از قازاق كوپ الدى، كوپ قازاقتا نە قالدى؟

ال قازاقستان قۇراماسى 20 مەدالمەن (4 التىن، 9 كۇمىس، 7 قولا) جالپىكوماندالىق ەسەپتە 4-ورىنعا تۇراقتادى. ارينە، قازاقستان ءۇشىن بۇل ناشار كورسەتكىش ەمەس. دەگەنمەن مەدال سانى جاعىنان كوش باستاپ تۇرعان قىتاي قۇراماسىنىڭ قاتارىندا جارىسقا قاتىسقان 4 قانداسىمىزدىڭ 3 التىن، ەكى قولا مەدال العانى بىزگە ءبىراز وي سالدى.

قىتاي قۇراماسىندا ونەر كورسەتىپ، جەڭىس تۇعىرىنان كورىنگەن قانداستارىمىز، ءسوز جوق، سول ەلدەگى سپورت جۇيەسىنىڭ جەتىستىگى. قىتايدا تالانتتى سپورتشىلاردى ەرتە باستان بايقاپ، جۇيەلى تۇردە تاربيەلەپ، جوعارى دەڭگەيگە جەتكىزۋگە كۇش سالادى. رەسمي دەرەك بويىنشا، قىتايدا 1,5 ميلليون قازاق بار. انە سولاردىڭ اراسىنان ءۇش بىردەي سپورتشى ازيا ويىندارىندا توپ جارسا، بۇل - تالانتتى جاستاردى ەرتە ىرىكتەپ، جۇيەلى تۇردە دايىنداۋدىڭ ناقتى ناتيجەسى. ال قازاقستاندا 15 ميلليون قازاق بار، 4 التىن الدىق. بۇل ارادا ءبىزدىڭ قۇرامادا كىمدەر بار ەكەنىن ءبىر-بىرلەپ ايتىپ، الا قويدى بولە قىرىققانداي بولمايىق.

تەك ۇلتتىق ۇلەس سالماعى تۇرعىسىنان الىپ ايتساق، 1,5 ميللياردقا جۋىق حالىقتىڭ اراسىنان قانداستارىمىزدىڭ وزا شاۋىپ، 34 ەلدەن كەلگەن 1200 سپورتشى قاتىسقان حالىقارالىق جارىستان جۇلدە الىپ جاتقانىنىڭ ءوزى بابى كەلىسسە قازاق سپورتشىلارىنىڭ ەشكىمنەن كەم ەمەس ەكەندىگىنىڭ ناقتى دالەلى ەمەس پە؟! ياعني 1,5 ميلليون قازاقتان 4-5 سپورتشى جۇلدە العاندا ودان ون ەسە كوپ قازاق ءومىر سۇرەتىن قازاقستانداعى قازاقتار دا وسال بولماۋى كەرەك قوي. دەمەك، بۇل سالىستىرما - ەلدەگى سپورت جۇيەسىنىڭ اقساپ تۇرعانىنىڭ، سپورت تۇرلەرىنە قاجەتتى جاعداي جاسالعانىمەن، كاسىبي سپورتشىلاردى دايىنداۋ جۇيەسىندە ءالى دە ولقىلىقتار بار ەكەندىگىنىڭ كورىنىسى. ويتكەنى بىزدە دارىندى جاستاردى ەرتە ىرىكتەۋ جاعى كەمشىن.

 كوپ جاعدايدا سپورتقا بەيىمى بار بالالار قولداۋ تاپپاي، وزگە سالالارعا كەتىپ جاتادى. ەكىنشىدەن، ەلىمىزدە باسەكەلەستىك دەڭگەيى تومەن. ەگەر ەل ىشىندە قىتاي سياقتى شىن مىقتىلاردى انىقتايتىن جۇيە بولسا، قازاقستاننان نەبىر كەرەمەت سپورتشىلاردىڭ شىعارىنا كۇمان جوق. ماسەلەن، قىتايدا اۋىلدان باستاپ تاڭداپ، اۋىلدا وتكەن جارىستان توپ جارعان جۇلدەگەردى اۋداندىق جارىسقا، ودان جەڭسە، وبلىستىق، ودان ارى ولكەلىك، مەملەكەتتىك جارىسقا دەيىن قاتىستىرىپ «كىل مىقتىدان كىم مىقتى» دەپ وتىرىپ سپورتشى تاڭدايدى.

ءبىزدىڭ ەلدە وسىنداي جۇيە بار ما؟ جوق. ياعني، ءبىزدىڭ قازىرگى سپورتتاعى دەڭگەيىمىز حالىقتىق ساپامىزدىڭ ناقتى كورسەتكىشى دەپ ايتا المايمىز. بۇل جاعدايدان ساباق الۋىمىز كەرەك. ەگەر ءبىز بارلىق سپورت تۇرلەرىنەن الەمدىك ارەناعا شىعامىز دەسەك، جاس تالانتتاردى ەرتە باستان انىقتايتىن مىقتى جۇيە قالىپتاستىرىپ، 20 ميلليون حالىقتىڭ ىشىندەگى ناعىز مىقتىنى الەمدىك دوداعا اپاراتىن دەڭگەيگە جەتۋگە كۇش سالۋىمىز كەرەك.

قىسقاسى، بىزدە مىقتى سپورتشىلار جوق ەمەس، بار! تەك سولاردى قولدايتىن دۇرىس جۇيە قاجەت. قىتايداعى از عانا قازاقتىڭ جەڭىسى - قازاقستانداعى سپورت سالاسىن باسقارۋشىلارعا دا ۇلكەن وي سالۋى ءتيىس.

قالياكبار ۇسەمحان ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى