان قۋانادى، دەپ حابارلايدى Kazinform اگەنتتىگى Euronews رەسۋرسىنا سىلتەمە جاساپ.
ولار ءۇي- جايىن اقشاسىز جانە ەشقانداي زات الماي تەز تاستاپ كەتۋگە ءماجبۇر بولعان. ەندى ازىق قىلاتىن تۇگى جوق.
گازا سوعىسى سالدارىنان قونىس اۋدارعان پالەستينالىقتار قورقىنىش پەن قاۋىپ- قاتەردەن بولەك اشتىقپەن دە الىسىپ جاتىر.
بۇل لاگەردەگى ادامداردى كۇنىنە كەمىندە ءبىر مارتە تاماقتاندىرۋدىڭ ءوزى وڭاي بولماي وتىر.
«بۇل وتىندى وزىمە جانە باۋىرلارىما بيداي قايناتۋ ءۇشىن جاعىپ جاتىرمىن. دەمەك بۇگىن اش قالمايمىز. ءبىز كەشەدەن بەرى ءنار تاتپادىق»، — دەيدى يامەن لاباد دەيتىن قونىس اۋدارعان بالا.
لاگەردەگى وتباسىلار بۇل جەردە ءومىر وتە قيىن ەكەنىن جانە كوپ كۇندى تاماقسىز وتكىزەتىنىن ايتادى.
قونىس اۋدارعان تاعى ءبىر ايەل كورشىلەرىنىڭ كومەگىمەن بۇرشاق جانە جەۋگە جارامدى مولوحيا شوبىنەن ازىق دايىنداپ جاتىر.
«نان الۋ قيىن، سۋ تابۋ ودان دا قيىن، ۇن جوق، كومەك جوق، بالالاردىڭ جاعدايى وتە اۋىر. تاماقتى كۇنىنە ءبىر رەت، تۇسكى اس كەزىندە الۋعا بولادى. تاڭعى اس تا، كەشكى اس تا جوق. جاعداي وسىنداي. ءبىز باس ساۋعالاپ ۇيدەن تەز قاشىپ شىقتىق، سوعىس بولادى دەپ كۇتپەدىك، سوندىقتان قولىمىزدا ەشتەڭە جوق»، - دەيدى ۋمم ماحمۋد ءال- اسامنا اتتى ايەل.
گازا سەكتورىنداعى گۋمانيتارلىق كومەك بلوكاداسى ازىقتىڭ سارقىلۋىنا اكەلدى.
كوبى بومبا استىنداعى جىلدام ءولىمنىڭ ورنىنا بوسقىندار لاگەرىندە باياۋ اجال كۇتىپ تۇرعانىن ايتادى.
