اۋىل شارۋاشىلىعىندا ەسكى تاسىلدەرمەن ونىمدىلىكتى ارتتىرۋ مۇمكىن ەمەس - ماۋلەن اشىمبايەۆ

بۇل تۋرالى ەلوردادا «ازىق-تۇلىك قاۋىپسىزدىگى - ۇلتتىق قاۋىپسىزدىكتىڭ نەگىزگى قۇرامداس بولىگى» تاقىرىبىندا ءوتىپ جاتقان پارلامەنتتىك تىڭداۋدا سەنات ءتوراعاسى ماۋلەن اشىمبايەۆ ءمالىم ەتتى.

- جالپى، ازىق-تۇلىك قاۋىپسىزدىگىن قامتاماسىز ەتۋ - مەملەكەتتىڭ اگرارلىق جانە ەكونوميكالىق ساياساتىنىڭ نەگىزگى باسىمدىقتارىنىڭ ءبىرى. وزدەرىڭىزگە بەلگىلى، پرەزيدەنت قاسىم-جومارت توقايەۆ بۇل ماسەلەگە ۇنەمى باسا ءمان بەرىپ كەلەدى. مەملەكەت باسشىسى ازىق- تۇلىك قاۋىپسىزدىگى ماسەلەسىن تۇبەگەيلى شەشۋ قاجەت ەكەنىن ايتتى. پرەزيدەنت بۇل ۇكىمەت پەن اكىمدەردىڭ الدىندا تۇرعان نەگىزگى باسىمدىق ەكەنىنە دە ايرىقشا توقتالدى. سوندىقتان وسى ماسەلەنى پارلامەنتتىك تىڭداۋدىڭ كۇنتارتىبىنە شىعارىپ، جان-جاقتى تالقىلاۋدى ءجون كوردىك. ازىق-تۇلىك قاۋىپسىزدىگىن تولىققاندى قامتاماسىز ەتۋگە ەلىمىزدىڭ بارلىق مۇمكىندىگى بار. اۋىل شارۋاشىلىعى ەڭبەككەرلەرىنىڭ ءبىرىنشى فورۋمىندا پرەزيدەنت اگرارلىق سالانى ودان ءارى دامىتۋدىڭ ستراتەگيالىق باعىتتارىن بەلگىلەپ بەردى. شىن مانىندە، ەلىمىزدىڭ بۇل سالادا الەۋەتى زور، - دەدى م. اشىمبايەۆ.

وسى ورايدا ول قازاقستان ەگىستىك جەرلەر مەن جايىلىمدار بويىنشا الەمدە التىنشى ورىن الىپ وتىرعانىن ەسكە سالدى. سونداي- اق ەلىمىز بيداي ەكسپورتتاۋشى ەلدەردىڭ العاشقى وندىعىنا جانە ۇن ەكسپورتى بويىنشا كوشباسشىلار قاتارىنا كىرەدى.

- سونىمەن قاتار، قازىر تاماق ونىمدەرىن ءوندىرۋ سالاسى ەلىمىزدە دايەكتى تۇردە دامىپ كەلەدى. بۇل باعىت وڭدەۋ ونەركاسىبىنىڭ شامامەن 14 پايىزىن قۇرايدى. سوڭعى بەس جىلدا اۋىل شارۋاشىلىعىنداعى نەگىزگى كاپيتالعا سالىنعان ينۆەستيتسيا كولەمى ەكى ەسەگە جۋىق وسكەنىن دە اتاپ وتكەن ءجون. الايدا وسىنداي الەۋەت پەن ارتىقشىلىقتارعا قاراماستان، قازىرگى تاڭدا ەلىمىزدىڭ اۋىل شارۋاشىلىعى سالاسىندا ءبىرقاتار وزەكتى ماسەلە بار. ونى اشىق ايتۋىمىز كەرەك. ازىق- تۇلىك يمپورتى دا از ەمەس. ەڭ الدامەن، سالانىڭ ونىمدىلىگىن ارتتىرۋ ماسەلەسى اسا ماڭىزدى. جالپى، ەڭبەك ونىمدىلىگىنىڭ تومەن بولۋى ءتۇرلى سەبەپتەرگە بايلانىستى. ونىڭ ىشىندە تەحنيكالىق جابدىقتاۋدىڭ جەتكىلىكسىزدىگى جانە اۋىل شارۋاشىلىعىندا زاماناۋي يننوۆاتسيالىق تەحنولوگيالاردى ءتيىستى دەڭگەيدە پايلانباۋ ماسەلەلەرى بار. بۇل سالادا نەگىزگى تەحنيكانىڭ توزۋى شامامەن 40 پايىزدى قۇرايدى، ال جاڭارتۋ كوەففيتسەنتى تەك 10 پايىزعا تەڭ. سونداي-اق قولدانىستاعى تەحنيكانىڭ 70 پايىزىنىڭ پايدالانۋ مەرزىمى 10 جىلدان اسادى. توزعان جابدىقتارمەن جانە ەسكى تاسىلدەرمەن، يننوۆاتسياسىز ونىمدىلىكتى ارتتىرۋ مۇمكىن ەمەس ەكەنى ءسوزسىز. سوندىقتان بۇل باعىتتا جاعدايدى وزگەرتۋ ءۇشىن ناقتى قادامدار قاجەت دەپ ەسەپتەيمىز، - دەدى سەنات ءتوراعاسى.

ونىڭ ايتۋىنشا، مەملەكەت باسشىسى 2028-جىلى ەلىمىزدە وڭدەلگەن اۋىل شارۋاشىلىعى ونىمدەرىنىڭ ۇلەسىن 70 پايىزعا دەيىن جەتكىزۋدى مىندەت ەتىپ جۇكتەدى. وسى باعىتتا. مەملەكەتتىك ورگاندار ءتيىمدى ءارى ناقتى قادامداردى جۇزەگە اسىرۋى كەرەك. ول ءۇشىن اۋىل شارۋاشىلىعى ونىمدەرىن وڭدەۋ سالاسىن سۋبسيديالاۋ جانە اگروسەكتوردى قارجىلاندىرۋدىڭ ءتيىمدى تەتىكتەرىن قالىپتاستىرۋ قاجەت. وسى باعىتتا ۇكىمەت جاعىنان بەلسەندى جۇمىس جۇرگىزىلۋى ءتيىس.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى