اۋىلعا بارعان ەرلى-زايىپتى دارىگەرلەرگە 20 ميلليون تەڭگە جاردەماقى بەرىلەدى — جەتىسۋ
استانا. KAZINFORM — جەتىسۋ وبلىسىندا اۋىلعا جۇمىس ىستەۋگە بارعان دارىگەرلەرگە قانداي جاعداي جاسالادى؟ بۇل ساۋالعا ءوڭىر اكىمى بەيبىت يسابايەۆ جاۋاپ بەردى.
— كادر ماسەلەسى تەك ءبىزدىڭ ايماقتا عانا ەمەس، قازاقستاندا تاپشى. ونىڭ ەكى سەبەبى بار، بارعان كەزدە تۇرعىن ءۇيى جوق، ەكىنشى جاردەماقى بەرىلمەيدى، بەرىلسە از. اۋىلداعى دارىگەرلەردىڭ جالاقىسى بىلتىرعا قاراعاندا ءوستى، ءبىراق جەتىڭكىرەمەيدى، سوندىقتان كەلمەيتىن. ءبىزدىڭ وبلىستا 341 دارىگەر تاپشى بولعان، ماسەلەنى شەشۋ ءۇشىن اۋىلدىق جەرگە كوشىپ كەلگەن دارىگەرگە بيىل 1-قاڭتاردان باستاپ بيۋجەتتەن 10 ميلليون تەڭگە كوتەرمە اقشا بەرىلەدى، ەگەر دە ەرلى-زايىپتى دارىگەرلەر كوشىپ كەلسە، 20 ميلليون تەڭگە جاردەماقى بەرىلەدى، — دەدى بەيبىت يسابايەۆ ءوڭىردىڭ الەۋمەتتىك-ەكونوميكالىق دامۋى تۋرالى ەسەپ بەرە تۇرىپ.
اكىم ۇسىنعان مالىمەتكە سۇيەنسەك بيىل جەتىسۋ وڭىرىنە 170 جاس دارىگەر مامان جۇمىسقا كەلدى.
— بىلتىر ءبىز 262 ميلليون تەڭگە ءبولىپ، ينتەرناتۋرادا وقىپ جاتقان ستۋدەنتتەردىڭ وقۋىنىڭ اقشاسىن تولەپ بەردىك. ولارمەن وقۋىن بىتىرگەن سوڭ، ءبىزدىڭ وڭىرگە كەلەسىز دەگەن كەلىسىمگە كەلدىك. كەلەسى جىلدىڭ بيۋجەتىندە قالالىق جەرگە كەلگەن دارىگەرلەرگە 5 ميلليون تەڭگە، اۋىلعا بارعان دارىگەرلەرگە 10 ميلليون تەڭگە جاردەماقى بەرۋ قاراستىرىلعان. مەنىڭ ويىمشا، كادر تاپشىلىعى ءبىر-ەكى جىلدىڭ ىشىندە شەشىمىن تابادى، — دەيدى ول.
بۇعان دەيىن جەتىسۋ وبلىسىندا 2,6 تريلليون تەڭگەگە 189 ينۆەستيتسيالىق جوبا قولعا الىنعانى ايتىلدى.
سونداي-اق بەيبىت يسابايەۆ بيىل 11 ايدا نەگىزگى ينديكاتورلار بويىنشا جوسپار ارتىعىمەن ورىندالعانىن مالىمدەدى.
