اۋىل مەن قالا مەكتەپتەرى اراسىنداعى ءبىلىم الشاقتىعى ازايىپ كەلەدى - مينيستر

«اۋىل مەن قالا مەكتەپتەرى اراسىنداعى ءبىلىم ساپاسىنداعى الشاقتىقتى PISA حالىقارالىق زەرتتەۋلەرى ايقىنداپ وتىر. دەگەنمەن PISA-2018 ناتيجەلەرىمەن سالىستىرعاندا، 2022 -جىلعى ماتەماتيكالىق جانە جاراتىلىستانۋ ساۋاتى بويىنشا ايىرماشىلىق كورسەتكىشى 4-5 بالعا دەيىن قىسقاردى، ال وقۋ ساۋاتتىلىعى وزگەرىسسىز قالىپ وتىر»، - دەدى ع. بەيسەمبايەۆ بۇگىنگى ۇكىمەت وتىرىسىندا.

وقۋ- اعارتۋ مينيسترلىگى 2023 -جىلدان باستاپ «اۋىل مەكتەبى - ساپا الاڭى» رەسپۋبليكالىق جوباسىن ىسكە اسىرۋدا.

الماتى وبلىسىندا بىلتىرعى وقۋ جىلىندا «قازاقستان حالقىنا» قورىنىڭ قارجىلاي قولداۋىمەن 50 مەكتەپتە جاراتىلىستانۋ- ماتەماتيكالىق باعىت پاندەرى بويىنشا ءبىلىم ساپاسىن ارتتىرۋ ءۇشىن «ءبىلىم- يننوۆاتسيا» ليتسەيلەرىنىڭ تاجىريبەسىنە نەگىزدەلگەن جوبا جۇزەگە استى.

ماڭعىستاۋ وبلىسى مەكتەپتەرىنىڭ ءبىلىم ساپاسىن ارتتىرۋ ءۇشىن بيىل 50 مەكتەپتى، ونىڭ ىشىندە 35 اۋىل مەكتەبىن قامتيتىن «وتپان» جوباسى باستالدى.

«اقتوبە وبلىسىندا بىلتىر وبلىس اكىمدىگىنىڭ جانە «قازاقستان حالقىنا» قوعامدىق قورىنىڭ قاتىسۋىمەن «سيفرلىق تەحنولوگيالاردى پايدالانىپ، اۋىل مەكتەپتەرىنىڭ الەۋەتىن ارتتىرۋ» جوباسى جۇزەگە اسىرىلدى. جوباعا 12 تىرەك جانە 134 شاعىن جيناقتى مەكتەپ، 11 مىڭنان استام ءبىلىم الۋشى مەن 3,5 مىڭعا جۋىق پەداگوگ قاتىستى. ى. التىنسارين اتىنداعى ۇلتتىق ءبىلىم اكادەمياسى، «ورلەۋ» بىلىكتىلىكتى ارتتىرۋ ۇلتتىق ورتالىعى، ا. بايتۇرسىن ۇلى اتىنداعى «تالداۋ» ۇلتتىق زەرتتەۋلەر جانە ءبىلىمدى باعالاۋ ورتالىعى جانە «نازاربايەۆ زياتكەرلىك مەكتەپتەرى» جانە «ءبىلىمدى تۇراقتى دامىتۋ» قورى جوبانىڭ تابىستى ءوتۋىن قامتاماسىز ەتتى»، - دەدى سالا ءمينيسترى.

جوبا اياسىندا تىرەك مەكتەپتەرىنىڭ ماتەريالدىق- تەحنيكالىق بازاسى تولىعىمەن جاڭارتىلىپ، شاعىن جيناقتى مەكتەپتەر پاندىك جانە سيفرلىق كابينەتتەرمەن جابدىقتالعان. مەكتەپتەرگە جىلدامدىعى جوعارى ينتەرنەت ورناتىلعان.

جوبا اياسىندا جۇرگىزىلگەن كەشەندى جۇمىستار شاعىن جيناقتى مەكتەپتەردەگى ءبىلىم ساپاسىنىڭ ارتۋىنا ىقپال ەتتى. مۇنى 6, 8 جانە 10 سىنىپتارداعى وقۋ ۇلگەرىمىنىڭ ناتيجەسى راستادى.

«اپروباتسيادان وتكەن وقىتۋدىڭ 4 مودەلىنىڭ ىشىندە «تىرەك مەكتەبى - شاعىن جيناقتى مەكتەپ» مودەلى تيىمدىلىگىن كورسەتتى. وسىعان وراي، رەسپۋبليكالىق جوبانى ماسشتابتاۋ ۇسىنىلىپ وتىر. اكىمدىك جەرگىلىكتى بيۋدجەتتەن تىرەك جانە شاعىن جيناقتى مەكتەپتەردىڭ ماتەريالدىق- تەحنيكالىق بازاسىن جاڭارتۋعا، ساپالى ينتەرنەتپەن قامتاماسىز ەتۋگە، تىرەك مەكتەپتەرىنىڭ پەداگوگتەرىن ىنتالاندىرۋ ءۇشىن ۇستەمەاقى تولەۋگە قاراجات ءبولۋدى جوسپارلاۋى قاجەت»، - دەدى عاني بەيسەمبايەۆ.

بيىل جوباعا اقمولا، قوستاناي، پاۆلودار، باتىس قازاقستان جانە سولتۇستىك قازاقستان وبلىستارىنداعى 10 تىرەك جانە 30 شاعىن جيناقتى مەكتەپ تارتىلۋدا.

2025 -جىلدىڭ قاڭتارىنان باستاپ جوباعا 17 ءوڭىردىڭ 192 تىرەك جانە 759 شاعىن جيناقتى مەكتەبى قاتىسادى.

ال ءۇشىنشى كەزەڭدە وسى جوباعا قالعان شاعىن جيناقتى مەكتەپتەردىڭ بارلىعى تولىعىمەن قامتىلۋى قاجەت.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى