ايەل بوسانار كەزدە ەر ادامنىڭ سەرىكتەس بولۋى قانشالىقتى دۇرىس؟
استانا. KAZINFORM - ايەل بوسانار كەزدە ەر ازاماتتىڭ جاردەم كورسەتۋى - قازىرگى قوعامنىڭ تالقىسىندا جۇرگەن تاقىرىپتىڭ ءبىرى. بىرەۋلەر بۇل ارەكەتتى وتباسى ءۇشىن قاجەتتى قولداۋ رەتىندە قابىلدايدى، ەندى ءبىرى باسقالار بۇل جاعدايدى دۇرىس ەمەس دەپ سانايدى.
وسى سۇراق توڭىرەگىندە ءارتۇرلى كوزقاراستار قالىپتاسقانىمەن، ءبىر نارسە ايقىن - بۇل ماسەلەگە قاتىستى پىكىرتالاستار كوپ جانە اركىمنىڭ ءوز ويى بار. وسى رەتتە El.kz ءتىلشىسى مامانداردى سوزگە تارتىپ، كوزقاراستارىن بىلگەن ەدى.
بۇل تاقىرىپ توڭىرەگىندە جاقىندا جۋرناليست اينۇر اسانبەردى ءبىر سۇحباتىندا «باتىر بابامىز باۋىرجان مومىش ۇلىنداي ەر ادامدار قالمادى» دەپ ازاماتتاردى سىنايتىندارعا جاۋاپ بەرىپ، قازىر پەرزەنتحانانىڭ جارتىسى ەر ادامدار، بۇل وتە جاقسى تەندەنتسيا ەكەنىن جەتكىزگەن ەدى. جۋرناليست سونداي-اق قازىرگى كەزدە ەر ادامنىڭ ايەلىنە جاردەمدەسكەنىنەن قورقۋدىڭ قاجەتى جوعىن ايتتى.
قالاي بولعاندا دا، بۇل تاقىرىپ قوعامدا قىزۋ پىكىرتالاس تۋدىرىپ وتىر، ويتكەنى ول تەك ەرلى-زايىپتىلاردىڭ جەكە ومىرىنە عانا ەمەس، جالپى وتباسىلىق قاتىناستار مەن ەر ادامنىڭ وتباسى الدىنداعى جاۋاپكەرشىلىگىنە قاتىستى جاڭا كوزقاراستاردى دا كورسەتەدى.
سەرىكتەستىك بوسانۋ ەكى جۇپتىڭ ماحابباتىن ارتتىرادى
جوعارى ساناتتى اكۋشەر-گينەكولوگ دارىگەر، مەديتسينا عىلىمدارىنىڭ كانديداتى شولپان سارمۋلدايەۆانىڭ ايتۋىنشا، قازىرگى تاڭدا پەرزەنتحانالاردا سەرىكتەستىك بوسانۋ كەڭىنەن تارالۋدا ەكەنىن، بۇل پروتسەستە ايەلگە جاقىن ادامىنىڭ قولداۋى ەرەكشە ماڭىزدى ءرول اتقاراتىنىن ايتتى. «مەن ءوزىم اكۋشەر-گينەكولوگ دارىگەر رەتىندە سەرىكتەستىك بوسانۋدىڭ ماڭىزدىلىعىن تەرەڭ تۇسىنەمىن. ويتكەنى بۇل پروتسەسس جۇپقا تىنىشتىق پەن سەنىمدىلىك اكەلىپ، كەيىننەن ءبىر-بىرىنە دەگەن ماحاببات پەن قۇرمەتتى ارتتىرادى، - دەيدى دارىگەر.
دەسە دە، دارىگەر سەرىكتەس بوسانۋ پروتسەسىنە تولىق دايىن بولىپ، ايەلدى ساپالى قولداي الۋى وتە ماڭىزدى ەكەنىن ايتادى.
بۇل ماقساتتا بوسانۋعا دايىندىق كۋرستارى ۇيىمداستىرىلىپ تۇرادى. مۇندا كاسىبي ماماندار بوسانۋ پروتسەسىنىڭ قالاي وتەتىنىن جانە ايەلدى مورالدىق ءارى فيزيكالىق تۇرعىدان قالاي قولداۋعا بولاتىنىن تۇسىندىرەدى. بوسانۋ كەزىندە اۋىرسىنۋ بولاتىنىنا بايلانىستى، ايەلدىڭ ايقايى مەن ىڭعايسىزدىقتارى تۋىنداۋى مۇمكىن. بۇل جاعداي تۋىسقاندارعا دا پسيحولوگيالىق اۋىرلىق تۋدىرۋى ىقتيمال. ارينە، اۋرۋحانالاردا بوسانۋ كەزىندە اۋىرسىنۋدى جەڭىلدەتۋ ءۇشىن ءتۇرلى ادىستەر قولدانىلادى، ءبىراق تولىقتاي اۋىرسىنۋدى جويۋ مۇمكىن ەمەس. سوندىقتان سەرىكتەستىڭ بوسانۋ پروتسەسىنە دۇرىس ءارى سابىرلى رەاكتسياسى وتە ماڭىزدى، - دەدى اكۋشەر-گينەكولوگ دارىگەر شولپان سارمۋلدايەۆا.
دارىگەردىڭ سوزىنشە، سەرىكتەستەر مەديتسينالىق قىزمەتكەرگە كومەك كورسەتە ءبىلۋى ءتيىس. ال بۇعان دايىن ەمەستەر اكۋشەر-گينەكولوگتاردىڭ جۇمىسىنا كەدەرگى جاساپ، دۇربەلەڭ مەن كۇيزەلىس تۋعىزۋى مۇمكىن ەكەنىن جەتكىزدى.
بولاشاقتا بىرگە بوسانعان جۇپتار ءبىر-بىرىنە دەگەن قامقورلىقتى، قۇرمەت پەن ماحابباتتى تەرەڭ سەزىنەدى. سەرىكتەستىك بوسانۋ اتا-انالار ءۇشىن وتە ماڭىزدى، ءبىراق ول ءۇشىن انا مەن اكەنىڭ تولىق دايىندىعى قاجەت، - دەدى اكۋشەر-گينەكولوگ دارىگەر.
ەر ازاماتتىڭ بالاعا دەگەن ەرەكشە سەزىمى پايدا بولادى
بۇل رەتتە پسيحولوگ مامان اينۇر دۇيسەن پسيحولوگيا تۇرعىدان العاندا، بۇل ماسەلەدە ەكى ءتۇرلى نۇسقا بارىن، ەر ادامداردىڭ بوساناتىن زالعا كىرۋى ماڭىزدى ەكەنىن ايتادى.
ويتكەنى - اياعى اۋىر ايەلىنىڭ جانىندا بولا وتىرىپ، ونىڭ قيىندىقتارىن بىرگە بولىسە الادى. ەگەر قارىم-قاتىناس جاقسى بولسا، ولار ءبىر-ءبىرىن ءتۇسىنىپ، قولداۋ كورسەتىپ، ارالارىنداعى اۋىزبىرشىلىك ارتادى. مۇنداي جاعدايلاردا كۇيەۋ مەن ايەل اراسىندا ءوزارا تۇسىنىستىك پەن جىلى قارىم-قاتىناس پايدا بولادى، بۇل بولاشاقتا ولاردىڭ بايلانىسىن نىعايتا ءتۇسۋى مۇمكىن. ەر ادامدار ايەلدەرىن انا رەتىندە باسقاشا ءتۇسىنىپ، ولارعا دەگەن كوزقاراسى وزگەرەدى. وسى وزگەرىستەر ناتيجەسىندە اكەسى مەن بالاسى اراسىندا ەرەكشە، تەرەڭ بايلانىس ورنايدى. سەرىكتەستىك كەزىندە اكەسى بالانى العاش رەت ءوز قولىنا الىپ، ونى ءسۇيىپ، كەۋدەسىنە جاقىنداتادى. بۇل ساتتەردە ەر ادامداردىڭ بالاعا دەگەن ەرەكشە سەزىمدەرى پايدا بولىپ، ايەلىنە دەگەن تۇسىنىگى دە ارتادى، - دەيدى پسيحولوگ مامان.
بۇل پروتسەس كەزىندە ەر ادامداردىڭ كوزدەرى اشىلىپ، ايەلدەرىنە دەگەن قۇرمەتى مەن سۇيىسپەنشىلىگى ودان ءارى نىعايا تۇسەدى دەپ وتىر. پسيحولوگ اينۇر دۇيسەن ەگەر كۇيەۋى مەن ايەلىنىڭ اراسىنداعى قارىم-قاتىناس دۇرىس بولماسا نەمەسە ايەل اياعى اۋىر كەزىندە توعىز اي بويى جالعىز بولسا، كۇيەۋىمەن اراسىندا تۇسىنىسپەۋشىلىك پەن اۋىزبىرشىلىك بولماسا، وندا كۇيەۋىنىڭ بوساناتىن زالعا كىرۋى قاجەت ەمەس دەپ سانايدى.
كوبىنەسە مۇنداي جاعدايدا قارىم-قاتىناس قيىن بولۋى مۇمكىن. ايەل اۋىرسىنۋى مەن سترەسستى سەزىنىپ، ەموتسيالارى كۇشەيەدى، كەيدە ايعايلاپ، قينالىپ كەتەدى. ال ەگەر كۇيەۋى مەن ايەلى اراسىندا تۇسىنبەۋشىلىك بولسا، بۇل جاعداي ەموتسيونالدى جاعىنان تاعى دا قيىنداتا تۇسەدى. ەگەر ايەل كۇيەۋىنەن قولداۋ سەزىنبەسە، ونىڭ كۇيەۋىنە دەگەن كوزقاراسى دا وزگەرۋى مۇمكىن، كۇيەۋى ءۇشىن مۇنداي جاعدايدى ءتۇسىنۋ قيىن بولادى. سوندىقتان كۇيەۋى مەن ايەلىنىڭ اراسىنداعى قارىم-قاتىناس دۇرىس بولسا دا، ايەل مەن كۇيەۋى الدىن الا دايىندالىپ، سويلەسىپ، ءبىر-بىرىنە كومەكتەسۋ ءۇشىن دايىن بولۋى كەرەك، - دەيدى پسيحولوگ.
مامان كۇيەۋى ءوز نيەتىمەن، ياعني «كومەكتەسۋگە دايىنمىن» دەگەن ويمەن كەلۋى ماڭىزدى دەپ وتىر. «ايەلگە مورالدىق قولداۋ كورسەتىپ، ونىڭ كوڭىل-كۇيىن ءتۇسىنىپ، سابىرلى بولۋ كەرەك. كۇيەۋىنىڭ زالعا كىرۋى ءۇشىن، ايەل مەن كۇيەۋى الدىن الا اشىق سويلەسىپ، بۇل پروتسەستى بىرگە تالقىلاۋى قاجەت. بوسانۋ الدىندا ولار ءبىر-بىرىنە مورالدىق قولداۋ كورسەتىپ، دايىن بولۋعا تىرىسۋى كەرەك. كۇيەۋى مورالدىق تۇرعىدا كومەكتەسسە، بۇل ايەلگە وڭ اسەر ەتەدى. سوندىقتان اڭگىمەلەسىپ، تۇسىنىستىك پەن دايىندىق وتە ماڭىزدى»، - دەدى اينۇر دۇيسەن.
سونداي-اق مامان قاسىندا بولۋ، قولداۋ كورسەتۋ، كومەكتەسۋ بۇل وتە ماڭىزدى ەكەنىن ايتادى.
ەندى %100 مىندەتتى تۇردە سەرىكتەس بولۋى كەرەك دەپ ايتا المايمىن. مۇنداي جاعدايدا زاڭ تۇرعىسىنان دا مىندەتتەۋ قاجەت ەمەس دەپ ويلايمىن. مەنىڭشە، تەك ءار ادامنىڭ ءوز ەركى مەن تىلەگىنە بايلانىستى بولۋى كەرەك. اركىم ءوز قالاۋى بويىنشا قاتىسا الادى. ياعني، تەك قانا بۇل پروتسەستە قاجەتتى قولداۋدى كورسەتە الاتىن ادام كىرۋى ءتيىس، ال ونداي مۇمكىندىك جوق بولسا سەرىكتەس بولىپ قاجەت ەمەس دەپ سانايمىن، - دەيدى پسيحولوگ اينۇر دۇيسەن.
بۇل - ۇلتتىق مادەنيەتىمىزگە جات دۇنيە
تاريح عىلىمىنىڭ دوكتورى، پروفەسسور امانجول قالىش زامان وتە جىلدام وزگەرىپ جاتقانىن، بۇرىن قازاقتار كيىز ۇيدە تۇرعان كەزدە ەر ادامدار بوسانۋ پروتسەسىنە قاتىسپايتىنىن ايتادى.
مۇنداي جاعدايلاردا ارنايى ۇلكەن كىسىلەر، اپالار مەن اجەلەر، ياعني كىندىك شەشەلەر بوساندىراتىن. ال قازىر جاعداي باسقا. زامان وزگەرگەن سايىن وتباسى ماسەلەلەرى دە باسقا قىرىنان قاراستىرىلادى. مەن وسى وتباسى مەن بالالار تاقىرىبىن زەرتتەپ ءجۇرمىن، ومىرگە كەلگەننەن باستاپ، ولار وسى جالعان دۇنيەدەن وزعانشا قانداي وزگەرىستەر مەن عۇرىپتار بولاتىنىن باقىلايمىن. اۋىلدىق جەرلەردە مۇنداي جاعدايلار ءالى دە كەڭ تارالماعان. ءبىراق اۋىلدا دا كەيدە ايەلدەر دارىگەر بولماسا، امالسىزدان بوسانىپ قالاتىن جاعدايلار ءجيى كەزدەسەدى. مۇنداي جاعدايلاردا ايەلدەر كوبىنەسە كومەك الۋ ءۇشىن جولدا نەمەسە باسقا جەرلەردە بوسانىپ قالادى، - دەيدى پروفەسسور.
امانجول بورانباي ۇلىنىڭ سوزىنشە، ءبىر دوسىنىڭ ايەلى ەكىنشى بالاسىن دۇنيەگە اكەلەردە، تولعاق باستالعاندا شاقىرعان جەدەل جاردەمى جەتىپ، دارىگەرلەر كەلگەنشە ايەل كۇيەۋىنىڭ كومەگىمەن بوسانىپ قويعانىن ايتادى.
دوسىم نارەستەنى ءوزى قابىلداپ العان. سودان بالا وسكەسىن ەكى جارىم جاسقا كەلگەندە دارىگەرلەر سۇرايدى عوي «كىم سەندەردى ومىرگە اكەلگەن دەپ، سوندا ءبىزدىڭ انامىز تەك ۇل تۋاتىن» دەپ ايتىپتى. ايتقانداي اناسى ءتورت ۇل، ءبىر قىز بوسانعان. ال كەيىن ولار جاتاقحانادا تۇردى، اكەسى بوساندىرىپ العان بالا ۇلكەن قىزمەتتە لوندوندا جۇمىس ىستەيدى، - دەدى.
ساراپشى ال قازىرگى جاعداي بۇل مۇلدە باسقا دەپ وتىر.
ءبىزدىڭ قوعامدا ەر ادامنىڭ ايەلىنىڭ بوسانۋ پروتسەسىنە قاتىسۋى ۇيات سانالاتىن كەزدەر بولعان. ءبىراق قازىرگى زاماندا، ءبىزدىڭ پەرزەنتحانالاردا بارلىق جاعداي جاسالعان. بۇرىن ءبىز پەرزەنتىمىزدىڭ ۇل نەمەسە قىز بولاتىنىن بىلمەيتىن ەدىك، بۇل تەك قۇدايدىڭ قالاۋىمەن بولاتىن نارسە ەدى. ءقازىر كوپتەگەن ادامدار بالاعا زار بولىپ، ءارتۇرلى سۇراقتارمەن الاڭدايدى. ال ەۆروپادا، امەريكادا بۇل ماسەلەلەر قالىپتى بولىپ تابىلادى. ولار ايەلدىڭ قاسىندا وتىرىپ، قولىن ۇستاپ، بوساندىرۋدى كورسەتەدى. ال ءبىزدىڭ ەلدە مۇسىلمان، تۇركى حالىقتارىنا، ونىڭ ىشىندە قازاقتارعا جاراسپايدى دەپ ويلايمىن. مەن قازاقتىڭ ءداستۇرىن جاقسى بىلەتىن ادام رەتىندە، اتا-اناسى مەن اتالارىنىڭ اراسىندا مۇنداي جاعدايدى كورگەن ەمەسپىن، - دەيدى امانجول قالىش.
تاريحشى: «بىزدە ەر ادامداردىڭ ايەلىنىڭ بوسانۋىنا قاتىسۋى - بۇل تاڭعالارلىق ءارى عاجايىپ نارسە. ايەلىنىڭ ءبىرىنشى بالاسىن باسقا ومىرگە اكەلىپ جاتقانىن كورۋ - وتە ەرەكشە، ءارى وتە اۋىر جاعداي. ونىڭ قينالعانىن، ايعايلاعانىن ەشكىم تۇسىنبەيدى، ونى تەك سول ساتتە قاتىسىپ وتىرعان ادام عانا سەزىنە الادى. كەيدە بوسانۋ پروتسەسى ۇزاققا سوزىلىپ، ءبىر تاۋلىك نەمەسە ودان دا كوپ ۋاقىتقا سوزىلۋى مۇمكىن. ايەل شىدامسىزدانىپ، تولعاقتارى قاتتى بولادى، ال ەركەك ونى كورىپ، قانداي كۇيدە بولاتىنىن دا ەلەستەتۋ قيىن» دەپ وتىر.
سول سەبەپتى ءبىزدىڭ اۋىلداردا نەمەسە قالالارىمىزدا، اسىرەسە قالادا تۇرىپ جاتقان قازاقتار اراسىندا مۇنداي جاعدايلار وتە سيرەك كەزدەسەدى. مەن ءوز تۋىسقاندارىمنىڭ اراسىندا مۇنداي نارسە بولعانىن ەستىمەدىم. ارينە، شەتەلدە امەريكادا، انگليادا نەمەسە ەۋروپادا وقىپ كەلگەن جاس ادامدار، ءبىزدىڭ ءداستۇرىمىزدى تولىق تۇسىنبەۋى دە مۇمكىن. ءبىز قازاقتار ادەتتە، باتىستىڭ ۇلگىلەرىن تەز قابىلدايمىز، ءبىراق ءوزىمىزدىڭ ۇلتتىق داستۇرلەرىمىزدى ساقتاۋ ماسەلەسىندە كوڭىل بولمەيمىز. ءبىزدىڭ كورشى ەلدەرىمىز - قىرعىزدار، وزبەكتەر، تۇركىمەندەر، تاجىكتەر، سونداي-اق، قىتاي، موڭعوليا، تۇركيا، اۋعانستان سياقتى ەلدەر ەشقاشان دا مۇنداي وزگەرىستەرگە بارمايدى. سوندىقتان بۇل ءبىزدىڭ ۇلتتىق مادەنيەتىمىزگە جات دۇنيە، - دەيدى امانجول قالىش.
ايەل قورقىنىشىن جەڭە الادى
پسيحولوگ، گەشتالت-تەراپيەۆت ارتۋر جۇماشيەۆتىڭ سوزىنشە، ەر ادامنىڭ بوسانۋ كەزىندە سەرىكتەس بولۋ ماسەلەسى، ەڭ الدىمەن جۇپتىڭ ءوزارا قاجەتتىلىكتەرى، سەنىمى جانە شەكارالارىنا نەگىزدەلگەن تاڭداۋ ەكەنىن ايتادى. مامان بۇل ارەكەت «دۇرىس» نەمەسە «قاتە» ەمەس، ەكى سەرىكتەستىڭ ىشكى سەزىمدەرىنە سايكەس كەلەتىن شەشىم ەكەنىن ءتۇسىنۋ ماڭىزدى دەپ جەتكىزدى.
گەشتالت-تەراپيا تۇرعىسىنان العاندا، بالانىڭ دۇنيەگە كەلۋ ساتىندە كورسەتىلگەن قولداۋ جۇپتىڭ اراسىنداعى ماڭىزدى جانە ءبىرتۇتاس بايلانىس نۇكتەسىنە اينالۋى مۇمكىن. بوسانۋ كەزىندە ايەل فيزيكالىق جانە ەموتسيونالدىق تۇرعىدان قيىن ساتتەردەن وتەدى جانە ەگەر جانىندا ونى قولدايتىن سۇيىسپەنشىل سەرىگى بولسا، بۇل ونىڭ ۋايىمىن تومەندەتۋگە، ءوزىن قاۋىپسىز سەزىنۋگە كومەكتەسەدى. ەر ادام ءۇشىن بۇل پروتسەسس دە ماڭىزدى تاجىريبە بولۋى مۇمكىن. ول سىرتتاي باقىلاۋشى بولىپ قالماي، وسى ماڭىزدى وقيعانىڭ ءبىر بولىگىنە اينالادى. بۇل وعان ايەلدى جاقسىراق تۇسىنۋگە، بالامەن العاشقى ساتتەردەن بايلانىس ورناتۋعا جانە اكە رەتىندەگى ءرولىن تەرەڭىرەك سەزىنۋگە كومەكتەسەدى، - دەيدى گەشتالت-تەراپيەۆت ارتۋر جۇماشيەۆ.
دەسە دە پسيحولوگ جۇپتىڭ جەكە ەرەكشەلىكتەرىن ەسكەرۋ ماڭىزدى. ەگەر ەر ادام وسىنداي تاجىريبەگە ىشكى تۇردە دايىن بولماسا نەمەسە ايەل ءوزىن بۇل ءساتتى جالعىز وتكەرگەندە ىڭعايلى سەزىنەتىن بولسا، ونى ماجبۇرلەۋ تەك زيان كەلتىرۋى مۇمكىن ەكەنىن ايتادى.
سونداي-اق مامان بوسانۋ كەزىندە ەر ادامنىڭ بولۋى ەرلى-زايىپتىلاردىڭ قارىم-قاتىناسىن ەداۋىر نىعايتا وتىرىپ، تۇسىنىك پەن سەنىمدىلىكتى جانە جاقىندىقتى تەرەڭدەتە الاتىنىن جەتكىزدى. ەر ادام ايەلىنىڭ قانداي قيىندىقتاردى باسىنان وتكەرىپ جاتقانىن كورىپ، ونىڭ وتباسى ءۇشىن قوسقان ۇلەسىن تەرەڭىرەك تۇسىنەدى دەپ سانايدى.
ەكىنشى جاعىنان، ەگەر ەر ادامنىڭ بۇل پروتسەسكە ىشكى دايىندىعى بولماسا، ول قاتتى كۇيزەلىسكە ۇشىراپ، كەيبىر جاعدايلاردا ونىڭ ايەلىن قابىلداۋىنا نەمەسە ولاردىڭ جاقىن قارىم-قاتىناستارىنا كەرىس اسەر ەتۋى مۇمكىن. سوندىقتان قاتىسۋدىڭ سانالى جانە ەرىكتى بولۋى ماڭىزدى. پسيحولوگيالىق تۇرعىدان العاندا، سەرىكتەستىڭ بوسانۋ كەزىندە بولۋى ايەلگە قاۋىپسىزدىك سەزىمىن بەرەدى، الاڭداۋشىلىقتى تومەندەتەدى جانە ەموتسيونالدىق تۇراقتىلىقتى ارتتىرادى. ايەل ءوزىن جالعىز ەمەس ەكەنىن، جانىندا ونى قولداپ، كومەك كورسەتەتىن، جىگەرلەندىرەتىن ادام بار ەكەنىن سەزىنەدى، - دەيدى پسيحولوگ مامان.
سونىمەن قاتار گەشتالت-تەراپيەۆت ەر ادامنىڭ سەرىكتەس بولۋى ايەلگە بوسانۋعا بايلانىستى قورقىنىشپەن كۇرەسۋگە ايتارلىقتاي كومەكتەسەتىنىن، قاسىندا قولداۋعا دايىن سۇيىسپەنشىلىككە تولى ادام بولعان كەزدە، ول ونى جەڭە الاتىندىعىن ەسكە تۇسىرەدى جانە قيىن ساتتە قولىن ۇستايدى، بۇل ايەلگە كۇش بەرەدى دەپ وتىر.
بوسانۋ بۇل ءدال وسىنداي پروتسەسس، ەگەر ەر ادام ايەلگە تىرەك بولا السا، بۇل وعان قورقىنىشپەن وڭاي كۇرەسۋگە كومەكتەسىپ قانا قويماي، ولاردىڭ ەموتسيونالدى بايلانىسىن نىعايتادى. دەسە دە، بۇل جەردە ەرلى-زايىپتىلاردىڭ جەكە باسىن ەسكەرۋ ماڭىزدى. كەيبىر ايەلدەر ءۇشىن سەرىكتەس بولۋ، كەرىسىنشە، ەگەر ول جاعدايدى جەڭۋ قيىن دەپ ساناسا، قوسىمشا سترەسس بولۋى مۇمكىن. بۇل جاعدايدا قولداۋدىڭ قاي فورماتتا ەڭ پايدالى بولاتىنىن الدىن-الا تالقىلاۋ ماڭىزدى. بالكىم تەك باستاپقى كەزەڭدە بولۋ، تىنىس الۋ تەحنيكاسىنا قاتىسۋ نەمەسە بالا تۋىلعاننان كەيىن قولداۋ كەرەك تە شىعار، - دەدى ول.
مامان پەرزەنتحانادا ەر ادامنىڭ بولۋى بۇل ەرلى-زايىپتىلاردىڭ جەكە تاڭداۋى ەكەنىن، كوپتەگەن ەرلى- زايىپتىلار ءۇشىن بۇل قارىم- قاتىناستى نىعايتاتىن جانە بىرگە اتا-انا بولۋ ءۇشىن بەرىك نەگىز قۇراتىن ماڭىزدى قادام ەكەنىن ايتادى.
