ايداربەك قوجانازاروۆ كوكپار فەدەراتسياسىنىڭ پرەزيدەنتى بولىپ سايلاندى
استانا. KAZINFORM - ەلىمىزدە كوكپار فەدەراتسياسىنىڭ جاڭا پرەزيدەنتى سايلاندى. باۋىرجان ءابدىراشيت ۇلىنىڭ ورنىنا ءماجىلىس دەپۋتاتى ايداربەك قوجانازاروۆ كەلدى.
بۇگىن رەسپۋبليكالىق «كوكپار» فەدەراتسياسىنىڭ كەزەكتەن تىس كونفەرەنسياسى ءوتتى. وتىرىس بارىسىندا فەدەراتسيانىڭ وتكەن جىلعا قورىتىندىسى تىڭدالىپ، بيىلعا جوسپارى ايتىلادى. سونىمەن قاتار ۇلتتىق سپورت قاۋىمداستىعىنىڭ پرەزيدەنتى ەركەبۇلان ءىلياسوۆ كوكپار فەدەراتسياسىنىڭ جاڭا پرەزيدەنتىن تاڭداۋ تۋرالى ۇسىنىس ءبىلدىرىپ، بۇل لاۋازىمعا ايداربەك قوجانازاروۆ سايلاندى.
- باۋىرجان ءابدىراشيت ۇلى ءوز ەركىمەن قۇزىرەتتىلىگىن توقتاتتى. سالانىڭ دامۋىنا قوسقان ۇلەسىڭىز ءۇشىن العىس بىلدىرەمىن. بۇل قىزمەتكە قازىرگى ءماجىلىس دەپۋتاتى، كوكپار فەدەراتسياسىنىڭ قۇرمەتتى پرەزيدەنتى، ۇلتتىق سپورتتىڭ باسى- قاسىندا جۇرگەن ازامات ايداربەك قوجانازاروۆ سايلاندى. كوپشىلىگىمىز جاقسى تانيمىز، ول قوستانايدا كوكپاردى دامىتىپ، ۇلكەن دەڭگەيگە كوتەرە الدى. ءسىزدىڭ باسقارۋىڭىزدا فەدەراتسيا دا دامي تۇسەدى دەگەن سەنىمدەمىن، - دەدى ەركەبۇلان ءىلياسوۆ.
كوكپار فەدەراتسياسىنىڭ جاڭا پرەزيدەنتى كوپشىلىككە سەنىم بىلدىرگەنى ءۇشىن العىس ايتىپ، سالانىڭ دامۋى ءۇشىن قانداي شارالاردى قولعا الاتىنىن ايتتى.
- كوكپار سپورتىنان «قازاقستان كوكپار ليگاسىن» باستايمىز. جۇلدە قورى 25 ميلليون تەڭگەنى قۇرايدى. قازىر باسقا سپورتتىق شارالار كەستەسىن قاراپ، ليگانى وتكىزۋ ۋاقىتىن ناقتىلايمىز. سونىمەن قاتار كوكپاردى ايماقتاردا كەڭىنەن ناسيحاتتاۋ ءۇشىن بارلىق وبلىستا فەدەراتسيا فيليالدارىن اشىپ، ماركەتينگ، جارناما جاعىن كۇشەيتەمىز. چەمپيوناتتىڭ جۇلدە قورىن كوبەيتىپ، جاقسى ويىن كورسەتكەن كوماندالارعا ىنتالاندىرۋ سىيلىعىن قاراستىرامىز، - دەپ اتاپ ءوتتى ايداربەك قوجانازاروۆ.
سونىمەن قاتار ول چەمپيونات بارىسىندا جەكەلەگەن سپورتشىلار مەن جاقسى دايىندالعان اتتارعا بەلگىلى ءبىر نوميناتسيالار ارقىلى ىنتالاندىرۋ بەرۋ كوزدەلىپ وتىرعانىن اتاپ ءوتتى. سالىم سالعان ات يەسىنە دە جۇلدە قورىنىڭ بەلگىلى ءبىر پايىزىن بەرۋ قاراستىرىلعان. بۇل ات يەسى كوكپارشىلارعا اتىن بەرمەي قوياتىن جاعدايلاردىڭ الدىن الۋ ءۇشىن جاسالىپ وتىر.
كونفەرەنسيا قورىتىندىسىندا كوكپار سپورتىنىڭ بۇگىنگى احۋالى تالقىلانىپ، جاستار اراسىنداعى قازاقستان چەمپيوناتىنىڭ جەرەبەسى ءوتتى.
اۆتور
ەربول جانات
