ايماعامبەتوۆ: اۋىتقۋى بار ادامداردى بولەك ۇستاپ، جابۋ - دۇرىس ەمەس

بۇگىن ءماجىلىستىڭ الەۋمەتتىك-مادەني دامۋ كوميتەتىندە پسيحولوگيا قىزمەتىنىڭ پروبلەمالارى مەن شەشۋ جولدارى قارالىپ جاتىر.

- بۇل تاقىرىپ 2024 -جىلدىڭ قىركۇيەگىندە بەكىتىلگەن. بىرنەشە اي وتكەن سوڭ سوڭعى وقيعاعا قانشالىقتى ماڭىزدى ەكەنىنە كوزىمىز جەتىپ وتىر. پسيحولوگيالىق دەنساۋلىق ماسەلەسى ماڭىزدى، اسىرەسە پاندەميادان كەيىن، سمارتفوننىڭ اسەرىمەن ودان سايىن كۇردەلەنە تۇسۋدە. ەۋروپا مەملەكەتتەرىن قارايتىن بولساق، ولاردا ءبىرشاما زەرتتەۋلەر وتكىزدى، سودان پسيحولوگيالىق دەنساۋلىقتىڭ قانشالىقتى ۋشىعىپ بارا جاتقانىن كورىپ وتىرمىز. ءبىزدىڭ ەلدە پسيحولوگيالىق زەرتتەۋلەر جەتكىلىكسىز. پسيحولوگيالىق قىزمەت قۇقىقتىق تۇرعىدان تولىعىمەن رەتتەلمەگەن، - دەدى اباي ايماعامبەتوۆ ءماجىلىس كوميتەتىنىڭ وتىرىسىندا.

حالىق قالاۋلىسىنىڭ ايتۋىنشا، پسيحولوگيالىق قىزمەت كورسەتۋدىڭ ءتيىستى نورمالارى بار، ءبىراق ول شاشىراڭقى.

- ءارتۇرلى زاڭداردا، مينيسترلىكتەردىڭ ءارتۇرلى ەرەجەلەرىندە قاراستىرىلعان، ءبىراق جۇيەلى رەتتەلگەن زاڭ جوق. كوپ مەملەكەتتە ارنايى زاڭناما بار. جالپى پسيحياتريا، پسيحولوگيا، پسيحوتەراپيا قىزمەتىن كوبىسى شاتاستىرادى، ءبارى بىردەي كورىنەدى، ءبىراق وزىندىك ەرەكشەلىكتەرى بار. پسيحيكالىق اۋىتقۋى بار جاندارعا كورسەتىلەتىن كومەك كولەمى قانداي، ءدارى-دارمەككە قول جەتكىزۋ ماسەلەسى كۇن تارتىبىندە تۇر. كەيبىرەۋلەر پسيحيكاسىندا اۋىتقۋى بار ادامداردى بولەك ۇستاپ، جابۋ كەرەك دەپ جاتىر، بۇل دۇرىس ەمەس. بىزگە ولاردى جابۋمەن نەمەسە ەمدەۋمەن ەمەس الدىن الۋ جانە كومەك كورسەتۋ ماسەلەسى ماڭىزدى، - دەيدى دەپۋتات.

ايتا كەتەيىك، ەلىمىزدە مىنەز-قۇلقى پسيحيكالىق بۇزىلعان (اۋىتقۋى بار) 204408 ادام بار. ونىڭ ىشىندە 44781 كامەلەت جاسىنا تولماعان بالالار مەن جاسوسپىرىمدەر.

سونداي-اق پسيحيكالىق اۋىتقۋى بار ادام قانداي جاعدايدا ماجبۇرلەپ ەمدەۋگە جىبەرىلەتىنى تۋرالى جازعان ەدىك.

ەسكە سالا كەتسەك، ەلوردادا جاس ءوسپىرىم ليفتى ىشىندە بالانى پىشاقتاپ تاستاعان ەدى. كەيىن بەلگىلى بولعانداي پىشاقپەن شابۋىلداعان جاس ءوسپىرىم ارنايى ەسەپتە تۇرعان.

دارىگەرلەر زارداپ شەككەن بالاعا دەرەۋ وتا جاساپ، پسيحولوگيالىق كومەك كورسەتتى.

قازىر بالانى پىشاقتاعان جاس ءوسپىرىم پسيحياتريالىق ستاتسيوناردا.

اۆتور

داۋلەت ىزتىلەۋ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى