اۋىل پارتياسى ەلىمىزدەگى ءتۇرلى ەتنوس وكىلدەرىمەن جاڭا جوبا باستاماقشى
استانا. KAZINFORM - قازاقستان حالقى اسسامبلەياسىنىڭ 30 جىلدىعىنا وراي «اۋىل» پارتياسى «ەل جاستارىنىڭ بىرلىگى - بەرەكە باستاۋى» اتتى كەزدەسۋ وتكىزدى، دەپ حابارلايدى El.kz اقپارات اگەنتتىگى.
بۇل جيىنعا «اۋىل» پارتياسىنىڭ ءتوراعاسى، ق ر پارلامەنتى ءماجىلىسىنىڭ دەپۋتاتى سەرىك ەگىزبايەۆ، «اۋىل» پارتياسى فراكسياسىنىڭ دەپۋتاتى نيكولاي ارسيۋتين، سونداي-اق ەلىمىزدەگى ءتۇرلى ەتنوستاردىڭ جاستارى قاتىستى.
جيىندى اشقان پارتيا ءتوراعاسى سەرىك ەگىزبايەۆ قازاقستاننىڭ ەڭ باستى بايلىعى - ەلدىڭ بىرلىگى ەكەنىن تىلگە تيەك ەتتى. سونداي-اق دەپۋتات «اۋىل» پارتياسى جاستارمەن تۇراقتى تۇردە كەزدەسىپ، ولاردىڭ وي-پىكىرلەرىن تىڭداۋعا ەرەكشە ءمان بەرەتىنىن، بۇل جۇمىس تەك استاناداعى ءىس-شارالارمەن شەكتەلمەي، وڭىرلەرگە ساپار بارىسىندا دا جالعاسىپ جاتقانىن اتاپ ءوتتى. پارتيا مۇشەلەرى جاستارمەن ەركىن فورماتتاعى كەزدەسۋلەر وتكىزىپ، ولاردىڭ ۇسىنىستارىن ەسكەرۋگە تىرىسادى دەپ ايتتى.
ءبىز ءاردايىم جاستارمەن كەزدەسىپ، ولاردىڭ ويلارىن تىڭدايمىز. جاستار - ەل بولاشاعى دەيمىز، ال سول بولاشاقتى بۇگىن قالىپتاستىرىپ جاتقانىمىزدى ۇمىتپاۋىمىز كەرەك. ءبىز زاڭنامالىق تۇرعىدان دا، بيۋدجەتتىك ساياسات تۇرعىسىنان دا جاستار ءۇشىن ماڭىزدى شەشىمدەر قابىلداپ جاتىرمىز. ءبىراق سول باستامالار ولارعا شىنىمەن قاجەت پە، جوق پا - ونى جاستاردىڭ وزدەرىنەن ءبىلۋ ماڭىزدى. وسىنداي كەزدەسۋلەر كەرى بايلانىس الۋ ءۇشىن اسا قاجەت. قازىر قازاقستان تۋرالى ايتقاندا كوبىنە جەر استىنداعى بايلىققا ءمان بەرەمىز. ءبىراق ءبىزدىڭ شىنايى بايلىعىمىز - حالقىمىزدىڭ تاتۋلىعى مەن بىرلىگى. اتا-بابالارىمىز وسى قۇندىلىقتى بىزگە مۇرا ەتىپ قالدىردى. ەندىگى مىندەت - ونى ساقتاۋ، ءارى قاراي نىعايتۋ. بۇل اسىرەسە سىزدەرگە، جاس ۇرپاققا جۇكتەلگەن امانات، - دەدى پارتيا ءتوراعاسى سەرىك ەگىزبايەۆ.
ءىس-شارا بارىسىندا «اۋىل» پارتياسىنىڭ قوعامدىق-ساياسي جۇمىس دەپارتامەنتىنىڭ ديرەكتورى، ەتنيكالىق ساياسات بويىنشا زەرتتەۋشى جاندوس قارىنبايەۆ قازاقستانداعى ەتنوسارالىق قارىم-قاتىناستاردىڭ تاريحى مەن قازىرگى جاعدايى تۋرالى بايانداما جاسادى.
كەزدەسۋگە قاتىسقان جاستار دا ءوز ويلارىن ورتاعا سالىپ، قوعامداعى وزەكتى ماسەلەلەردى قوزعادى. ماسەلەن ا. بوكەتوۆ اتىنداعى قاراعاندى ۋنيۆەرسيتەتى جۋرناليستيكا فاكۋلتەتىنىڭ 1-كۋرس ستۋدەنتى البينا ديەۆيۆىە قازاق ءتىلدى ينتەرنەت كونتەنتتىڭ ازدىعىنا الاڭداۋشىلىق ءبىلدىرىپ، وسىنىڭ سالدارىنان كەيبىر بالالاردىڭ انا ءتىلىن ۇيرەنۋدە قيىندىقتارعا تاپ بولىپ جاتقانىن ايتىپ، دەپۋتاتتارعا وسى ماسەلەگە نازار اۋدارۋ قاجەتتىگىن ايتتى.
قازىر دۇنيەنى ينتەرنەت جاۋلاپ الدى. وكىنىشكە قاراي قازىر ينتەرنەتتە قازاق تىلىندە كونتەنتتتەر وتە از. سول سەبەپتى كىشكەنتاي بالالار وزگە تىلدە سويلەپ ءجۇر. وسى رەتتە قازاق ءتىلدى كونتەنتتى كوبەيتۋ كەرەك. مۋلتفيلمدەر مەن كينولاردى دا قازاقشالاساق، - دەدى البينا ديەۆيۆىە.
«اۋىل» پارتياسى - اۋىلدارعا ءمان بەرىپ، اۋىل شارۋاشىلىعىن دامىتۋ ماقساتىندا جۇمىس ىستەپ كەلە جاتقان بىردەن ءبىر پارتيا. پارتيانىڭ جاستار قاناتى اۋىلدا، اۋىل شارۋاشىلىعى سالاسىندا ەڭبەك ەتەتىن جاستاردى دارىپتەۋدى داستۇرگە اينالدىرعان. سونداي جاستىڭ ءبىرى - اقمولا وبلىسى، زەرەندى اۋدانى «ديحان پليۋس» ج ش س - ڭ باس ەنەرگەتيگى ميحايل شتير.
تۋعان جەردىڭ، اۋىلدىڭ ءقادىرىن تەرەڭ ءتۇسىنۋىمىز قاجەت. پارتيا اۋىل جانە اۋىل شارۋاشىلىعىنىڭ ماسەلەلەرىن بەلسەندى تۇردە كوتەرىپ كەلەدى. ەگەر اۋىل شارۋاشىلىعى دامىسا، اۋىل دا گۇلدەنەدى، كوركەيەدى. ءاربىر مەملەكەتتىڭ وركەندەۋى ءۇشىن بۇل اسا ماڭىزدى، - دەدى ميحايل شتير.
اشىق سۇحبات فورماتىندا وتكەن جيىندا حالىق بىرلىگى، ۇلتتىق تۇتاستىق جانە ۇرپاقتار ساباقتاستىعى تاقىرىپتارى كەڭىنەن تالقىلاندى. كەزدەسۋ سوڭىندا پارتيا قاتارىنا جاڭادان قابىلدانعان جاستارعا سالتاناتتى تۇردە پارتيالىق بيلەتتەر تابىستالدى.
جيىن قاتىسۋشىلاردىڭ سۇراق-جاۋاپ الماسۋىمەن قورىتىندىلاندى.
