اۋىلدا جۇمىس ىستەيتىن دارىگەرلەر 10 ميلليون تەڭگە تولەم الادى - اتىراۋ
استانا. KAZINFORM - اتىراۋ وبلىسىندا اۋدان جانە اۋىلعا بارىپ جۇمىس ىستەيتىن دارىگەر ماماندارعا ءبىر رەتتىك قارجىلاي كومەك كورسەتىلدى. تولىعىراق ءوڭىر اكىمى سەرىك شاپكەنوۆ ايتىپ بەردى.
- «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 4 مەديتسينالىق عيماراتتى پايدالانۋعا بەردىك. جىل اياعىنا دەيىن 12 نىساننىڭ قۇرىلىسىن اياقتاپ، حالىق يگىلىگىنە بەرەمىز. كەلەر جىلى تاعى 2 مەديتسينالىق وبەكتى اشىلادى. ودان بولەك بيىل جەرگىلىكتى بيۋدجەت ەسەبىنەن 7 دەنساۋلىق ساقتاۋ نىسانى تاپسىرىلدى. بۇل شارالار اسىرەسە، وبلىس ورتالىعىنان الىس ورنالاسقان ەلدى مەكەن تۇرعىندارىنا مەديتسينالىق قولجەتىمدىلىكتى ارتتىرادى. وڭىردە ءجيى تالقىعا تۇسەتىن تاقىرىپتىڭ ءبىرى - دارىگەر تاپشىلىعى. ءبىز وزگە وڭىردەن بىلىكتى جانە وقۋىن ەندى اياقتاعان جاس مامانداردى تارتىپ جاتىرمىز. ولارعا ءبىر رەتتىك ۇستەماقى تاعايىندادىق، - دەدى سەرىك شاپكەنوۆ وبلىستىڭ بيىلعى الەۋمەتتىك- ەكونوميكالىق دامۋى تۋرالى ەسەپ بەرە تۇرىپ.
اكىمنىڭ مالىمەتىنشە، اۋىل دارىگەرلەرىنە بەرىلەتىن ءبىر رەتتىك كومەكتىڭ كولەمى وتكەن جىلمەن سالىستىرعاندا 2 ەسە ارتتى.
- اۋىلعا بارىپ جۇمىس ىستەۋگە كەلىسكەن دارىگەرگە 10 ميلليون تەڭگە، اۋدان ورتالىعىندا قىزمەت ەتەمىن دەگەندەرگە 8,5 ميلليون تەڭگە تولەندى. ال، وبلىس ورتالىعىندا ەڭبەك ەتكىسى كەلسە 5 ميلليون تەڭگە كولەمىندە كومەك كورسەتىلدى. جالپى بيىل وڭىردە 140 دارىگەر جۇمىسقا قابىلداندى. وعان قوسا وبلىس دارىگەرلەرىنە ارنالعان وڭىرلىك بىرەگەي تۇرعىن ءۇي باعدارلاماسى ارقىلى 42 دارىگەر باسپانالى بولدى، سونداي- اق 105 قىزمەتتىك پاتەر ساتىپ الىندى. بيىل دەنساۋلىق ساقتاۋ سالاسىن مەديتسينالىق جابدىقتارعا جەرگىلىكتى بيۋدجەتتەن 5,1 ميلليارد تەڭگە ءبولىندى، سونىڭ ىشىندە مەديتسينالىق ۇيىمدارعا 45 سانيتارلىق كولىك ساتىپ الدىق، - دەيدى ول.
بۇعان دەيىن سەرىك شاپكەنوۆ وڭىردەگى ءسىبىر جاراسىنىڭ تارالۋ جاعدايىنا قاتىستى تۇسىنىك بەردى.
اۆتور
داۋلەت ىزتىلەۋ
