پايشىلارعا 546 مىڭ گەكتار جەر قايتارىلدى - باس پروكۋراتۋرا
2022-جىلى پروكۋرورلاردىڭ قابىلداعان ءىس- شارالارىنىڭ ناتيجەسىندە پايشىلارعا 546 مىڭ گەكتار جەر قايتارىلدى.
بۇل جايىندا ءماجىلىس دەپۋتاتتارىنىڭ ساۋالىنا باس پروكۋرور بەرىك اسىلوۆتىڭ جاۋابىندا ايتىلعان، دەپ حابارلايدى Kazinform.
« 2022-جىلى پروكۋراتۋرا ورگاندارى شارتتى جەر ۇلەستەرىن پايدالانۋ جانە پايشىلاردىڭ قۇقىقتارىن قورعاۋ ماسەلەلەرىن رەتتەۋ سالاسىندا زاڭدىلىقتىڭ ساقتالۋىنا تەكسەرۋ جۇرگىزدى. وسى جۇمىس اياسىندا پروكۋرورلار 169 پروبلەمالىق كاسىپورىندى (اقمولا، الماتى، جامبىل، قىزىلوردا سولتۇستىك - قازاقستان جانە تۇركىستان وبلىستارى) انىقتادى. ولاردا 81 مىڭ پايشى جانە 4,1 ميلليون گەكتار (ونىڭ ىشىندە 868 مىڭ گەكتار زاڭسىز كەپىلگە قويىلىپ، 791 مىڭ گەكتار يەلىكتەن شىعارىلعان) اۋىل شارۋاشىلىعى القاپتارى بار. جالپى پروكۋرورلار قابىلداعان ءىس- شارالار بويىنشا پايشىلارعا بارلىعى 546 مىڭ گەكتار قايتارىلدى. زاڭسىز كەپىل جانە جەردى قايتا راسىمدەۋ فاكتىلەرى بويىنشا قىلمىستىق قۋدالاۋ ورگاندارىنىڭ وندىرىسىندە 5 قىلمىستىق ءىس بار»، - دەدى بەرىك اسىلوۆ جاۋابىندا.
